October 2025
ಕ್ರಿಸ್ತಾಂವಾಂ ಮಧೆಂಯಿ ಜಾತ್ ಆಸಾ?
ಹೆಂ ಸವಾಲ್ ಆಯ್ಲೆವಾರ್ ಜಾಯ್ತ್ಯಾ ಕ್ರಿಸ್ತಾಂವಾಂ ಮಧೆಂ, ವಿಶೇಸ್ ಕರುನ್ ಕಥೊಲಿಕ್ ಸಮುದಾಯಾಮಧೆಂ ಆಯ್ಕೊಂಕ್ ಮೆಳ್ಳೆಂ. ಕರ್ನಾಟಕ ರಾಜ್ಯಾಚ್ಯಾ ಪಾಟಿಂ ಉರ‍್ಲಲ್ಯಾ ವರ‍್ಗಾಂಚ್ಯಾ ಆಯೋಗಾನ್ ಲೊಕಾಚಿ ಸಮಾಜಿಕ್, ಶೈಕ್ಷಣಿಕ್, ಆರ‍್ತಿಕ್ ಆನಿ ರಾಜಕೀಯ್ ಸ್ಥಿತಿಗತ್ ದಾಕಲ್ ಕರ‍್ಚ್ಯಾ ಇರಾದ್ಯಾನ್ 2025 ವರ‍್ಸಾಚಿ ಸಮಾಜಿಕ್ ಆನಿ ಶೈಕ್ಷಣಿಕ್ ಸಮೀಕ್ಶಾ ಘೋಶಣ್ ಕರ‍್ತಾನಾ ಪರ‍್ಗಟ್‌ಲ್ಲಿ 46 ಕ್ರಿಸ್ತಾಂವ್ ಜಾತಿವರ‍್ಗಾಂಚಿ ಪಟ್ಟಿ ಹೆಂ ಸವಾಲ್ ವಿಚಾರುಂಕ್ ಪ್ರಮುಕ್ ಕಾರಣ್ ಜಾಲಿ.
ಹ್ಯೆ ಸಮೀಕ್ಶೆ ಮುಕಾಂತ್ರ್ ರಾಜ್ಯಾಚ್ಯಾ ಸರ‍್ವ್ ವರ‍್ಗಾಂಚ್ಯಾ ಆನಿ ಜಾತಿಂಚ್ಯಾ ಲೊಕಾಚೆಂ ಆರ‍್ತಿಕ್ ಸ್ಥಿತಿಗತೆಚೆಂ ಪ್ರಮಾಣ್ ಸಮ್ಜೊನ್ ಫುಡಾರಾಂತ್ ಯೆವ್ಜಣಾಂ ರುಪಿತ್ ಕರುಂಕ್ ಸಾಧ್ಯ್ ಜಾತಾ ಮ್ಹಳ್ಳಿ ಆಶಾ ಸರ‍್ಕಾರಾಚಿ.
ಪುಣ್ ಕರ‍್ನಾಟಕ್ ರಾಜ್ಯಾಂತ್ ಹ್ಯೆ ದಿಶೆನ್ ಎದೊಳ್ ಚಲ್‌ಲ್ಲಿಂ ಸರ‍್ವ್ ಪ್ರೇತನಾಂ ನಿರ‍್ಫಳ್ ಜಾಲ್ಯಾಂತ್. ಮಿಲ್ಲರ್ ವರ‍್ದೆಥಾವ್ನ್ ಆಯ್ಲೆವಾರ್ ಚಲ್‌ಲ್ಲ್ಯಾ ಕಾಂತರಾಜು ವರ‍್ದೆ ಪರ್‌ಯಾಂತ್ ಖಂಚಿಯಿ ವರ‍್ದಿ ಖರ‍್ಯಾನ್ ಅನುಶ್ಟಾನ್ ಜಾಂವ್ಕ್ ನಾ. ಪ್ರಸ್ತುತ್ ಜಾಂವ್ಚೆ ವರ‍್ದೆಕ್ ಅವ್ಕಾಸ್‌ವಾದಿ ರಾಜಕಾರಣಿಂನಿ ದಿಂವ್ಚಿ ಅಡ್ಕಳ್ ಪಳೆತಾನಾ ಹಿ ಸಮೀಕ್ಶಾಯಿ ನಿರೀಕ್ಶಿತ್ ಫಳ್ ದೀತ್ ಮ್ಹಳ್ಳೊ ಭರ‍್ವಸೊ ದಿಸೊನ್ ಯೇನಾ.
ಮಿಲ್ಲರ್ ವರ‍್ದಿ ಯೆತಾನಾ ಮಯ್ಸೂರ್ ಸಂಸ್ಥಾನಾಚೊ ದಿವಾನ್ ಜಾವ್ನಾಸ್‌ಲ್ಲ್ಯಾ ಸರ್ ಎಂ. ವಿಶ್ವೇಶ್ವರಯ್ಯಾನ್ ಆಪ್ಲ್ಯಾ ಹುದ್ದ್ಯಾಕ್ ರಾಜೀನಾಮೊ ದಿಲೊ. ಹೆ ವರ‍್ದೆಕ್‌ಯಿ ವಯ್ಲ್ಯಾ ಜಾತಿಚ್ಯಾ ಲೊಕಾಚೆಂ ಪ್ರತಿಭಟನ್ ಆಸ್ಲ್ಯಾರೀ ಚವ್ತ್ಯಾ ಕೃಷ್ಣರಾಜ ಒಡೆಯರ್ ಹಾಂಣಿ ಮಿಲ್ಲರ್ ವರ‍್ದೆಕ್ ಆದ್ಯತಾ ದಿಲ್ಲಿ. ಕರ‍್ನಾಟಕಾಚೊ ದುಸ್ರೊ ಪಾಟಿಂ ಉರ‍್ಲಲ್ಯಾ ವರ‍್ಗಾಂಚೊ ಆಯೋಗ್ ಮ್ಹಣ್ ನಾಂವಾಡ್‌ಲ್ಲ್ಯಾ ವೆಂಕಟಸ್ವಾಮಿ ಆಯೋಗಾಕ್‌ಯಿ ರಾಜಕೀಯ್ ವಿರೋಧ್ಪಣಾವರ‍್ವಿಂ ರಾಮಕೃಷ್ಣ ಹೆಗಡೆ ಸರ‍್ಕಾರಾನ್ ಪುರಸ್ಕಾರ್ ದೀಂವ್ಕ್ ನಾ.
1960ವ್ಯಾ ವರ‍್ಸಾ ಡಾ| ನಾಗನಗೌಡ ಅಧ್ಯಕ್ಶ್‌ಪಣಾರ್ ಪಾಟಿಂ ಉರ‍್ಲಲ್ಯಾ ವರ‍್ಗಾಂಕ್ ಮೀಸಲಾತ್ ಲಾಬಂವ್ಚ್ಯಾ ನಿರ‍್ಣಯಾಕ್ ಸಮಿತಿ ರಚ್‌ಲ್ಲಿ. ಒಟ್ಟು 399 ಜಾತಿ ಮೀಸಲಾತೆಕ್ ಫಾವೊ ಮ್ಹಣ್ ಸಮಿತಿನ್ ಅಭಿಪ್ರಾಯ್ ದಿಲ್ಲಿ. ಶಿಕ್ಶಣಾಂತ್ ೫೦% ಆನಿ ಸರ‍್ಕಾರಿ ಕಾಮಾಂತ್ 45% ಮೀಸಲಾತ್ ಹ್ಯಾ ಜಾತಿಂಕ್ ದೀಜೆಮ್ಹಣ್ ಸಲಹಾ ದಿಲ್ಲಿ. ಸರ‍್ಕಾರಾನ್ ಪಾಟಿಂ ಉರ‍್ಲಲೆ ವರ‍್ಗ್ ಆನಿ ಬೋವ್ ಪಾಟಿಂ ಉರ‍್ಲಲೆ ವರ‍್ಗ್ ಮ್ಹಣ್ ವಾಂಟೆ ಕರ‍್ನ್ ಕ್ರಮಾನ್ 28% ಆನಿ 22% ಮೀಸಲಾತ್ ದಿಲ್ಲಿ. ಪುಣ್ ತಿ ಸುಪ್ರೀಂ ಕೊಡ್ತಿನ್ ತಿರಸ್ಕಾರ್ ಕೆಲಿ.
1970ವ್ಯಾ ಧಾಕ್ಡ್ಯಾಂತ್ ದೇವರಾಜ ಅರಸು ಮುಕೆಲ್ ಮಂತ್ರಿ ಜಾಲ್ಲೆ ತವಳ್ ದುಬ್ಳ್ಯಾ-ಧಾಕ್ಟ್ಯಾಂಕ್ ತಾಣೆಂ ಬೋವ್ ಚಡ್ ಅನ್ಕುಲ್ ಕರ‍್ನ್ ದಿಲೆಂ. ಪಾಟಿಂ ಉರ‍್ಲಲ್ಯಾ ಜಾತಿಚ್ಯಾ ಜಾಯ್ತ್ಯಾ ಯುವಜಣಾಂಕ್ ಅಧಿಕಾರ್ ದಿವಯ್ಲೊ. ಪಾಟಿಂ ಉರ‍್ಲಲ್ಯಾ ಜಾತಿಂಚ್ಯಾ ಲೊಕಾಕ್ ಅಧಿಕಾರ್ ದಿಂವ್ಚೆಂ ಪ್ರಜಾಪ್ರಭುತ್ವಾಕ್ ಮೊಲ್ ದಿಲ್ಲೆಬರಿ ಮ್ಹಳ್ಳೆಂ ತಾಚೆಂ ಚಿಂತಪ್ ನೀಜ್ ಅರ‍್ತಾನ್ ಸಮಾಜಿಕ್ ನ್ಯಾಯಾಚೆಂ ಪರಿಕಲ್ಪನ್ ಜ್ಯಾರಿಯೆಕ್ ಹಾಡುಂಕ್ ಕಾರಣ್ ಜಾಲ್ಲೆಂ ಆಮಿ ಆಜೂನ್ ಜಾಣಾಂವ್.
1972ವ್ಯಾ ವರ‍್ಸಾ ದೇವರಾಜ ಅರಸುನ್ ಎಲ್.ಜಿ ಹಾವನೂರು ಆಯೋಗ್ ರಚ್ಲೊ. ಪಾಟಿಂ ಉರ‍್ಲಲ್ಯಾ ವರ‍್ಗಾಂಚಿ ಮೀಸಲಾತ್ ಆನಿ ಹೆರ್ ವಿಶಯಾಂಚೆರ್ ಅಧ್ಯಯನ್ ಚಲಯಿಲ್ಲ್ಯಾ ಹ್ಯಾ ಆಯೋಗಾನ್ 1975ವ್ಯಾ ವರ‍್ಸಾ ವರ‍್ದಿ ದಿಲ್ಲಿ. ಹಾಂತುಂ ಕ್ರಿಸ್ತಾಂವ್, ವೀರಶೈವ, ಲಿಂಗಾಯತ್, ಬಂಟ, ಅರಸು ಸಮುದಾಯಾಂಕ್ ಪಟ್ಟೆಥಾವ್ನ್ ಭಾಯ್ರ್ ದವರ್‌ಲ್ಲೆಂ. ಹ್ಯಾ ಬಳ್ವಂತ್ ಜಾತಿಂಚ್ಯಾ ವಿರೋಧ್ಪಣಾವರ‍್ವಿಂ ತಿ ವರ‍್ದಿ ದೋನ್ ವರ‍್ಸಾಂ ಜ್ಯಾರಿಯೆಕ್ ಆಯ್ಲಿನಾ. ದೆಶಾಂತ್ ತುರ‍್ತ್ ಪರಿಸ್ಥಿತಿ ಜ್ಯಾರಿ ಜಾಲ್ಲ್ಯಾ ಸಂದರ‍್ಬಾರ್ ೧೯೭೭ವ್ಯಾ ವರ‍್ಸಾ ಸರ‍್ಕಾರಾನ್ ಹಾವನೂರು ವರ‍್ದಿ ಜ್ಯಾರಿಯೆಕ್ ಹಾಡ್ಲಿ. ಆಪ್ಲ್ಯಾ ಅರಸು ವರ‍್ಗಾಕ್ ಪಟ್ಟೆಂತ್ ಭರ‍್ತಿ ಕರ‍್ನ್, ವೆವೆಗ್ಳ್ಯಾ ಸಮುದಾಯಾಂಚ್ಯಾ ದುಬ್ಳ್ಯಾಂಕ್ ವಿಶೇಸ್ ಪಂಗಡ್ ಮ್ಹಣ್ ಲೆಕುನ್ ೫% ಮೀಸಲಾತ್ ದಿಲಿ. ತಿ ವರ‍್ದಿಯಿ ಕೊಡ್ತಿಚಿಂ ಮೆಟಾಂ ಚಡ್ಲಿ.
ಉಪ್ರಾಂತ್ ಆಯಿಲ್ಲಿ ವೆಂಕಟಸ್ವಾಮಿ ಆಯೋಗ್, ಚಿನ್ನಪ್ಪ ರೆಡ್ಡಿ ಆಯೋಗ್ ಆನಿ ಕಾಂತರಾಜು ಆಯೋಗಾಚಿ ವರ‍್ದಿಯಿ ಸಮರ‍್ಪಕ್ ರಿತಿರ್ ಜ್ಯಾರಿಯೆಕ್ ಹಾಡುಂಕ್ ಸಾಧ್ಯ್ ಜಾಂವ್ಕ್ ನಾ.
ಆಯ್ಚ್ಯಾ ರಾಜಕಾರಣಿಂಕ್ ಜಾತ್ಚ್ ಸರ‍್ವಸ್ವ್. ಚುನಾವಾಚಿ ಟಿಕೆಟ್ ಜೊಡುಂಕ್, ನಿಗಮ-ಮಂಡಳೆಂಕ್ ವಿಂಚವ್ಣ್ ಜೊಡುಂಕ್, ಮಂತ್ರಿ ಪದ್ವಿ ಜೊಡುಂಕ್... ತಿತ್ಲೆಂ ಮಾತ್ರ್ ಕಿತ್ಯಾಕ್ ಆಪ್ಣೆಂ ಕೆಲ್ಲೊ ಆರೋಪ್ ನಿರಾಕರಣ್ ಕರುಂಕ್‌ಯಿ ಜಾತ್ ಏಕ್ ಬಳ್ವಂತ್ ಹಾತೆರ್ ಜಾಲಾಂ. ಸಮಾಜಿಕ್ ಮುಕೆಲ್ಯಾಂಕ್‌ಯಿ ತಶೆಂಚ್. ತೆಂ ಆಪ್ಲ್ಯಾ ಅಸ್ಮಿತಾಯೆಚೆಂ ಸವಾಲ್. ಜಾತಿಚ್ಯಾ ನಾಂವಾನ್ ಜಾಂವ್ಚಿಂ ಅನಿಶ್ಟಾಂ ನಿವಾರಿಜೆ ತರ್ ಜಾತ್ಚ್ ಉಲ್ಲೇಕ್ ಜಾಂವ್ಕ್ ನಜೊ ಮ್ಹಣ್ ಚಿಂತ್ಚ್ಯಾ ಹ್ಯಾ ಕಾಳಾರ್ ಜಾತ್ ಆಮ್ಚಿ ಅಸ್ಮಿತಾಯ್. ಸರ‍್ವಾಂ ಧಯ್ರಾನ್ ತುಮ್ಚಿ ಜಾತ್ ಉಚಾರಾ ಮ್ಹಣ್ ಆಪ್ಲ್ಯಾ ಸಮುದಾಯಾಕ್ ಉಲೊ ದಿತಾತ್.
ಅಹಿಂದ ಆನಿ ಅಲ್ಪಸಂಕ್ಯಾತ್ ವರ‍್ಗ್ ಚಡಿತ್ ಸಂಕ್ಯಾನ್ ಆಸ್ಲ್ಯಾರ್ ಆಪ್ಣಾಕ್ ಲಾಭ್ ಮ್ಹಣ್ ಕೊಂಗ್ರೆಸಾನ್ ಚಿಂತ್ಲ್ಯಾರ್, ಲಿಂಗಾಯತ್ ಪ್ರತ್ಯೇಕ್ ಧರ‍್ಮ್ ಮ್ಹಣ್ ಪ್ರಚಾರ್ ಜಾಲ್ಯಾರ್ ಹಿಂದ್ವಾಂಚೊ ಸಂಕೊ ಉಣೊ ಜಾವ್ನ್ ಆಪ್ಣಾಕ್ ಅಪಾಯ್ ಮ್ಹಣ್ ಬಿಜೆಪಿ ಭಿಯೆತಾ. ಹ್ಯಾ ಸರ‍್ವ್ ಪಾಟಿಥಳಾರ್ ಪಳೆತಾನಾ ಆತಾಂ ಚಲ್‌ಲ್ಲಿ ವರ‍್ದಿ ಅನುಶ್ಟಾನಾಕ್ ಯೇತ್‌ಗೀ ಮ್ಹಳ್ಳೊ ದುಬಾವ್ ಜಾತಾ. ‘ಜಾತಿ’ಚೊ ಗೊಂಗೊ ಆಮ್ಚ್ಯಾ ರಾಜ್ಯಾಕ್ ಕೆದ್ಯಾ ವ್ಹಡ್ ಪ್ರಮಾಣಾರ್ ಧೊಸ್ತಾ ಮ್ಹಳ್ಳ್ಯಾಚೊ ಅಂದಾಜ್ ಹಿ ಸಮೀಕ್ಶಾ ಸುರು ಕರ‍್ಚೆಆದಿಂಚ್ ಜಾಲಾ.
ಜಾತಿಚ್ಯಾ ನಾಂವಾನ್ ಸಮಾಜಿಕ್ ಅಸಮಾನತಾ, ಶೋಶಣ್, ಭೇದ್-ಭಾವ್, ಹಿಂಸಾ ಆನಿ ನಾಗರಿಕ್ ಸಮಾಜೆಕ್ ಲಜೆಕ್ ಘಾಲ್ಚೆ ಕ್ರೂರ್ ಸಂಪ್ರದಾಯ್ ಹ್ಯಾ ದೆಶಾಚ್ಯಾ ಚಡಾವತ್ ಲೊಕಾಮಧೆಂ ಆಜೂನ್ ಜಿವೆಚ್ ಉರ‍್ಲ್ಯಾತ್. ದೆಶಾಕ್ ಪರ‍್ದೆಶಾಂಥಾವ್ನ್ ಸುಟ್ಕಾ ಲಾಬೊನ್ ಸಾತ್ ಧಾಕ್ಡೆ ಉಬೊನ್ ಗೆಲ್ಯಾರೀ, ತಾಂತ್ರಿಕ್ ಪ್ರಗತಿ ಉಂಚಾಯೆಕ್ ಪಾವ್ಲ್ಯಾರೀ ಹ್ಯಾ ಅನಿಶ್ಟ್ ಸಂಪ್ರದಾಯಾಚಿಂ ಪಾಳಾಂ ಆಜೂನ್ ಹ್ಯೆ ಸಮಾಜೆಂತ್ ರೊಂಬೊನ್‌ಚ್ ಉರ‍್ಲ್ಯಾಂತ್ ಮ್ಹಳ್ಳ್ಯಾಕ್ ಆಯ್ಲೆವಾರ‍್ಚ್ಯಾ ದಿಸಾಂನಿ ‘ಜಾತಿ’ಕ್ ಲಾಗೊನ್ ಚಲ್ಚಿ ಚರ‍್ಚಾ ವಾಚ್ತಾನಾ/ಪಳೆತಾನಾ ಕಳ್ತಾ.
ಎಕಾ ಕಾಳಾರ್ ಸಮಾಜಿಕ್ ಸಮಾನತಾ ಜೊಡುಂಕ್ ಹಿಂದೂ ಧರ‍್ಮಾಚ್ಯಾ ಸಕಯ್ಲ್ಯಾ ವರ‍್ಗಾಚ್ಯಾ ಲೊಕಾಕ್ ಜಾತ್ ನಾಕಾ ಆಸ್‌ಲ್ಲಿ. ತಾಂತ್ಲ್ಯಾನ್ ಸುಟ್ಕಾ ಜೊಡುನ್ ಗವ್ರವಾಚೆಂ ಜಿವಿತ್ ಆಪ್ಣಾಂವ್ಚ್ಯಾ ಇರಾದ್ಯಾನ್ ಜಾಯ್ತೆ ದಲಿತ್ ಆನಿ ಪಾಟಿಂ ಉರ‍್ಲಲ್ಯಾ ಜಾತಿಂಚೊ ಲೋಕ್ ಕ್ರಿಸ್ತಾಂವ್, ಇಸ್ಲಾಂ ಆನಿ ಬೌದ್ಧ್ ಧರ‍್ಮಾಂಕ್ ಮತಾಂತರ್ ಜಾಲೊ. ಥೊಡ್ಯಾಂಕ್ ತಾಂಣಿ ಅಪೇಕ್ಶಿಲ್ಲೆಂ ಬರೆಂ ಜಿವಿತ್ ಮೆಳ್ಳೆಂ. ಪುಣ್ ಆರ‍್ತಿಕ್ ರಿತಿನ್ ಪಾಟಿಂ ಉರ‍್ಲಲ್ಯಾ ದಲಿತ್ ಆನಿ ಹೆರ್ ಸಕಯ್ಲ್ಯಾ ಜಾತಿಂಚ್ಯಾ ಲೊಕಾಕ್ ಮತಾಂತರ್ ಜಾಲ್ಯಾರಿ ಜಿಣ್ಯೆಮಟ್ಟ್ ಸುಧ್ರಾಂವ್ಕ್ ಸಾಧ್ಯ್ ಜಾಂವ್ಕ್‌ಚ್ ನಾ.
ದ.ಕ., ಉಡುಪಿ, ಚಿಕ್‌ಮಗ್ಳುರ್, ಕಾರ್‌ವಾರ್, ಬೆಂಗ್ಳುರ್, ಮೈಸೂರ್ ತಸಲ್ಯಾ ವ್ಹಡ್ ಶ್ಹೆರಾಂನಿ ವಸ್ತಿ ಕರ‍್ಚಿಂ ಚಡಾವತ್ ಕ್ರಿಸ್ತಾಂವಾಂ ಬರೆಂ ಶಿಕಪ್, ಆರ‍್ತಿಕ್ ಭದ್ರತಿ, ಸಮಾಜಿಕ್ ಸ್ಥಾನ್‌ಮಾನ್ ಜೋಡ್ನ್ ಆಪ್ಲೆಂ ಜಿಣ್ಯೆಮಟ್ಟ್ ಸುಧ್ರಾಂವ್ಕ್ ಪಾವ್ಲ್ಯಾಂತ್. ಪುಣ್ ಕರ‍್ನಾಟಕ್ ರಾಜ್ಯಾಚ್ಯಾ ಹೆರ್ ಜಿಲ್ಲ್ಯಾಂಚ್ಯಾ ಕ್ರಿಸ್ತಾಂವಾಂಚಿ ಪರಿಗತ್ ತಶಿ ನಾ. ಬೀದರ್, ಗುಲ್ಬರ್ಗಾ, ರಾಯಚೂರ್ ಇತ್ಯಾದಿ ಜಿಲ್ಲ್ಯಾಂನಿ ಜಿಯೆಂವ್ಚಿಂ ಕ್ರಿಸ್ತಾಂವಾಂ ಆಜೂನ್ ಆರ‍್ತಿಕ್ ರಿತಿರ್ ಪಾಟಿಂ ಆಸಾತ್. ‘ದಲಿತ್ ಕ್ರಿಸ್ತಾಂವ್’ ಮ್ಹಳ್ಳೊ ಬಿಲ್ಲೊ ಆಜೂನ್ ಲಾಗವ್ನ್ ಘೆತ್‌ಲ್ಲಿಂ ಕ್ರಿಸ್ತಾಂವಾಂ ಆಜೂನ್ ಸಮುದಾಯಾಚ್ಯಾ ಪ್ರಮುಕ್‌ವ್ಹಾಳ್ಯಾಂತ್ ಏಕ್ ಜಾಂವ್ಕ್ ಸಕನಾಸ್ತಾಂ ಕಾಯ್ಲಿಥಾವ್ನ್ ಉಜ್ಯಾಕ್ ಪಡ್‌ಲ್ಲೆ ಭಾಶೆನ್ ಚಡ್ಪಡ್ತಾತ್.
ದಲಿತ್ ಕ್ರಿಸ್ತಾಂವಾಂಕ್ ತಶೆಂಚ್ ಪಾಟಿಂ ಉರ‍್ಲಲ್ಯಾ ಜಾತಿಂಥಾವ್ನ್ ಕ್ರಿಸ್ತಾಂವ್ ಧರ‍್ಮಾಕ್ ಆಯಿಲ್ಲ್ಯಾಂಕ್ ಸರ‍್ಕಾರಾಥಾವ್ನ್ ಮೆಳಜೆ ಜಾಲ್ಲ್ಯೊ ಸವ್ಲತಾಯೊ ಮೆಳನಾಂತ್. ಹ್ಯಾ ಖಾತಿರ್ ಧಾಕ್ಡ್ಯಾಂಥಾವ್ನ್ ಆಂದೋಲನಾಂ ಚಲೊನ್ ಆಯ್ಲ್ಯಾಂತ್. ಜಾಯ್ತೆ ವ್ಯಾಜ್ಯ್ ಕೊಡ್ತಿಂನಿ ಇತ್ಯರ‍್ತ್ ಜಾಯ್ನಾಸ್ತಾಂ ಉರ‍್ಲ್ಯಾತ್.
ಸ್ವಖುಶೆಚೆಂ ಮತಾಂತರ್ ಸಂವಿಧಾನಾನ್ ದಿಲ್ಲೆಂ ಮುಳಾವೆಂ ಹಕ್ಕ್. ಆಪ್ಲೆ ಸ್ವಂತ್ ಖುಶೆನ್ ಕೊಣೆಂಯಿ, ಖಂಚೊಯಿ ಧರ‍್ಮ್ ಆಪ್ಣಾವ್ಯೆತ್. ಪುಣ್ ಸರ‍್ವ್ ಧರ‍್ಮಾಂತ್ಲಿಂ ಕೋಮುವಾದಿ ಸಂಘಟನಾಂ, ಥೊಡ್ಯೊ ರಾಜಕೀಯ್ ಪಾಡ್ತಿ ಮತಾಂತರಾಚೊ ಗೊಂಗೊ ದಾಕವ್ನ್ ಸಮಾಜೆಂತ್ ಅಶಾಂತಿ ಉಬ್ಜಾಯ್ತಾತ್. ಹಾಕಾ ಪೂರಕ್ ಜಾವ್ನ್ ಮ್ಹಳ್ಳೆಬರಿ ಕ್ರಿಸ್ತಾಂವ್ ಆನಿ ಮುಸ್ಲಿಂ ಧರ‍್ಮಾಂತ್ಲೆ ಧರ‍್ಮಾಂಧ್ಳೆ ಪಂಗಡ್ ಭುಲವ್ಣ್ಯಾಚೆಂ ಮತಾಂತರ್ ಕರ‍್ನ್ ಕುಟ್ಮಾಂ ತೀನ್ ತಿರ‍್ಕುಟ್ ಕರ‍್ತಾತ್ ಆನಿ ಉಜ್ಯಾಕ್ ತೇಲ್ ವೊತ್ತಾತ್.
ಭಾರತಾಚೆ ಕ್ರಿಸ್ತಾಂವ್ ಆಪ್ಲ್ಯಾ ಮೂಳ್ ಧರ‍್ಮಾಚೆ ವಾಂಟೆ-ಫಾಂಟೆ, ಜಾತ್-ಕುಳಿ ಸೊಡುನ್ ಕ್ರಿಸ್ತಾಂವ್ಪಣಾಕ್ ವೆಂಗುಂಕ್ ಲಾಗ್ಲ್ಯಾತ್. ಶತಮಾನಾಂಥಾವ್ನ್ ಚಲೊನ್ ಆಯಿಲ್ಲಿ ಜಾತಿ-ಕುಳಿಯೆಚಿ ವೆವಸ್ತಾ ಎಕ್‌ಚ್ ಪಾವ್ಟಿಂ ನ್ಹಯ್ ತರೀ ವರ‍್ಸಾಂ ಪಾಶಾರ್ ಜಾಲ್ಲೆಬರಿ ಥೊಡಿ ಥೊಡಿಚ್ ಆಳ್ವೊನ್ ಆಯ್ಲ್ಯಾ. ಆಮ್ಚ್ಯಾ ಸಮೊಡ್ತಿಚಿಂ ತತ್ವಾಂ ಆನಿ ಧರ‍್ಮಿಕಾಂಚಿ ಶಿಕವ್ಣ್ ಸಮಾನತೆಚ್ಯಾ ಸಂಸಾರಾಕ್ ಪಾವಂವ್ಕ್ ಕಾರಣ್ ಜಾಲಾ ಮ್ಹಣ್ಯೆತ್.
ಅಸಲೆ ಪರಿಗತೆಂತ್ ಕ್ರಿಸ್ತಾಂವಾಂ ಮಧೆಂ ಇತ್ಲ್ಯೊ ಜಾತಿ ಖಂಯ್‌ಥಾವ್ನ್ ಆಯ್ಲ್ಯೊ? ಕ್ರಿಸ್ತಾಂವಾಂ ಮಧೆಂ ಮತಾಂತರ್ ನಾ ಮ್ಹಣ್ ವಾದ್ ಕರ‍್ಚ್ಯಾ ಹ್ಯಾ ಸಂದರ‍್ಬಾರ್ ಸರ‍್ಕಾರಾನ್ ಹಿಂದೂ ಸಮುದಾಯಾಂತ್ಲ್ಯಾ ಇತ್ಲ್ಯಾ ಜಾತಿಂಮುಕಾರ್ ಕ್ರಿಸ್ತಾಂವ್ ಬಿಲ್ಲೊ ಥಾಪುನ್ ಮತಾಂತರ್ ಮ್ಹಳ್ಳೊ ಗೊಂಗೊ ರಚುನ್ ದಿಲಾ?
‘ಆಮ್ಚೆ ಮಧೆಂ ಗರ‍್ಜೆವಂತ್ ಮ್ಹಳ್ಳೊ ಕೊಣ್‌ಯಿ ಆಸನಾಯೆ’ ಮ್ಹಳ್ಳೆಂ ತತ್ವ್ ಪಾಳ್ಚೊ ಸಮುದಾಯ್ ಆಮ್ಚೊ. ಪುಣ್ ತರೀ ಆಮ್ಚೆಮಧೆಂ ಅಶೆಂ ಕಶೆಂ? ಅಸಲ್ಯಾ ಗರ‍್ಜೆವಂತಾಂಕ್ ಆಮ್ಚ್ಯಾ ಸಮುದಾಯಾಭಿತರ್ ಲಾಬ್ಚ್ಯೊ ಸವ್ಲತಾಯೊ ಕಸಲ್ಯೊ? ಅನಿಶ್ಟ್ ಜಾತಿ ವೆವಸ್ತಾ ವಿರೋಧ್ ಕರ‍್ಚೆ ಆಮಿ ತಸಲಿಂ ನಾಂವಾಂ ಆಮ್ಚೆಭಿತರ್ ಆಟಾಪುಂಕ್ ಕಿತ್ಯಾಕ್ ಸೊಧ್ತಾಂವ್? ಸಮಾನತೆಚ್ಯಾ ವಿಶಾಲ್ ಜಿಣ್ಯೆವೆವಸ್ತೆಕ್ ಫುಡ್ ಕರ‍್ನ್ ವೆಚೆ ಆಮಿ ಆಜೂನ್ ಜಾತಿ ಆಮ್ಚೆಭಿತರ್ ಜಿವಂತ್ ದವರುಂಕ್ ಆಶೆತಾಂವ್?
ಸರ‍್ಕಾರಾನ್ ದಿಂವ್ಚ್ಯಾ ಸವ್ಲತಾಯೆಂಖಾತಿರ್ ಸ್ವಾಭಿಮಾನ್ ಹೊಗ್ಡಾವ್ನ್ ಜಾತಿವೆವಸ್ತಾ ಪರತ್ ಜಿವಾಳ್ ಕರ‍್ಚೆಂ ಸಾರ‍್ಕೆಂ? ಅಸಲಿಂ ಸವಾಲಾಂ ಜಾಪಿ ನಾಸ್ತಾಂ ಆಜೂನ್ ಉರ‍್ಲ್ಯಾಂತ್.
ವಿಲ್‌ಫ್ರೆಡ್ ಲೋಬೊ, ಪಡೀಲ್