Top story

ಆಜ್‌ಕಾಲ್ ಆಮ್ಚಿಂ ಭುರ‍್ಗಿಂ ಆಮ್ಚಿ ಆಸ್ತ್, ಆಮ್ಚೊ ಭರ್ವಸೊ, ಆಮ್ಚೊ ಫುಡಾರ್ ಮ್ಹಣೊಂಕ್ ವ್ಹಡಿಲಾಂಕ್ ಧಯ್ರ್ ಪಾವನಾ. ಹ್ಯೆ ಸಮಾಜೆಂತ್ ಆಮಿ ಕೊಣಾಕ್ ದುರ‍್ಸಾಜೆ? ಭುರ‍್ಗ್ಯಾಂಕ್, ವ್ಹಡಿಲಾಂಕ್, ಶಿಕ್ಷಕಾಂಕ್, ಶಿಕ್ಷಣ್ ನಿತಿಕ್, ಸರ‍್ಕಾರಾಕ್ ವಾ ನ್ಯಾಯ್ ವ್ಯವಸ್ಥೆಕ್? ಸತ್ ಸಾಂಗಜೆ ತರ್ ಸ್ವಸ್ತ್ ಸಮಾಜ್ ರೂಪಿತ್ ಕರಿಜೆ ಜಾಲ್ಲಿಂ ಆಮ್ಚಿಂ ಭುರ‍್ಗಿಂ ವಾಟ್ ಚುಕ್ತೆ ಆಸಾತ್. ಆನಿ ಹ್ಯಾ ಭುರ‍್ಗ್ಯಾಂಚೆರ್ ಜಾಣಾ ಆಸೊನ್ ಯಾ ನೆಣಾ ಆಸೊನ್ ಜಾಂವ್ಚೆ ಅನಾಚಾರ್, ಅತ್ತ್ಯಾಚಾರ್, ಅನ್ಯಾಯ್, ಅಕ್ರಮಾಂ, ಶೋಶಣಾಂ ಪಳೆತಾನಾ, ಆಯ್ಕತಾನಾ, ಆಮ್ಚೆ ಭೊಂವ್ತಿಂ ಘಡ್ತಾನಾ ಕುಡಿಂತ್ ರಗತ್ ಘಟ್ ಕರ‍್ತಾ. 

ಚಿಂತ್ಯಾಂ, ಆಮ್ಚೆಂ ಭುರ‍್ಗೆಂ ಇಸ್ಕೊಲಾಕ್ ವೆತಾ. ಕ್ಲಾಸಿಂತ್ ತ್ಯಾ ಭುರ‍್ಗ್ಯಾಕ್ ತಾನ್ ಲಾಗ್ತಾ. ಥೊಡೊ ವೇಳ್ ಆಪ್ಲಿ ತಾನ್ ದಾಂಬುನ್ ಧರುನ್ ನಿಮಾಣೆಂ ಶಿಕ್ಶಕಾಚಿ ಪರ‍್ವಣ್ಗಿ ಘೆಂವ್ಕ್ ಎಕಾ ಕಯ್ದ್ಯಾಪರಿ ಹಾತ್ ವಯ್ರ್ ಕರ‍್ತಾ, ಏಕ್ ಲೊಟೊ ಉದಕ್ ಪಿಯೆಂವ್ಕ್ ವಚ್ಯೆತ್‌ಗೀ? ಮ್ಹಣ್. 

ನಾ ಆತಾಂ ನಾಕಾ ಮ್ಹಣ್ತಾ ಶಿಕ್ಶಕ್. 

ಎಕಾ ಭುರ‍್ಗ್ಯಾಚೆಂ ಉದಕ್ ಪಿಯೆಂವ್ಚೆಂ ಮೂಳ್ ಹಕ್ಕ್ ನಿಯಂತ್ರಣ್ ಕರ‍್ಚೆಂ ಹಕ್ಕ್ ಶಿಕ್ಶಕಾಕ್ ದಿಲ್ಲೆಂ ಕೊಣೆಂ? ಎಕಾ ಮಾಸುಮ್ ಭುರ‍್ಗ್ಯಾಚ್ಯಾ ಪ್ರಾಥಮಿಕ್ ಇಸ್ಕೊಲಾ ಸಂದರ‍್ಬಿಂ ಶಿಸ್ತ್ ಆನಿ ವಿಧೇಯತಾ, ನಿಯಮಾಂ ಆನಿ ರೆಗ್ರೊ ಕಸಲ್ಯಾ ಸಂಗ್ತಿಂಕ್ ಸೀಮಿತ್ ಕರಿಜೆ ಮ್ಹಳ್ಳೆಂ ಕೊಣೆಂ ತರೀ ಚಿಂತ್ಲಾಂ? ತ್ಯಾ ಆನಿ ತಸಲ್ಯಾ ಭುರ‍್ಗ್ಯಾಂಚೆ ಕುಡಿಂತ್ ಆನಿ ಮತಿಂತ್ ಕಸಲೊ ಪರಿಣಾಮ್ ಜಾಯ್ತ್ ಹ್ಯೆ ವಿಶಿಂ ತ್ಯಾ ಶಿಕ್ಷಕಾಂಕ್ ಕಾಂಯ್ ಅನ್ಭೊಗ್ ಯಾ ಮಾಹೆತ್ ಆಸಾ? ತಾನ್ ಲಾಗ್‌ಲ್ಲ್ಯಾ ತೆದ್ನಾಂ ತಾಚೊ ಆವ್ಕಾಸ್ ಆಡಾಂವ್ಚೆಂ ಕಸಲೆಂ ಮನ್ಶಾಪಣ್? ಶಿಸ್ತ್ ಆನಿ ನಿಯಮಾಂ ಮನ್ಶಾಪಣಾಪ್ರಾಸ್ ಚಡ್ ವರ‍್ತಿಂಗೀ? ಗರ‍್ಜೆಚಿಂಗೀ?  ಏಕ್ ಬರಿ ಶಿಕ್ಷಕಿ ಏಕ್ ಉತ್ತೀಮ್ ಸಮಾಜ್ ರಚ್ತಾ. ಪಾಡ್, ಮೌಲ್ಯಾಂ ನಾತ್‌ಲ್ಲ್ಯಾ ಶಿಕ್ಷಕಾಂಥಾವ್ನ್ ಏಕ್ ಬರಿ ಪಿಳ್ಗಿಚ್ ನಾಸ್ ಜಾತಾ!

ಆಮ್ಚ್ಯಾ ಭುರ‍್ಗ್ಯಾಂಕ್ ಹೆರಾಂಸಂಗಿಂ ಸರ್ ಕರ‍್ಚೊ ಏಕ್ ಸ್ವಾರ‍್ತಿ ಅವ್ಗುಣ್ ಆಮ್ಚ್ಯಾ ವಡ್ಲಿಲಾಂಚ್ಯೆ ಖಾಕಿಯೆಂತ್ ಆಸಾ. ತಾಕಾ ಪಳೆ, ಸೆಜಾರ‍್ಚ್ಯಾಕ್ ಪಳೆ, ಅಶೆಂ ಆನಿ ತಶೆಂ ಸರ್ ಕರ‍್ನ್ ಆಮ್ಚ್ಯಾ ಭುರ‍್ಗ್ಯಾಕ್ ತಾಕ್ಡೆರ್ ಉಮ್ಕಾಳಾಂವ್ಚೆಂ ಕಿತ್ಲೆಂ ಸಾರ‍್ಕೆಂ? ಭುರ‍್ಗ್ಯಾಂಚಿಂ ದೆಣಿಂ ತಾಲೆಂತಾಂ ಪಳೆವ್ನ್ ಪ್ರೊತ್ಸಾವ್ ದಿಂವ್ಚ್ಯಾಕ್ ವ್ಹಡಿಲಾಂಕ್ ಪುರ‍್ಸತ್ ನಾ, ಪುಣ್ ಹೆರಾಂಚ್ಯಾ ಘರಾಂತ್, ಸೆಜಾರ‍್ಚೆ ಮೊಡ್ಕೆಂತ್ ಕಿತೆಂ ಶಿಜ್ತಾ ತೆಂ ಸಮ್ಜೊಂಕ್ ತಾಂಕ್ ಆಸ್ತಾ. ಜರ್ ತಿಂ ಎದೊಳ್ ಜಯ್ತ್ ಜೊಡ್ನ್ ಫುಡೆಂ ಗೆಲ್ಯಾಂತ್ ತರ್, ಆನಿ ಆಮ್ಚೊ ಭುರ‍್ಗೊ ಅಜೂನ್  ಶಿಕ್ತಾ ತರ್, ಸರ್ ಕರುಂಕ್ ಸಾಧ್ಯ್‌ಗೀ? ಉಪ್ಯೆವ್ನ್ ತಡ್ ಸೆರ‍್ವಲ್ಲ್ಯಾಕ್ ಅನಿ ಮಧೆಂ ಉದ್ಕಾಂತ್ ಆಸ್ಚ್ಯಾಕ್ ಸರ್ ಕರ‍್ಚೆಂ ಸಾರ‍್ಕೆಂಗೀ? ಏಕ್ ಕಾಳ್ ಆಸ್‌ಲ್ಲೊ, ಮಹಾನ್ ಸಾಧಕಾಂಚಿಂ ಪಿಂತುರಾಂ ಆನಿ ವೀಡಿಯೊವರ‍್ವಿಂ ಭುರ‍್ಗಿಂ ಪ್ರೇರಣ್ ಜೊಡ್ತಾಲಿಂ. ಪುಣ್ ಆತಾಂ ಕೇವಲ್ ಮನೋರಂಜನ್ ಮಾತ್ರ್! ಭುರ‍್ಗ್ಯಾಂಕ್ ಹ್ಯಾ ವರ‍್ವಿಂ ಕೀಳ್ ಮನೋಭಾವ್ ಅನಿ ಡಿಪ್ರೆಷನ್ ಮಾತ್ರ್ ಇನಾಮ್ ಜಾವ್ನ್ ಮೆಳ್ತಾ.  

ಚಲೊ ಯಾ ಚಲಿ, ವ್ಹಡಿಲಾಚೆ ಹಾತಿಂ ದೆವಾನ್ ದಿಲ್ಲೆಂ ದಾಯ್ಜ್. ಕಶೆಂ ವಾಗಯ್ಜೆ, ಸಾಂಬಾಳಿಜೆ? ಎಕ್ಯೆ ಚಲಿಯೆಕ್ ಶಿಕಪ್ ದಿಲ್ಯಾರ್ ತೆಂ ಮಾತ್ರ್ ನ್ಹಯ್, ಸಗ್ಳೆಂ ಕುಟಮ್, ಸಮುದಾಯ್ ಅನಿ ತಿಚಿ ಮುಕ್ಲಿ ಪಿಳ್ಗಿಚ್ ತಿ ಸುಶಿಕ್ಷಿತ್ ಕರ‍್ತಾ ಮ್ಹಳ್ಳಿ ಸಾಂಗ್ಣಿ ಆಸಾ. ಚಲಿಯೆಕ್ ದಾದ್ಲ್ಯಾಪ್ರಾಸ್ ಚಡ್ ಶೆಗುಣ್, ಸೊಸ್ಣಿಕಾಯ್, ಧಯ್ರ್ ಅನಿ ಸಮಾಧಾನ್ ಆಸ್ತಾ. ಹರ್‌ಎಕ್ ಚಲಿ ತಾಕಾ ಅರ್ಹ್. ಪುಣ್ ಜರ್ ಆಬ್ಲೆಸ್‌ಪಣ್, ಪಯ್ಶೆ ಆನಿ ಆಸ್ತ್-ಬದ್ಕಾಚಿ ಆಶಾ, ದಾದ್ಲ್ಯಾಂಕ್ ಕಾಂಠಾಳ್ಚಿ ಪ್ರವೃತ್ತಿ ಆಸ್ಚ್ಯೊ ಸ್ತ್ರೀ/ಚಲಿಯೊ ಆಸಾತ್ ತರ್ ಹ್ಯೆ ಸಮಾಜೆಕ್ ತಿಂ ಮಾರಕ್ ಮ್ಹಳ್ಳೆಂಯೀ ಮತಿಂತ್ ದವರ‍್ಚೆಂ. ಸ್ತ್ರೀ ಒಲಿದರೆ ನಾರಿ, ಮುನಿದರೆ ಮಾರಿ ತಿಚಿಂ ದೋನ್ ರುಪಾಂ ವ್ಯಕ್ತ್ ಕರ‍್ತಾ.

ಜರ್ ಆಮ್ಚ್ಯಾ ಭುರ‍್ಗ್ಯಾಂಕ್ ಏಕ್ ಸುರಕ್ಷಿತ್ ಫುಡಾರ್ ಲಾಬಜೆ ತರ್ ಆಮಿ ಜಾಗೃತ್ ಜಾಯ್ಜೆ. ಆಮ್ಚ್ಯಾ ಸರ‍್ಕಾರಾಚ್ಯಾ ಪ್ರತಿನಿಧಿಂಕ್ ಜಾಗಯ್ಜೆ, ಕಾನೂನ್ ಅನಿ ನ್ಯಾಯ್‌ನೀತ್ ಸಾರ‍್ಕೆ ರಿತಿನ್ ಕಾರ‍್ಯಗತ್ ಜಾಯ್ಜೆ. ಕಸಲಿಂ ತಂತ್ರಾಂ ಆತಾಂ ಚಾಲ್ತೆರ್ ಆಸಾತ್ ಪಳೆವ್ಯಾಂ:

1. ಜಾಗೃತ್ ಸಮಿತಿ: ಹರ್‌ಎಕ್ ಪೊಲಿಸ್ ಸ್ಟೇಶನಾಂನಿ ಚೈಲ್ಡ್ ಫ್ರೆಂಡ್ಲಿ ಪೊಲಿಸ್ ಸೆಲ್ ಆಸುನ್ ಭುರ‍್ಗ್ಯಾಂವಿಶಿಂ ಮಾಹೆತ್ ದಿಂವ್ಚಿ ವ್ಯವಸ್ಥಾ ಕಾರ‍್ಯಗತ್ ಜಾಯ್ಜೆ. ಹ್ಯಾ ಟಾಸ್ಕ್ ಟಿಮಾಕ್ ಹರ್ ಇಸ್ಕೊಲಾಚ್ಯಾ ಮುಕೆಲ್‌ಮೆಸ್ತ್ರಿ, ಸಮಾಜ್ ಸೆವಕ್, ಆಟೋ ಅನಿ ಟ್ಯಾಕ್ಸಿ ಎಸೊಸಿಯೇಶನಾಚ್ಯಾ ಪ್ರತಿನಿಧಿಂಕ್ ಸಾಂಗಾತಾ ಘೆವ್ನ್ ಕೌನ್ಸಿಲರಾಚೆ ಕುಮ್ಕೆನ್ ಭುರ‍್ಗ್ಯಾಂಚ್ಯಾ ಸಬಾರ್ ಸಮಸ್ಸ್ಯಾಂಕ್, ಅಪಾಯಾಂಕ್, ಜಾಲ್ಲ್ಯಾ ಅನ್ನ್ಯಾಯಾಂಕ್ ಪರಿಹಾರ್ ಆನಿ ಸೂಕ್ತ್ ವೆದಿ ತಯಾರ್ ಕರ‍್ಚಿ.

2. ಚೈಲ್ಡ್ ಹೆಲ್ಪ್‌ಲೈನ್ ಸಂಗಿಂ ಹಾತ್ ಮೆಳೊವ್ನ್ ಆಮ್ಚ್ಯಾ ಪರಿಸರಾಂತ್ ಜಾಂವ್ಚ್ಯಾ ಭುರ‍್ಗ್ಯಾಂಚ್ಯಾ ವಿಕ್ರ್ಯಾಂವಿಶಿಂ, ಅನಧಿಕೃತ್ ಭುರ‍್ಗ್ಯಾಂಕ್ ಪೊಸ್ಕೆಂ ಘೆಂವ್ಚೆಂ, ಲೈಂಗಿಕ್ ಅಪ್ರಾಧ್, ಘರ್ ಕಾಮಾಕ್ ದವರ್‌ಲ್ಲ್ಯಾ ಭುರ‍್ಗ್ಯಾಂವಿಶಿಂ ಮಾಹೆತ್, ಆವಯ್-ಬಾಪಾಯ್ ನಾತ್‌ಲ್ಲ್ಯಾ ಭುರ‍್ಗ್ಯಾಂವಿಶಿಂ ವರ‍್ದಿ, ಅಶೆಂ ಸಬಾರ್ ವಾಟಾಂನಿ ಭುರ‍್ಗ್ಯಾಂ ರಾಕಣೆ ಕಾಮ್ ಕರುಂಕ್ ವ್ಯವಸ್ಥಾ ಜಾಯ್ಜೆ. ಆಮ್ಕಾಂ ಕಿತ್ಯಾಕ್ ತಾಂಚಿ ಖಬರ್ ಮ್ಹಣ್ ಆಮಿ ಜರ್ ವೊಗೆಂ ರಾವ್ಲ್ಯಾಂವ್, ಫಾಲ್ಯಾಂ ಆಮ್ಚ್ಯಾ ಭುರ‍್ಗ್ಯಾಂಕ್ ಸಂಕಶ್ಟ್ ಆಯ್ಲ್ಲೆ ತರ್ ಕೊಣ್‌ಯಿ ಲಾಗಿಂ ಯೆಂವ್ಚಿನಾ. 

3. ಭುರ‍್ಗ್ಯಾಂಕ್ ಶಿಕ್ಷಣ್ ಆನಿ ಜಾಗೃತಿ ದಿಂವ್ಚಿ: ಭುರ‍್ಗ್ಯಾಂಕ್ ತಾಂಚಿಂಚ್ ಮ್ಹಳ್ಳಿಂ ಹಕ್ಕಾಂ ಆಸಾತ್. ತಾಂಚೆ ಕುಡಿಚಿ ಸುರಕ್ಷತಾ, ಮೀತ್ ಆನಿ ಕೊಣೆಂ ಆಪ್ಡಿಜೆ, ಕೊಣಾಥಾವ್ನ್ ಪಯ್ಸ್ ಆಸಜೆ, ಗುಡ್ ಅನಿ ಬ್ಯಾಡ್ ಟಚ್, ಕಸ್ಲಿ ಭಾಸ್ ಆನಿ ಪಿಂತುರಾಂ ಚುಕಯ್ಜೆ, ಕಶ್ಟ್ ಯೆತಾನಾ ಕೂಡ್ಲೆ ಕೊಣಾಕ್ ಸಂಪರ‍್ಕ್ ಕರಿಜೆ, ಸರ‍್ಕಾರಿ ಆನಿ ಭೊಂವ್ತಿಂ ಆಸ್ಚಿ ಸುರಕ್ಷಾ ವ್ಯವಸ್ತಾ ಆನಿ ರಕ್ಷಣ್ ದಿಂವ್ಚೆ ವ್ಯಕ್ತಿ ಕೋಣ್ ಮ್ಹಳ್ಳೆವಿಶಿಂ ಸಂಪೂರ‍್ಣ್ ಮಾಹೆತ್ ಭುರ‍್ಗ್ಯಾಂಕ್ ಜೊಕ್ತ್ಯಾ ವೆಳಾರ್ ದೀಜೆ. 

4. ವ್ಹಡಿಲಾಂಕ್ ಮಾರ‍್ಗದರ್ಶನ್: ಭುರ‍್ಗ್ಯಾಂಚೆ ದಿಸ್ಪಟಿಂತ್ ಜಾಂವ್ಚಿ ಬದ್ಲಾವಣ್, ಉಲವ್ಣ್ಯಾಂತ್ ಬದ್ಲಾವಣ್, ಭುರ‍್ಗ್ಯಾಂಚೆ ಈಶ್ಟ್, ವ್ಹಡಿಲಾಂನಿ ಭುರ‍್ಗ್ಯಾಂಕ್ ದೀಜೆ ಜಾಲ್ಲೊ ವೇಳ್ ಆನಿ ತಾಂಚೆಂ ನಡ್ತೆಂ, ಘರಾಂತ್ಲೆ ಸಮಸ್ಯೆ ಆನಿ ಝಗ್ಡಿಂ, ಭುರ‍್ಗ್ಯಾಂಕ್ ದೀಜೆ ಜಾಲ್ಲೆಂ ಸ್ಥಾನ್‌ಮಾನ್ ಆನಿ ಅವ್ಕಾಸಾವಿಶಿಂ ವೈಗ್ಯಾನಿಕ್ ಜಾಣ್ವಾಯ್ ದೀಜೆ. ಭುರ‍್ಗ್ಯಾಂಕೀ ಭೊಗ್ಣಾಂ ಆಸಾತ್. ತಾಂಕಾಂ ಆಯ್ಕೊಂಕ್ ವ್ಹಡಿಲಾಂಕ್ ಸಮ್ಜೊಣಿ ಗರ‍್ಜೆಚಿ. 

5. ಸಮುದಾಯ್ ಆನಿ ಭುರ‍್ಗಿಂ: ಆಜ್ ಆಮ್ಚಿ ಸಮಾಜ್ ಧರ‍್ಮಿಕ್ ಆನಿ ರಾಜಕೀಯ್ ವರ‍್ತುಲಾಂನಿ ಜಾತ್ ಆಧಾರಿತ್ ಜಿಣ್ಯೆ ರೀತ್ ಶಿಕಯ್ತೆ ಆಸಾ. ಶಿಸ್ತ್ ನಾ, ಚುಕಿಂಕ್ ಶಿಕ್ಶಾ ನಾ. ಲೋಂಚ್ ಆನಿ ಇನ್‌ಫ್ಲೂಯೆನ್ಸ್ ಪ್ರಮುಕ್ ಪಾತ್ರ್ ಖೆಳ್ತಾ. ಜರ್ ಶಿಕ್ಷಣ್ ಆನಿ ನ್ಯಾಯ್‌ನಿತಿಚ್ಯೊ ಕೊಡ್ತಿ ಸಾರ‍್ಕ್ಯೊ ಜಾಲ್ಯೊ ತರ್ ವ್ಹಡಾಂಚ್ಯಾ ವ್ಹಾಣಾಂನಿ ಭುರ‍್ಗ್ಯಾಂಕ್ ಚಲಂವ್ಚಿ ಪ್ರವೃತ್ತಿ ರಾವ್ತೆಲಿ. ರಾವಜೆ.

6. ಇಸ್ಕೊಲಾಚಿಂ ಜವಾಬ್ದಾರಿ: ಹರ್ ಇಸ್ಕೊಲಾಚ್ಯಾ ಶಿಕ್ಷಕಾಂಕ್ ಕಡ್ಡಾಯ್ ಜಾವ್ನ್ ಭುರ‍್ಗ್ಯಾಂ ಹಕ್ಕಾಂವಿಶಿಂ ಮಾಹೆತ್ ಕಾರ‍್ಯಿಂ ಜಾಯ್ಜೆ ಆನಿ ತಾಂಣಿ ಸಂಬಂಧಿತ್ ಸಂಸ್ಥ್ಯಾಂಕ್ ವರ‍್ಸಾಕ್ ಏಕ್ ತರೀ ವರ‍್ದಿ ಧಾಡ್ನ್ ದೀಜೆ. ಸಬಾರ್ ಶಿಕ್ಷಕಾಂಕ್ ಭುರ‍್ಗ್ಯಾಂಚ್ಯಾ ಸಮಸ್ಸ್ಯಾಂವಿಶಿಂ ಪಡೊನ್ ಗೆಲ್ಲೆಂಚ್ ನಾ. ಕಸಲಿ ಸರ‍್ಕಾರಿ ವ್ಯವಸ್ಥಾ ಆಸಾ ತೆಂಯೀ ಕಳಿತ್ ನಾ. ಹರ್ ಸಮಸ್ಸ್ಯಾಂಕ್ ತಿಂಚ್ ಕೌನ್ಸಿಲರ್ ತಶೆಂ ಯೆಜ್ಮಾನ್ಪಣ್ ದಾಕಂವ್ಚಿ ಕಾಂಠಾಳಾಯೆಚಿ ಸಂಗತ್. ಇಸ್ಕೊಲಾಂನಿ ಆಜೂನ್ ಭುರ‍್ಗ್ಯಾಂ ಕೊಡ್ತಿವಿಶಿಂ, ಪೊಲೀಸ್ ಒಫಿಸರ್ ಕೋಣ್ ಮ್ಹಳ್ಳ್ಯಾವಿಶಿಂ, ಅಪ್ರಾದ್ ಕೆಲ್ಲೆಂ ಕೊಣಾಕ್ ಕಳಯ್ಜೆ, ಭುರ‍್ಗ್ಯಾಂ ರಕ್ಷಣ್ ಘಟಕ್ ಖಂಯ್ ಆಸಾ, ಕಶೆಂ ಕಾಮ್ ಕರ‍್ತಾ, ಭುರ‍್ಗ್ಯಾಂಕ್ ಗ್ರಾಮಸಭೆಕ್ ತಯಾರ್ ಕರ‍್ಚೆಂ ಕಸಲೆಂಚ್ ಗಣ್ಣೆಂ ನಾಸ್ತಾಂ ಆಸ್‌ಲ್ಲ್ಯಾನ್ ಭುರ‍್ಗಿಂ ಪಾಟೆ ಚುಕ್ತಾನಾ ಸಾರ‍್ಕೆ ವಾಟೆಕ್ ಹಾಡುಂಕ್ ಯೋಗ್ಯ್ ಮೆಸ್ತ್ರಿ ನಾ ಜಾಲ್ಯಾತ್.  ಥೊಡ್ಯಾ ದಿಸಾಂ ಆದಿಂ ಆಮ್ಚ್ಯಾಚ್ ಗಾಂವಾಂತ್ ಎಕಾ ಇಸ್ಕೊಲಾಚ್ಯಾ ೮,೯, ಆನಿ ೧೦ವ್ಯಾ ಕ್ಲಾಸಿಚ್ಯಾ ೨೭೦ ಭುರ‍್ಗ್ಯಾಂಕ್ ತರ‍್ಬೆತಿ ದಿತಾನಾ, ಹ್ಯಾ ಟೀನ್‌ಎಜಿಚ್ಯಾ ಭುರ‍್ಗ್ಯಾಂನಿ ತಾಂಚೆಂ ಸಮಸ್ಯೆ ಬರವ್ನ್ ದಿಲೆ. (ಮ್ಹಜೆಲಾಗಿಂ ತ್ಯೊ ಚಿಟಿ ಆಸಾತ್) ಸಬಾರ್ ಸಮಸ್ಯಾಂ ಪಯ್ಕಿ ೬೩ ಸಮಸ್ಯೆ ಲೈಂಗಿಕ್ ಶೋಶಣ್, ಕುಟ್ಮಾ ಸಾಂದ್ಯಾಥಾವ್ನ್ ಶೋಶಣ್, ಸೆಜಾರಿ ಅನಿ ವಾಹನಾಂನಿ ದಿಂವ್ಚ್ಯಾ ತೊಂದ್ರ್ಯಾ ವಿಶಿಂ ಬರವ್ನ್ ದಿಲ್ಲೆ ಆಸಾತ್. ಹ್ಯಾ ಭುರ‍್ಗ್ಯಾಂಕ್ ವಯಕ್ತಿಕ್ ಕೌನ್ಸಿಲಿಂಗ್ ಕರುನ್, ಸಮಸ್ಯಾಂಕ್ ಸ್ಪಂದನ್ ಕರುನ್ ಜೊಕ್ತೆಂ ಕ್ರಮ್ ಘೆಂವ್ಕ್ ಇಸ್ಕೊಲಾಚ್ಯಾ ಮುಕೆಲ್‌ಮೆಸ್ತಿರ‍್ಣಿಲಾಗಿಂ ದುಸ್ರ್ಯಾಚ್ ದಿಸಾ ಏಕ್ ಪತ್ರ್ ಬರವ್ನ್ ಪಾವಯ್ಲೆ. ಕ್ರಿಸ್ತಾಂವ್ ಮುಕೆಲ್ ಮೆಸ್ತಿರ‍್ಣ್ ಜಾವ್ನ್ ತಿಕಾಯ್ ದೊಗಾಂ ಟೀನ್‌ಏಜ್ ಚಲಿಯೊ ಆಸಾತ್. ತರೀ ತಿಣೆಂ ಹೊ ಸಮಸ್ಸೊ ಮತಿಕ್ ವ್ಹೆಲ್ಲೊಚ್ ನಾ. ಆತಾಂ ಶಿಕ್ಶಣ್ ಅಧಿಕಾರಿಂಕ್ ಹೊ ಸಮಸ್ಸೊ ಕಳಯ್ಲ್ಯಾರ್ ಆಮ್ಚೆರ್ ಭುರ‍್ಗ್ಯಾಂನಿ ದವರ್‌ಲ್ಲೊ ವಿಶ್ವಾಸ್ ಕುಸ್ಕಾತಾ ಆನಿ ಸಮಸ್ಯೆ ಪಬ್ಲಿಕ್ ಜಾತಾತ್. ಅಸಲ್ಯಾ ನಾ ಫಾವೊ ಶಿಕ್ಶಕಾಂಚ್ಯೆ ಹಾತಿಂ ಭುರ‍್ಗಿಂ ಖಂಯ್ ಪಾವ್ತಿತ್?

7. ಇಸ್ಕೊಲಾಂನಿ ಕೌನ್ಸಿಲಿಂಗ್ ಸೆವಾ: ಆಘಾತ್, ಅನಾಚಾರ್, ನಿಂದೆಕ್ ಒಳಗ್ ಜಾಲ್ಲ್ಯಾಂಕ್, ವೆವೆಗ್ಳ್ಯಾ ಸಮಸ್ಯಾಂಕ್ ಶಿರ‍್ಕಲ್ಲ್ಯಾ ಭುರ‍್ಗ್ಯಾಂಕ್ ವೆಳಾರ್ ಆನಿ ಸೂಕ್ತ್ ಸಮಾಲೋಚನ್ ವ್ಯವಸ್ತಾ  ಲಾಬ್ಲ್ಯಾರ್ ಮಾತ್ರ್ ಆಮ್ಚಿ ಭುರ‍್ಗಿಂ ಸುರಕ್ಷಿತ್. 

8. ಕಾನೂನ್ ಜ್ಯಾರಿಯೆಕ್ ಹಾಡ್ಚ್ಯಾಂತ್ ಹಸ್ತ್‌ಕ್ಷೇಪ್ ನಜೊ: ಭುರ‍್ಗ್ಯಾಂಕ್ ಲೈಂಗಿಕ್ ಅಪ್ರಾದಾಂ ಥಾವ್ನ್ ರಕ್ಷಣ್ (PಔಅSಔ) ಕಾನೂನ್ ಜಾರಿಯೆಕ್ ಹಾಡ್ಲಾಂ. ಪುಣ್ ಹಾಂಗಾ ಪೊಲೀಸ್, ರಾಜಕೀಯ್ ಫುಡಾರ‍್ಯಾಂಚೊ ದಬಾವ್ ಯೇವ್ನ್ ಹಸ್ತ್‌ಕ್ಷೆಪ್ ಚಡ್ತೇ ಆಸಾ. ತುರ‍್ತಾನ್ ನ್ಯಾಯ್ ದಿಂವ್ಚಿ ವ್ಯವಸ್ತಾ ಜಾಯ್ಜೆ.

9.  ಸಾಂಸ್ಥಿಕ್ ಘಟಕ್: ಹರ್‌ಎಕಾ ಜಿಲ್ಲ್ಯಾಂತ್ ಭುರ್ಗ್ಯಾಂಚ್ಯಾ ಹಕ್ಕಾಂಖಾತಿರ್, ನ್ಯಾಯ್ ನೀತ್ ಲಾಬ್ಚೆಖಾತಿರ್ ಸರ‍್ಕಾರಾ ಥಾವ್ನ್ ನ್ಯಾಯ್ ಮಂಡಳಿ ರಚಿತ್ ಜಾಲ್ಯಾ ಅWಅ ಅನಿ ಎಎಃ ಮ್ಹಳ್ಳೆ ಸಾಂಸ್ಥಿಕ್ ಘಟಕ್ ಆಸಾತ್ ತರೀ ಸರ‍್ಕಾರಿ ಅಧಿಕಾರಿ ಆನಿ ರಾಜಕೀಯ್ ಮುಕೆಲ್ಯಾಂಚೆಂ ಮೆತೆರ‍್ಪಣ್ ಭುರ‍್ಗ್ಯಾಂಚಿಂ ಹಕ್ಕಾಂ ಚಿರ‍್ಡಿತಾ. ಭುರ‍್ಗ್ಯಾಂಚೆಂ ರಕ್ಷಣ್ ಘಟಕ್, ಭುರ್ಗ್ಯಾಂಕ್ ಸಹಾಯವಾಣಿ  (೧೦೯೮) ಸಿಬ್ಬಂಧಿಕ್ ನಿಸ್ವಾರ‍್ತಿ ಸೆವಾ ದೀಂವ್ಕ್ ಅಡ್ಕಳಿ ಆನಿ ವಯ್ರ್ ಥಾವ್ನ್ ದಬಾವ್. ಹಾಕಾ ಪ್ರಮುಕ್ ಕಾರಣ್ ಲೊಕಾಚೆಂ ಮೆತೆರ‍್ಪಣ್ ಆನಿ ಹ್ಯಾ ಕಾನುನಾವಿಶಿಂ ಅನ್ಬೊಗ್ ನಾ ಆಸ್ಚೆಂ.

10. ಭುರ್ಗ್ಯಾಂಕ್ ಅಸುರಕ್ಷಿತ್ ಜಾಗೆ: ಜಂಯ್ ಚಡ್ ಸುರಕ್ಷಿತ್ ಜಾಗೊ ಮ್ಹಣ್ ವ್ಹಡಿಲಾಂ ಚಿಂತ್ತಾತ್‌ಗೀ, ತ್ಯಾ ಜಾಗ್ಯಾಂಚೆರ್ ವಿಶೇಸ್ ನದರ್ ದವರಿಜೆ. ಹೊಸ್ಟೆಲಾಂ, ಬೋರ‍್ಡಿಂಗಾಂ, ಪಿಜಿ, ಕುಟ್ಮಾದಾರಾಂಚಿಂ/ಸಯ್ರ್ಯಾಂಚಿಂ ಘರಾಂಯೀ ಆಜ್‌ಕಾಲ್ ಅಪಾಯಾಚಿಂ ಜಾಲ್ಯಾಂತ್. ಭುರ‍್ಗ್ಯಾಂನಿ ಪಯ್ಣ್ ಕರ‍್ಚಿಂ ವಾಹನಾಂ, ಚಾಲಕ್, ಸಹ ಪ್ರಯಾಣಿಕ್ ಸಗ್ಳ್ಯಾಂ ಥಾವ್ನ್ ರಿಸ್ಕ್ ಆಸಾ. ತ್ಯಾ ದೆಕುನ್ ಸುರಕ್ಶೆವಿಶಿಂ ಭುರ‍್ಗ್ಯಾಂಕ್ ಮಾಹೆತ್ ಆನಿ ಸ್ವರಕ್ಷಣ್ ಕಲಾ ಚಡ್ ಗರ‍್ಜೆಚಿ.

11. ಡಿಜಿಟಲ್ ಅಸುರಕ್ಷತಾ: ಆಯ್ಚ್ಯಾ ಕಾಳಾರ್ ಭುರ‍್ಗ್ಯಾಂಕ್ ಹಿ ಬೋವ್ ಮಾರೆಕಾರ್. ಸಮಾಜಿಕ್ ಮಾಧ್ಯಮಾಂ, ವಾಟ್ಸ್‌ಆಪ್, ಇನ್ಸ್ಟಾಗ್ರಾಂ,  ಇಂಟರ್ನೆಟ್ ಲಭ್ಯತಾ,  ಪೊರ್ನೊಗ್ರಫಿ, ಅಶ್ಲೀಲ್ ಪಿಂತುರಾಂ ಅನಿ ವಿಡಿಯೋ, ನಕಾರಾತ್ಮಕ್ ರೀಲ್ಸ್, ಸಮಾಜಿಕ್ ಮಾಧ್ಯಮಾಂ ಮುಕಾಂತ್ರ್ ಅಪರಿಚಿತ್ ವ್ಯಕ್ತಿಂಚೊ ಸಂಪರ‍್ಕ್, ಆನ್ಲೈನ್ ಗೇಮ್ಸ್ ಇತ್ಯಾದಿ ಭುರ‍್ಗ್ಯಾಂಚೊ ಫುಡಾರ್ ಪಿಡ್ಡ್ಯಾರ್ ಕರ‍್ಚಿಂ ಸಾಧನಾಂ. ಹ್ಯಾ ವಿಶಯಾಂಚೆರ್ ಭುರ‍್ಗ್ಯಾಂಕ್ ಸೂಕ್ತ್ ಶಿಕ್ಷಣ್ ಗರ‍್ಜೆಚೆಂ.

12. ಭುರ‍್ಗ್ಯಾಂಚ್ಯಾ ರಕ್ಷಣಾಂತ್ ವ್ಹಡಿಲಾಂಚೊ ಪಾತ್ರ್: ಸ್ವತಾಚ್ಯಾ ಭುರ‍್ಗ್ಯಾಂಚೆಂ ಮಾತ್ರ್ ನ್ಹಯ್ ಆಮ್ಚ್ಯಾ ಭೊಂವ್ತಿಂ ಆಸ್ಚ್ಯಾ ಹೆರ್ ಭುರ‍್ಗ್ಯಾಂಚಿಂ ಮಾಹೆತ್, ಆನಿ ಕೊಣಾಕ್ ಹೆ ವಿಶಿಂ ಸಾಂಗಜೆ ಮ್ಹಳ್ಳಿ ಜಾಣ್ವಾಯ್ ಹರ್ ಪೋಶಕಾಕ್ ಆಸಜೆ.

ವಿಶೇಸ್ ಲೊಕಾಗಡ್ದಿ ಆಸ್ಚ್ಯಾ ಲಾಗಿಂ ಆನಿ ಅಪರಿಚಿತ್ ವ್ಯಕ್ತಿಂಚೆಂ ಚಲನ್-ವಲನ್, ಫಕತ್ ಆಮ್ಚ್ಯಾ ಭುರ‍್ಗ್ಯಾಂಖಾತಿರ್ ನ್ಹಯ್, ಹೆರಾಂಚ್ಯಾಯೀ ಸುರಕ್ಷತೆಖಾತಿರ್ ಗರ‍್ಜ್. ಚಡ್ ಪೊಕ್ರಿ ಭುರ‍್ಗಿಂಯಿ ಆಸ್ತಾತ್. ತಾಂಚ್ಯಾ ವ್ಹಡಿಲಾಂಕ್ ನಾ ತರ್ ಭುರ‍್ಗ್ಯಾಂ ರಕ್ಷಣ್ ಸಮಿತಿಕ್ ಕಳಂವ್ಚೆಂ ಚಡ್ ಸೊಂಪೆಂ. 

ಜರ್ ಕೊಣೀ ಗರ‍್ಜೆಚಿ ಸಂಗತ್ ತುಜ್ಯಾ ಗಮನಾಕ್ ಹಾಡ್ಲ್ಯಾ ತರ್ ಗಾಂವಾರ್ ಗಾಜಂವ್ಚೆ ಆದಿಂ, ಭುರ‍್ಗ್ಯಾಚೆಂ ರಕ್ಶಣ್ ಆನಿ ತುಜೆರ್ ವಿಶ್ವಾಸ್ ಯೆಂವ್ಚ್ಯಾಬರಿ ಚಲಜೆ. ಕೊಣೀ ಆಧಾರಾಕ್ ಯೆತಾ ಮ್ಹಣಾಸರ್ ಸಾಂಗಾತಾ ರಾವಜೆ. ಭುರ‍್ಗ್ಯಾಂನಿ ವಾಪರ‍್ಚ್ಯಾ  ಡಿಜಿಟಲ್ ಮಾಧ್ಯಮಾಂ ವಯ್ರ್ ಜಾಗ್ರುತ್ಕಾಯ್ ಆನಿ ಜವಾಬ್ದಾರೆನ್ ತಾಂಕಾಂ ತಿದ್ವುಂಚಿ ಮಾಹೆತ್ ವ್ಹಡಿಲಾಂಕ್ ಕಳಿತ್ ಆಸಜೆ. 

ನಿಮಾಣೆಂ, ಭುರ‍್ಗಿಂ ಹ್ಯಾ ಸಮಾಜೆಚಿ ಆಸ್ತ್, ಕುಟ್ಮಾಂಚೊ ಗೌರವ್. ತಿಂ ನೆಣ್ತಿಂ ಆನಿ ತ್ಯಾ ಪ್ರಾಯೆರ್ ಸಹಜ್ ಜಾವ್ನ್ ಸಗ್ಳೆಂ ಸೊಭಿತ್ ದಿಸ್ತಾ ದೆಕುನ್ ಮೆಟಾಂ ಚುಕ್ತಾತ್. ತಾಂಚಿಂ ಮೆಟಾಂ ಸಾರ್ಕಿಂ ಕರ್ಚಿ ಜವಾಬ್ದಾರಿ ವ್ಹಡಿಲಾಂಚಿ.