ಕಥೊಲಿಕ್ ಸಭೆಚಿ ಖಬರ್ ಪ್ರಸಾರ್ ಕರ‍್ಚ್ಯಾಕ್ ’ಸಂದೇಶ್’ ಮ್ಹಳ್ಳೆಂ ಪತ್ರ್ 5.08.1979ವೆರ್ ಪ್ರಗಟ್ ಕೆಲೆಂ. ದುಸ್ರೊ ಅಂಕೊ 1.11.1979ªವೆರ್ ಪರ‍್ಗಟ್ಲೊ. ಉಪ್ರಾಂತ್ ನವೆಂಬ್ರ್ 1980, ಜನೆರ್ 1982, ಜುಲಾಯ್ 1983, ಮಾರ‍್ಚ್ 1984 ಅಶೆಂ ಸಂದರ‍್ಬಾನುಸರ್ ಪತ್ರ್ ಪರ‍್ಗಟ್ ಜಾಲೆಂ. ಸುರ‍್ವಿಲೆ ಅಂಕೆ ಸಾಕ್ಲೊಸ್ಟಾಯ್ಲ್ ಉಪ್ರಾಂತ್ 1/8 ಡೆಮಿ ಆಕಾರಾರ್ ಚಾರ್ ಥಾವ್ನ್ ಆಟ್ ಪಾನಾಂನಿ ಪರ‍್ಗಟ್ ಜಾತಾಲೆ. ತಾಕಾ ವರ‍್ಗಣಿ ಮ್ಹಣ್ ನಾತ್‌ಲ್ಲಿ. ಮಹಿನ್ಯಾಚ್ಯಾ ಜಮಾತೆಕ್ ಹಾಜರ್ ಜಾಲ್ಲೆ ಸಾಂದೆ ವಂತಿಗಿ ಘಾಲ್ನ್ ಪ್ರೆಸ್ಸಾಚೊ ಆನಿ ಪೊಸ್ಟಾಚೊ ಖರ‍್ಚ್ ಪಳೆತಾಲೆ. ಫ್ರಾನ್ಸಿಸ್ ದಾಂತಿ ಹ್ಯಾ ಪತ್ರಾಚೊ ಸಂಪಾದಕ್ ಜಾವ್ನ್ ಆಸ್‌ಲ್ಲೊ. ವರ‍್ಸಾಕ್ ಏಕ್ ಯಾ ದೋನ್ ಅಂಕೆ ಪರ‍್ಗಟ್ ಜಾತಾಲೆ.
1986 ಇಸ್ವೆಂತ್ ’ಸಂದೇಶ್’ ಪತ್ರಾಕ್ ರಿಜಿಸ್ಟ್ರಾರ್ ಆಫ್ ನ್ಯೂಸ್ ಆಫ್ ಇಂಡಿಯಾ ಹಾಚೆಲಾಗಿಂ ರಿಜಿಸ್ಟ್ರೇಶನಾಕ್ ಬರಯ್ತಾನಾ, ಪತ್ರಾಚೆಂ ನಾಂವ್ ’ಆಮ್ಚೊ ಸಂದೇಶ್’ ಮ್ಹಣ್ ಸ್ವೀಕಾರ್ ಕರಿಜೆ ಪಡ್ಲೆಂ. 08.1೦.1989ವೆರ್ ಸಂದೇಶ್ ಸಂಪಾದಕೀಯ್ ಮಂಡಳಿ ಪುನರ್‌ರಚಿತ್ ಜಾಲಿ. ಮಾನೆಸ್ತ್ ಲುವಿಸ್ ಅಲ್ಮೇಡಾ ಸಂಪಾದಕ್ ಆನಿ ಮಾನೆಸ್ತ್ ಡೆನಿಸ್ ಡಿಸಿಲ್ವಾ ಸಂಚಾಲಕ್ ಮ್ಹಣ್ ನೇಮಕ್ ಜಾಲೆ.
ಹೆರ್ ಸಾಂದೆ: ಮಾ| ಬಾ| ಸ್ಟೆನ್ಲಿ ಪಿರೇರಾ, ಬಿ.ವಿ. ಪಿಂಟೊ, ಜೆ. ಎಲ್. ಡಿಲೀಮಾ, ಜೆರಾಲ್ಡ್ ಪಿಂಟೊ, ಎಚ್. ಆರ್. ಆಳ್ವಾ, ವಾಲ್ಟರ್ ಸಿರಿಲ್ ಪಿಂಟೊ ಆನಿ ಆರ್ಚಿಬಾಲ್ಡ್ ಡಿಸೋಜ. 1992 ನವೆಂಬ್ರ್ ಮಹಿನ್ಯಾಥಾವ್ನ್ ಲುವಿಸ್ ಅಲ್ಮೇಡಾಚ್ಯಾ ಸಂಪಾದಕ್ಪಣಾಖಾಲ್ ಪತ್ರ್ ಮಹಿನ್ಯಾಳೆಂ ಜಾಲೆಂ. 22.02.1993ವೆರ್ ಭಿಸ್ಪಾಚ್ಯಾ ನಿವಾಸಾಂತ್ ಆದ್ಲೊ ಭಿಸ್ಪ್ ಅ| ಮಾ| ದೊ| ಬಾಜಿಲ್ ಸಾಲ್ವದೊರ್ ಸೊಜಾನ್, ಮಹಿನ್ಯಾಳೊ ’ಆಮ್ಚೊ ಸಂದೇಶ್’ ಅಧಿಕೃತ್ ಥರಾನ್ ಉಗ್ತಾವಣ್ ಕೆಲೊ. 1994 ಇಸ್ವೆಂತ್ ಪತ್ರ್ RNI 61446/96 ನಂಬ್ರಾಖಾಲ್ ರಿಜಿಸ್ಟರ್ ಜಾಲೆಂ ಆನಿ ರಿಯಾಯ್ತಿ ದರಿರ್ ಪೋಸ್ಟ್ ಕರುಂಕ್ ಪರ‍್ವಣ್ಗಿ ಲಾಬ್ಲಿ.
ಮಾನೆಸ್ತ್ ಲುವಿಸ್ ಅಲ್ಮೇಡಾನ್ (೧೯೮೯-೧೯೯೬) ಪರ‍್ಯಾಂತ್ ವಿನ್ಸೆಂಟ್ ಆಳ್ವಾ (೧೯೯೬-೯೮), ರೇಮಂಡ್ ಡಿಕುನ್ಹಾ (೧೯೯೮-೨೦೦೦), ಲಿಯೊ ಡಿಸೋಜ (೨೦೦೩-೨೦೦೫), ಡಾ| ಜೆರಾಲ್ಡ್ ಪಿಂಟೊ (೨೦೦೦-೦೩, ೨೦೦೬-೦೮), ಪೀಟರ್ ಜೆರಿ ರೊಡ್ರಿಗಸ್ (೨೦೦೫-೦೬), ಜೋರ‍್ಜ್ ಲಿಗೊರಿ ಡಿಸೋಜಾ (೨೦೦೯-೨೦೧೧), ವಿಲ್‌ಫ್ರೆಡ್ ಲೋಬೊ ಪಡೀಲ್ (೨೦೧೨- ಆತಾಂ ಪರ‍್ಯಾಂತ್) ಸಂಪಾದಕ್ ಜಾವ್ನ್ ಸೆವಾ ದಿಲ್ಯಾ. ಸಂಚಾಲಕ್ ಜಾವ್ನ್ ಡೆನಿಸ್ ಡಿಸಿಲ್ವಾ (೧೯೯೨-೯೮), ಎಲ್. ಜೆ. ಫೆರ‍್ನಾಂಡಿಸ್ (೧೯೯೮-೨೦೦೨), ಆಲ್ಫೋನ್ಸ್ ಡಿಕೋಸ್ತಾ (೨೦೦೨-೦೩) ಹಾಂಣಿ ವಾವ್ರ್ ದಿಲಾ. ರೇಮಂಡ್ ಎಲ್ಯಾಸ್ ರೆಬೆಲ್ಲೊ, ಲುವಿಸ್ ಅಲ್ಮೇಡಾ, ಡಾ| ಜೆರಾಲ್ಡ್ ಪಿಂಟೊ, ಮಾರ‍್ಟಿನ್ ಡಿಸೋಜ, ಜೋರ‍್ಜ್ ಲಿಗೋರಿ ಡಿಸೋಜ, ವಿಲ್‌ಫ್ರೆಡ್ ಲೋಬೊ ಪಡೀಲ್, ರಿಚ್ಚಿ ಜೋನ್ ಪಾಯ್ಸ್ ರುಜಾಯ್ ಹಾಂಣಿ ಸಹಸಂಪಾದಕ್ ಜಾವ್ನ್ ಸೆವಾ ದಿಲ್ಯಾ. ಕಥೊಲಿಕ್ ಸಭೆಚೆ ಅಧ್ಯಕ್ಷ್ ಹ್ಯಾ ಪತ್ರಾಚೆ ಪ್ರಕಾಶಕ್. ಪ್ರಸ್ತುತ್ ಕ. ಸಭಾ ಮಂಗ್ಳುರ್ ಪ್ರದೇಶ್ ಹಾಚೊ ಅಧ್ಯಕ್ಷ್ ಮಾನೆಸ್ತ್ ಅನಿಲ್ ಲೋಬೊ ಪ್ರಕಾಶಕ್ ಜಾವ್ನ್ ಆಪ್ಲಿ ಸೆವಾ ದಿತಾ. ಕ. ಸಭಾ ಮಾಜಿ ಅಧ್ಯಕ್ಷ್ ಎಲ್‌ರೊಯ್ ಕಿರಣ್ ಕ್ರಾಸ್ತೊ ಸಂಚಾಲಕ್ ಜಾವ್ನ್ ಖಳ್ಮಿತ್ ನಾತ್‌ಲ್ಲಿ ಸೆವಾ ದಿತಾ.
ಪಾಟ್ಲ್ಯಾ ಥೊಡ್ಯಾ ವರ‍್ಸಾಂಥಾವ್ನ್ ’ಆಮ್ಚೊ ಸಂದೇಶ್’ ಪತ್ರಾಚ್ಯಾ ಪ್ರಸಾರ್ ಸಂಕ್ಯಾಂತ್ ಚಡಿತ್ ವಾಡಾವಳ್ ಜಾಲ್ಯಾ. ದಿಯೆಸೆಜ್‌ಭರ್ ’ಪ್ರಸಾರ್ ಮಹಿನೊ’ ಅಭಿಯಾನ್ ಚಲವ್ನ್ ಚಡಿತ್ ಲೊಕಾಕ್ ಹೆಂ ಪತ್ರ್ ಮೆಳಾಶೆಂ ಕರ‍್ಚೆಂ ಪ್ರೇತನ್ ಚಲ್ಲಾಂ. ಪ್ರಸಾರ್ ಸಂಕ್ಯಾತೆಕಿದ್ ಛಾಪ್ಯಾಚೊ ಖರ‍್ಚ್‌ಯಿ ವಾಡ್‌ಲ್ಲ್ಯಾನ್ ಚಡಿತ್ ಜಾಹೀರಾತಾಂಕ್ ಅವ್ಕಾಸ್ ದಿಲಾ. ಹ್ಯಾ ವರ‍್ವಿಂ ಜಾಹೀರಾತ್‌ದಾರಾಂಕ್‌ಯಿ ಚಡಿತ್ ವಾಚ್ಪ್ಯಾಂಕ್ ಪಾವೊಂಕ್ ಸಾಧ್ಯ್ ಜಾಲಾಂ.
ಆಮ್ಚೊ ಸಂದೇಶ್ ಪತ್ರಾಚೆಂ ದಶಮಾನೋತ್ಸವ್ ಕಾರ‍್ಯೆಂ ೦೮.೧೨.೨೦೦೩ವೆರ್ ಮಂಗ್ಳುರ್ ಭಿಸ್ಪಾಚ್ಯಾ ನಿವಾಸಾಂತ್ ಆಚರಣ್ ಕೆಲೆಂ. ಮೈಸೂರ್ ವಿಶ್ವವಿದ್ಯಾನಿಲಯಾಚೊ ಪ್ರೊಫೆಸರ್ ದೊ| ಎಡ್ವರ‍್ಡ್ ನೊರೊನ್ಹಾ ಮುಕೆಲ್ ಸೈರೊ ಜಾವ್ನ್ ಆಯಿಲ್ಲೊ.
ಆಮ್ಚೊ ಸಂದೇಶ್ ಮಹಿನ್ಯಾಳ್ಯಾ ಪತ್ರಾಚೊ ದ್ವಿದಶಮಾನೋತ್ಸವ್ ಸಮಾರೋಪ್ ಸಂಭ್ರಮ್ ೨೦೧೩ ಎಪ್ರಿಲ್ ೦೭ವೆರ್ ರುಜಾಯ್ ಸಭಾ ಸಾಲ್, ಮಂಗ್ಳುರ್ ಹಾಂಗಾಸರ್ ವರ‍್ತ್ಯಾ ದಬಾಜಾನ್ ಚಲ್ಲೊ. ಮಂಗ್ಳುರ‍್ಚೊ ಗೊವ್ಳಿಬಾಪ್ ಅ|ಮಾ| ದೊ| ಲುವಿಸ್ ಪಾವ್ಲ್ ಸೊಜಾಂನಿ ಸಮಾರೋಪ್ ಕಾರ‍್ಯಾಚೆಂ ಉಗ್ತಾವಣ್ ಕೆಲೆಂ. ಮ್ಹಾಲ್ಘಡೊ ಕೊಂಕ್ಣಿ ಬರವ್ಪಿ ಫಾ| ಮುಲ್ಲರ್ ಆಸ್ಪತ್ರೆಚ್ಯಾ ಹಾಡಾಂಗಾಂಟಿ ವಿಭಾಗಾಚೊ ಮುಖ್ಯಸ್ತ್ ಡೊ| ಎಡ್ವರ‍್ಡ್ ನಜ್ರೆತ್ ಕಾರ‍್ಯಾಚೊ ಮುಕೆಲ್ ಸಯ್ರೊ ಜಾವ್ನ್ ಹಾಜರ್ ಆಸ್‌ಲ್ಲೊ.
ಆಮ್ಚೊ ಸಂದೇಶ್ ಪತ್ರಾಚ್ಯಾ ಪ್ರಗತೆ ಪಾಟ್ಲ್ಯಾನ್ ದೊನ್‌ಯಿ ದಿಯೆಸೆಜಿಂಚ್ಯಾ ಕ. ಸಭಾ ಅಧ್ಯಕ್ಷ್ ಆನಿ ಸಂಚಾಲಕಾಚೊ ಮೊಟೊ ವಾವ್ರ್ ಆಸಾ. ಆಮ್ಚೊ ಸಂದೇಶ್ ಆಡಳ್ತ್ಯಾ ಮಂಡಳಿಯಿ ಹ್ಯಾ ಪತ್ರಾಖಾತಿರ್ ನಿರಂತರ್ ವಾವ್ರ್ ಕರ‍್ತಾ. ಪತ್ರ್ ಆಜ್ ಆರ‍್ತಿಕ್ ರಿತಿರ್ ಆನಿ ಪ್ರಸಾರ್ ಸಂಖ್ಯಾನ್ ಬಳ್ವಂತ್ ಆಸಾ ತರ್ ತಾಕಾ ಪ್ರಮುಕ್ ಕಾರಣ್ ಘಟಕ್ ಆನಿ ವಾರಾಡ್ಯಾಚೆ ’ಆಮ್ಚೊ ಸಂದೇಶ್’ ಪ್ರತಿನಿಧಿ. ತಾಂಕಾಂ ಪ್ರೇರಣ್ ಘಟಕ್ ಆನಿ ವಾರಾಡ್ಯಾಂಚೆ ಅಧ್ಯಕ್ಷ್ ಆನಿ ಹೆರ್ ಹುದ್ದೆದಾರ್. ಆಜ್ ಕ. ಸಭೆಚ್ಯಾ ಹರ್ ಸಾಂದ್ಯಾಕ್‌ಯಿ ಸಂದೇಶ್ ಪತ್ರಾಚೆರ್ ವರ‍್ತೊ ಅಭಿಮಾನ್ ಆಸಾ. ಹರ್ ಮಹಿನ್ಯಾಂತ್ ಲಗ್ಬರ್ ೨ ಥಾವ್ನ್ ೩ ಲಾಕ್ ರುಪಯ್ ಐವಜ್ ಜಾಹೀರಾತಾಂ ಮುಕಾಂತ್ರ್ ಜಮಂವ್ಕ್ ಸಕ್ಚೆಂ ಏಕ್ ಮಾತ್ರ್ ಪತ್ರ್ ಆಮ್ಚೊ ಸಂದೇಶ್. ಅತ್ಯಧಿಕ್ ಪ್ರಸಾರಾ ಜಾಳ್ ಆಸ್ಚೆಂ ಹರ್ ಘಟಕಾಂನಿ ಸಂದೇಶ್ ಪ್ರತಿನಿಧಿ ಆಸ್ಚೆಂ ಪತ್ರ್‌ಯಿ ಹೆಂ ಮ್ಹಳ್ಳೆಂ ವ್ಹಡ್ಪಣ್ ಹ್ಯಾ ಪತ್ರಾಕ್ ಆಸಾ.