September 2025
ಎರಿಕ್ಬಾಬಾಚ್ಯಾ ಉಗ್ಡಾಸಾನ್ ಉರೊಂ ‘ಕೊಂಕ್ಣಿ ನಿರಂತರಿ - ಸಂಸಾರ್ ಸರಾಸರಿ’
ಮಾಂಡ್ ಸೊಭಾಣ್ ಸ್ಥಾಪಕ್ ಎರಿಕ್ ಒಝೇರಿಯೊಚ್ಯಾ ಮರ್ಣಾವರ್ವಿಂ ಕೊಂಕ್ಣಿ ಚಳ್ವಳೆಚೊ ಏಕ್ ಮಹತ್ವಾಚೊ ಅಧ್ಯಾಯ್ ಸಂಪ್ಲಾ. ಸಂಪೂರ್ಣ್ ಇಂಗ್ಲಿಶ್ ವರ್ತುಲಾಂತ್ ವಾವುರ್ನ್ ಆಸ್ಲ್ಲ್ಯಾ ಎರಿಕಾನ್ ಕೊಂಕ್ಣಿ ವರಕವಿ ಚಾಫ್ರಾಚ್ಯಾ ಪ್ರಭಾವಾನ್ ಕೊಂಕ್ಣಿ ಚಳ್ವಳೆಕ್ ದೆಂವ್ಲ್ಲೆಂ ಆನಿ ತ್ಯಾ ಉಪ್ರಾಂತ್ ಕಸಲಿ ಅಡ್ಕಳ್ ಆಯ್ಲ್ಯಾರಿ ಭಿಯೆನಾಸ್ತಾಂ ಆಪ್ಲ್ಯಾ ಆಕ್ರೇಚ್ಯಾ ಉಸ್ವಾಸಾಪರ್ಯಾಂತ್ ಥಿರಾಸಾಣೆನ್ ವಾವುರ್ಲ್ಲೆಂ ಏಕ್ ಸಪಣ್ ಜಶೆಂ ಭೊಗ್ತಾ ತರೀ ತೆಂ ಸತ್.
ಕೊಂಕ್ಣಿ ಸಂಗೀತಾಕ್ ನವೆಂ ರೂಪ್ ಆನಿ ಪಾಂವ್ಡೊ ರಚುನ್ ದಿಲ್ಲೊ ಸಂಗೀತ್ ಮಾಂತ್ರಿಕ್ ತೊ. ನಾಮ್ಣೆಚೆ ಕೊಂಕ್ಣಿ ಕವಿ ಚಾಫ್ರಾ, ಮೆಲ್ವಿನ್ ರೊಡ್ರಿಗಸ್, ಫ್ರೆಡ್ಕುಮಾರ್ ಕುಚ್ಚಿಕಾಡು ತಸಲ್ಯಾಂಚ್ಯಾ ಗಿರೆಸ್ತ್ ಕವಿತೆಂಕ್ ಸಂಗೀತಾಚೊ ಉಸ್ವಾಸ್ ದೀವ್ನ್ ದೊನ್ಶಾಂಪ್ರಾಸ್ ಚಡಿತ್ ಸಂಗೀತ್ ಕಾರ್ಯಾಂನಿ ಕೊಂಕ್ಣಿ ಸಂಗೀತ್ ಪ್ರೇಮಿಂಕ್ ವೆಗ್ಳ್ಯಾಚ್ ರುಚಿಚೆಂ ಸಂಗೀತ್ ಚಾಕಯಿಲ್ಲಿ ಕೀರ್ತ್ ತಾಕಾ ಫಾವೊ ಜಾತಾ.
1986 ನವೆಂಬರ್ 30 ತಾರಿಕೆರ್ ಮಂಗ್ಳುರ್ಚ್ಯಾ ವುಡ್ಲ್ಯಾಂಡ್ಸ್ ಹೊಟೆಲಾಚ್ಯಾ ಪಾಚ್ವ್ಯಾ ತಣಾಚ್ಯಾ ಉಗ್ತ್ಯಾ ಆಂಗ್ಣಾಂತ್ ಚಲ್ಲ್ಲೊ ಕೊಂಕ್ಣಿ ಸಂಗೀತಾಚೊ ನವೊ ಪ್ರಯೋಗ್ ಸಂಗೀತ್ ಪ್ರೇಮಿಂಚಿಂ ಕಾಳ್ಜಾಂ ಪೆಟಂವ್ಕ್ ಸಕ್ಲ್ಲೊ. ಕವಿ ಫ್ರೆಡ್ಕುಮಾರ್ ಕುಚ್ಚಿಕಾಡು ಸಂಗಿಂ ಹ್ಯಾ ಕಾರ್ಯಾಕ್ ಹಾಜರ್ ಜಾತಾನಾ ಮ್ಹಾಕಾ ಫಕತ್ ೧೪ ವರ್ಸಾಂಚಿ ಪ್ರಾಯ್. ಪುಣ್ ತ್ಯೆ ತರ್ನೆ ಪ್ರಾಯೆರ್ ಕವಿತೆಚಿ ಆನಿ ಸಂಗೀತಾಚಿ ವೋಡ್ ಎರಿಕ್ಬಾಬಾನ್ ವೊಂಪ್ಲ್ಲಿ.
ತಾಚೆ ಉಪ್ರಾಂತ್ ಕೊಂಕ್ಣಿ ಕವಿ ಕುಲರತ್ನ್ ಚಾಫ್ರಾಚ್ಯಾ ಜಿವಿತ್ ಪತ್ರಾಂತ್ ವಾವ್ರ್ ಕರ್ತಾನಾ, ಜಾಗೆ ಕವಿ ಕವಿಂಚೆ ಮೆಳಿಂತ್ ಕವಿತಾ ಸಾದರ್ ಕರ್ತಾನಾ ಮ್ಹಜ್ಯಾ ತವಳ್ಚ್ಯಾ ಕಮ್ಯೂನಿಸ್ತ್ ಚಿಂತ್ಪಾಚ್ಯಾ ಕವಿತೆಂಕ್ ಪಾಟ್ ಥಾಪುಡ್ನ್ ಪ್ರೊತ್ಸಾವ್ ದಿಲ್ಲೊ ಬಾಬ್ ಎರಿಕಾನ್. ಮಾಂಡ್ಸೊಭಾಣಾನ್ ನವೆಂ ದಫ್ತರ್ ಉಘಡ್ತಾನಾ ಆನಿ ಪೊರೊಬ್ ನೊವ್ ದಿಸಾಂಚೆಂ ಕಲಾ ಸಂಸ್ಕೃತೆಚೆಂ ಫೆಸ್ತ್ ಆಯೋಜನ್ ಕರ್ತಾನಾ ಮ್ಹಾಕಾ ತಾಚ್ಯಾ ದಫ್ತರಾಂತ್ ಸಹಾಯಕ್ ಜಾವ್ನ್ ವಾವುರ್ಚೊ ಅವ್ಕಾಸ್ ಮೆಳ್ಲ್ಲೊ.
ಕೊಂಕ್ಣಿ ಭಾಸ್ ಫಕತ್ ಕಥೊಲಿಕ್ ಸಮುದಾಯಾಚಿ ಮ್ಹಳ್ಳೆಂ ಚಿಂತಪ್ ಆಸ್ಲ್ಲ್ಯಾ ಕಾಳಾರ್ ಕೊಂಕ್ಣಿ ಭಾಸ್, ಕಲಾ, ಸಂಸ್ಕೃತಿ ಆನಿ ಪರಂಪರೆಚಿ ಖರಿ ಒಳೊಕ್ ಕರ್ನ್ ದಿಲ್ಲಿಚ್ ಎರಿಕ್ಬಾಬಾನ್. ಮಂಗ್ಳುರ್ಚ್ಯಾ ಬಲ್ಮಠ ಕೇಸಸ್ ಮಯ್ದಾನಾರ್ ಸಂಸಾರ್ಭರ್ ಶಿಂಪಡ್ಲೆಲ್ಯಾ ಸರ್ವ್ ಧರ್ಮಾಂಚ್ಯಾ, ಸರ್ವ್ ಪ್ರದೇಶಾಂಚ್ಯಾ, ಸರ್ವ್ ಬೊಲಿಂಚ್ಯಾ ಕೊಂಕ್ಣಿ ಸಮುದಾಯಾಂಕ್ ಎಕೆ ಮಾಂಚಿಯೆರ್ ಹಾಡ್ನ್ ಸಾದರ್ ಕರ್ತಾನಾ ಸಂಸಾರ್ಚ್ ಆಜಾಪ್ ಪಾವ್ಲ್ಲೊ! ತಾಚಿ ತಶೆಂಚ್ ತಾಚೊ ಖಾಸ್ ಮಿತ್ರ್ ಬಾಬ್ ಲುವಿ ಜೆ. ಪೀಂತ್ ಹಾಂಚಿ ತಾಂಕ್ಚ್ ವೆಗ್ಳಿ. ಸಂಸಾರಾಚೊ ಪಯ್ಲೊ ಬಾಯ್ಲಾ ಶೋ, ಮಾಂಡೊ ಫೆಸ್ತ್, ಪೊರೊಬ್, ಸಾಂತ್, ಬಾಯ್ಲಾ ಇಂಟರ್ನ್ಯಾಶನಲ್, ಪುನವ್, ಮಾಂಡೊ ಉತ್ಸವ್, ಕೊಂಕ್ಣಿ ಮಹೋತ್ಸವ್, ಕೊಂಕ್ಣಿ ನಿರಂತರಿ, ಕೊಂಕ್ಣಿ ದಾಯ್ಜಾ ದಿವ್ಯಾ ಯಾತ್ರಾ ತಸಲಿಂ ಕಾರ್ಯಿಂ ರಿತ್ಯಾ ಹಾತಾಂನಿ ಸುರ್ವಾತಿಲ್ಲಿಂ ತರೀ ಯಶಸ್ವೆಚ್ಯಾ ಬಂದ್ರಾಕ್ ಪಾವವ್ನ್ ಸಂಸಾರಾಕ್ ವಿಜ್ಮಿತ್ ಕೆಲ್ಲಿಂ ಮಹಾನ್ ಕಾರ್ಯಿಂ.
ಕೊಂಕ್ಣಿ ಭಾಸ್, ಕಲಾ, ಸಂಸ್ಕೃತಿ ಆನಿ ಗಿರೇಸ್ತ್ ಪರಂಪರಾ ಜಗಂವ್ಕ್, ಸುಂರ್ಗಾರಾಂವ್ಕ್ ಆನಿ ಫುಡ್ಲೆ ಪಿಳ್ಗೆಕ್ ಪಾವಂವ್ಕ್ ಏಕ್ ಬರೊ ಕೊಂಕ್ಣಿ ಭೊಂವಾರ್ ರುತಾ ಜಾಲಾ. ತೊಚ್ ಕೊಂಕ್ಣೆಚೆಂ ಕಲಾಂಗಣ್. ಹ್ಯಾ ಸಂಸ್ತ್ಯಾಂತ್ ಪಾಟ್ಲ್ಯಾ ಅಡೇಜ್ ಧಾಕ್ಡ್ಯಾಂಥಾವ್ನ್ ಕೊಂಕ್ಣೆಚೊ ವಾವ್ರ್ ನಿರಂತರ್ ಚಲ್ತಾ. ಹರ್ಯೆಕಾ ಮಹಿನ್ಯಾಂತ್ ಚುಕನಾಸ್ತಾಂ ಚಲ್ಚಿ ಮಯ್ನ್ಯಾಳಿ ಮಾಂಚಿ, ಕೊಂಕ್ಣೆಚೊ ಮೋಗ್ ಭುರ್ಗ್ಯಾಂಥಂಯ್ ವೊಂಪ್ಚೆಂ ರಜೆಶಿಬಿರ್, ಸಂಗೀತ್ ತರ್ಬೆತಿ ದಿಂವ್ಚೆ ಸುರ್ ಸೊಭಾಣ್ ಆನಿ ಸುಮೇಳ್ ಪಂಗಡ್, ನಾಚ್ ತರ್ಬೆತಿ ದಿಂವ್ಚೊ ನಾಚ್ ಸೊಭಾಣ್, ನಾಟಕ್ ಕಲೆಚಿ ತರ್ಬೆತಿ ದಿಂವ್ಚೆಂ ಕಲಾಕುಲ್... ಅಶೆಂ ಎಕಾ ಭಾಶೆಚ್ಯಾ ಸರ್ವ್ ಪ್ರಕಾರಾಂನಿ ನಿರಂತರ್ ತರ್ಬೆತಿ ಆನಿ ಪ್ರದರ್ಶನಾಂ ದಿಂವ್ಚೊ ಸಂಸ್ಥೊ ಬೊವ್ಶಾ ಸಂಸಾರಾಂತ್ಚ್ ಏಕ್ - ಕಲಾಂಗಣ್. ಹ್ಯಾ ಸರ್ವ್ ವಾವ್ರಾಂತ್ ಎರಿಕ್ಬಾಬ್ ಎಕ್ಲೊಚ್ ಆಸ್ಲ್ಲೊ ಮ್ಹಣ್ ಕಾಂಯ್ ನ್ಹಯ್. ಮಾಂಡ್ಸೊಭಾಣಾಚೊ ಸಮರ್ಪಿತ್ ಪಂಗಡ್ ತಾಚೆಸವೆಂ ಆಸ್ಲ್ಲೊ. ಪುಣ್ ಜಾಯ್ತ್ಯೊ ಸಂಗ್ತಿ ತಾಚ್ಯಾ ಚಿಂತ್ಪಾಚೆಂ ಬಾಳ್ ಜಾವ್ನ್ಚ್ ಉದೆಲ್ಯೊ ಮ್ಹಣ್ಚ್ಯಾಂತ್ ದುಬಾವ್ ನಾ.
ಕರ್ನಾಟಕ್ ಕೊಂಕ್ಣಿ ಸಾಹಿತ್ಯ್ ಅಕಾದೆಮಿಚೊ ಅಧ್ಯಕ್ಶ್ ಜಾವ್ನ್ ತಾಣೆ ಕೆಲ್ಲಿಂ ಕಾಮಾಂ ಆಜೂನ್ ಉಡಾಸಾಂತ್ ಉರ್ಚೆ ತಸಲಿಂ ಆಸಾತ್. ಕೊಂಕ್ಣಿ ಮುಕ್ಲ್ಯೆ ಪಿಳ್ಗೆಕ್ ಪಾವಯ್ಜೆ ಮ್ಹಳ್ಳ್ಯಾ ಇರಾದ್ಯಾನ್ ಶಾಳಾಂನಿ ಕೊಂಕ್ಣಿ ಅಭಿಯಾನ್ ಕಾರ್ಯಾಕ್ ತಾಣೆಂಚ್ ಚಾಲನ್ ದಿಲೆಂ. ಸುರ್ವಿಲ್ಯಾ ವರ್ಸಾಂನಿ ಜಾಯ್ತ್ಯಾ ಇಸ್ಕೊಲಾಂನಿ ತಾಕಾ ಪಾಟಿಂಬೊ ಲಾಬ್ಲೊ. ಪುಣ್ ಸವ್ಕಾಸ್ ತ್ಯಾ ಅಭಿಯಾನಾಕ್ ಶಿಕ್ತೆಲ್ಯಾಂಥಾವ್ನ್ ಆನಿ ಶಿಕಯ್ತೆಲ್ಯಾಂಥಾವ್ನ್ ಪ್ರೊತ್ಸಾವ್ ಲಾಬನಾಸ್ತಾಂ ತೆಂ ಪಾಟಿಂ ಪಡ್ಲೆಂ.
ಆಪ್ಲ್ಯಾ ವಿಭಿನ್ನ್ ಚಿಂತ್ಪಾನ್, ಅಪ್ರೂಪ್ ತಾಲೆಂತಾಚ್ಯಾ ಬಳಾನ್ ಜಾಯ್ತ್ಯಾ ಅಭಿಮಾನಿಂಕ್ ತಾಣೆ ರಚುನ್ ಘಾಲೆಂ. ಅಸ್ಕತ್ಯಾಂಕ್ ಅನ್ಯಾಯ್ ಜಾಲಾ ಮ್ಹಣ್ ತಾಕಾ ಭೊಗ್ಲ್ಲ್ಯಾ ವೆಳಾರ್ ತಾಣೆ ಬಳ್ವಂತ್ ಸಕ್ತೆಂವಿರೋಧ್ಯಿ ಆವಾಜ್ ಉಟಯ್ಲಾ. ಪುಣ್ ವೆವೆಗ್ಳ್ಯಾ ಸಮಾಜಿಕ್ ಝುಜಾಂಚ್ಯಾ ಸಂದರ್ಬಾರ್ ತಕ್ಶಣಾಚಿ ಪ್ರತಿಕ್ರಿಯಾ ದಿತಾನಾ ತಾಣೆ ಘೆತ್ಲ್ಲೆ ನಿಶ್ಟುರ್ ನಿರ್ದಾರ್, ದಿಲ್ಲಿಂ ವಾಕ್ಮುಲಾಂ ಜಾಯ್ತ್ಯಾಂಕ್ ತಾಚೆಥಾವ್ನ್ ಪಯ್ಸ್ ಕರುಂಕ್ ಪಾವ್ಲ್ಲೆಂ ತಾಕಾ ಆಕೆರ್ ಪರ್ಯಾಂತ್ ಕಳ್ಳೆಂನಾಗಾಯ್ ಮ್ಹಳ್ಳೊ ದುಬಾವ್ ಥೊಡ್ಯಾಂನಿ ವೆಕ್ತ್ ಕೆಲ್ಲೊಯಿ ಆಸಾ.
ಕೊಂಕ್ಣೆಕ್ ಉಂಚಾಯೆಚೆಂ ಸ್ಥಾನ್ ಲಾಬಂವ್ಕ್ ವಾವುರ್ಲಲೊ ಸಂಗೀತ್ ಮಾಂತ್ರಿಕ್ ಆಜ್ ಆಮ್ಚೆಸವೆಂ ನಾ. ಪುಣ್ ತಾಣೆ ಸೊಡ್ನ್ ಗೆಲ್ಲಿ ಪಯ್ಸಾದೀಶ್ಟ್ ಆಮ್ಚೆ ಮುಕಾರ್ ಆಸಾ. ಕೊಂಕ್ಣೆಚ್ಯಾ ಉದರ್ಗತೆಕ್ ತಾಣೆ ಸ್ಥಾಪ್ಲಲೊ ಸಂಸ್ಥೊ ಆಸಾ, ಸಮರ್ಪಿತ್ ಮನೋಭಾವಾನ್ ವಾವ್ರ್ ಕರ್ಚೊ ತಾಚ್ಯಾ ಇಶ್ಟಾಂಚೊ ಪಂಗಡ್ಯಿ ಆಸಾ. ಎದೊಳ್ಚ್ ಮಾಂಡ್ಸೊಭಾಣ್ ಅಧ್ಯಕ್ಷ್ ಮಾನೆಸ್ತ್ ಲುವಿ ಜೆ. ಪೀಂತ್ ಹಾಂಣಿ ಕೊಂಕ್ಣಿ ನಿರಂತರಿ ಸಂಸಾರ್ ಸರಾಸರಿ 12 ದೀಸ್, 12ವೊರಾಂ, 12 ಮಿನುಟಾಂಚೊ ಕೊಂಕ್ಣಿ ಸಂಗೀತ್-ಗಿತಾಂಚೊ ಗಿನ್ನೆಸ್ ಧಾಕ್ಲೊ ರಚ್ಚೆಂ ಘೋಶಣ್ ಕೆಲಾಂ. ಎರಿಕ್ ಕೊಂಕ್ಣೆಚೊ ಏಕ್ ವ್ಹಡ್ ವೊಡಾರೂಕ್. ಎದೊಳ್ ಆಮ್ಕಾಂ ಮಾಂಡ್ಸೊಭಾಣಾ ಮುಕಾಂತ್ರ್ ತೊಚ್ ವಿಸ್ತಾರ್ಲ್ಲೊ ದಿಸ್ತಾಲೊ. ಪುಣ್ ಆಜ್ ತೊ ರೂಕ್ ದೊಳ್ಯಾಂಭಾಯ್ರ್ ಜಾಲಾ. ಪುಣ್ ತಾಚೆ ಪಾಟ್ಲೆ ಸಬಾರ್ ಜಯ್ತ್ ರೂಕ್ ಫುಡೆಂ ಸ್ಪಶ್ಟ್ ಝಳ್ಕಾತೆಲೆ. ಕೊಂಕ್ಣೆಚ್ಯಾ ನಿರಂತರತೆಕ್ ತೆಂ ಬೋವ್ ಗರ್ಜೆಚೆಂ.
ವಿಲ್ಫ್ರೆಡ್ ಲೋಬೊ, ಪಡೀಲ್