Embedded Files
2025 ಜುಲಾಯ್ 21 ಸಕಾಳಿಂ 10.30ಕ್ ಸುರ‍್ವಾತುನ್ ಜೂನ್ 28 ದೊನ್ಪಾರಾಂ 12.15 ಪರ್ಯಾಂತ್ ನಿರಂತರ್ 170 ವೊರಾಂ ‘ರಿದಮ್ ಆಫ್ ರೆಸಿಲಿಯನ್ಸ್’ ಧ್ಯೇಯಾಖಾಲ್ ಭರತನಾಟ್ಯಮ್ ನಾಚ್ ಪ್ರದರ್ಶನ್ ಕೆಲ್ಲೆಂ ರೆಮೊನಾ ಇವೆಟ್ ಪಿರೇರಾ ಆಜ್ ಯುವಜಣಾಂಚೆಂ ರೋಲ್ ಮೊಡೆಲ್ ಜಾಲಾಂ.
ಹ್ಯಾ ಪ್ರದರ‍್ಶನಾಂತ್ ತಿಣೆ ಪುಷ್ಪಾಂಜಲಿ, ಜತಿಸ್ವರ್, ಕೌತ್ವಮ್, ಶಬ್ದಮ್, ವರ‍್ಣಾಂ, ಪದಮ್, ದಾಸರಪದ, ಸ್ತೋತ್ರಾಂ, ಕಾವಡಿ, ತಿಲ್ಲಾನ ಸಂಗಿಂ ಕುವೆಂಪು ರಾಮಾಯಣ, ಕೆಳದಿ ಚೆನ್ನಮ್ಮ, ದುರ್ಗಿ ವಿಜಯಮ್ ನಾಚ್ ಪ್ರಸ್ತುತ್ ಕೆಲೆ. ಶಿವತಾಂಡವ, ಯಶೋಧಾ-ಕೃಷ್ಣ, ಕೃಷ್ಣ ಲೀಲೆ, ದುರ್ಗಾ ಚರಿತೆ ತಸಲೆ ನಾಚ್ ಪ್ರದಾನ್ ಆನಿ ಭಾವ್ ಪ್ರಧಾನ್ ನಾಚ್ ಭೋವ್‌ಚ್ ಉತ್ತೀಮ್ ಥರಾನ್ ಪ್ರೇಕ್ಷಕಾಂಚ್ಯಾ ಕಾಳ್ಜಾಂಕ್ ನಾಟ್ವಾಸಾರ‍್ಕೆಂ ದಿಲ್ಲೆಂ ಪ್ರದರ್ಶನ್ ಸರ‍್ವಾಂಚೆ ಹೊಗ್ಳಿಕೆಕ್ ಫಾವೊ ಜಾಲೆಂ.
ಹರ್ ತೀನ್ ಘಂಟ್ಯಾಕ್ ಏಕ್ ಪಾವ್ಟಿಂ ೧೫ ಮಿನುಟಾಂಚೊ ಭೆಟ್ವೊಳ್ ಘೆಂವ್ಕ್ ತಾಕಾ ಆವ್ಕಾಸ್ ಆಸ್‌ಲ್ಲೊ. ತ್ಯೆ ಆವ್ದೆಂತ್ ತಾಣೆ ಪೊಟಾಕ್ ಘೆಜೆ, ಕುಡಿಚಿ ನಿತಳಾಯ್ ತಿರ‍್ಸಿಜೆ, ವಸ್ತುರ್ ಬದ್ಲಿಜೆ ಆನಿ ವಿಶೆವ್ ಘೆಜೆ ಆಸ್‌ಲ್ಲೆಂ. ಅಸಲೆಂ ಸಾಧನ್ ಭೋವ್ ಕಟೀಣ್ ತರೀ ರೆಮೊನಾಚಿ ಲಾಂಬ್ ಕಾಳಾಚಿ ತಯಾರಾಯ್, ತಿಚಿ ಆವಯ್ ಗ್ಲ್ಯಾಡಿಸ್ ಸೆಲಿನ್, ತಿಚಿ ಭರತನಾಟ್ಯಮ್ ಶಿಕ್ಷಕಿ ಸೌರಭ ಕಲಾ ಪರಿಷತ್ತಾಚಿ ದೊ| ವಿದ್ಯಾ ಮುರಳೀಧರ್ ಹಾಂಚೊ ಪ್ರೊತ್ಸಾವ್, ಸಹ-ವಿದ್ಯಾರ‍್ತಿಂಚೊ ಸಾಂಗಾತ್, ರೆಕ್ಟರ್ ಮೆಲ್ವಿನ್ ಜೋಸೆಫ್ ಪಿಂಟೊ ಜೆ.ಸ. ಆನಿ ಸೈಂಟ್ ಎಲೋಶಿಯಸ್ ಯುನಿವರ‍್ಸಿಟಿಚೊ ವೈಸ್‌ಚಾನ್ಸಲರ್ ದೊ| ಫಾ| ಪ್ರವೀಣ್ ಮಾರ‍್ಟಿಸ್ ಜೆ.ಸ. ಹಾಂಚೊ ಪಾಟಿಂಬೊ ತಾಕಾ ತಾಚೆಂ ಪಂಥಾಹ್ವಾನ್ ಯಶಸ್ವೆನ್ ಸಂಪಂವ್ಕ್ ಕಾರಣ್ ಜಾಲೊ.
‘ಪಯ್ಲ್ಯಾ ದಿಸಾಚ್ಯಾ ನಾಚಾವೆಳಿಂ ದಾಕಯಿಲ್ಲೆಂ ಕುಡಿ-ಮತಿಚೆಂ ಸಮತೋಲನ್ ನಿಮಾಣ್ಯಾ ನಾಚಾಚ್ಯಾ ನಿಮಾಣ್ಯಾ ಮೆಟಾ ಪರ್ಯಾಂತ್ ಉರವ್ನ್ ಘೆತ್‌ಲ್ಲೆಂಚ್ ವ್ಹಡ್ ಏಕ್ ಅಜ್ಯಾಪ್’ ಮ್ಹಣ್ತಾ ದೊ| ವಿದ್ಯಾ ಮುರಳೀಧರ್. ಭೋವ್ ಲ್ಹಾನ್ ಪ್ರಾಯೆರ್ ಥಾವ್ನ್ಂಚ್ ಹ್ಯಾ ಶಿಕ್ಷಕಿಚ್ಯಾ ಹಾತಾಖಾಲ್ ನಾಚ್ ಶಿಕೊನ್ ಆಸ್‌ಲ್ಲೆಂ ರೆಮೊನಾ ತಿಕಾ ‘ಮಾಂ’ ಮ್ಹಣ್‌ಚ್ ಉಲೊ ಕರ‍್ತಾ. ‘ಗೋಲ್ಡನ್ ಬುಕ್ ಆಫ್ ರೆಕೊರ್ಡ್ಸಾಂತ್ ಭೋವ್ ಲಾಂಬ್ ಆವ್ದೆಕ್ ಭರತನಾಟ್ಯಮ್ ನಾಚ್ ನಾಚ್‌ಲ್ಲೊ ದಾಖ್ಲೊ ರಚ್‌ಲ್ಲ್ಯಾ ರೆಮೊನಾಚೆಂ ಸಾಧನ್ ಆಸ್ಚೆಂಚ್ ನಿರಂತರ್ ಅಭ್ಯಾಸಾ ಮಾರಿಫಾತ್ ತಾಕಾ ತಾಚೆ ಕುಡಿಚೆರ್ ಆನಿ ಮತಿಚೆರ್ ಆಸ್ಚ್ಯಾ ನಿಯಂತ್ರಣಾಚೆರ್! ಸಾಮಾನ್ಯ್ ಮನ್ಶಾಂಕ್ ಹೆಂ ಖಂಡಿತ್ ಅಸಾಧ್ಯ್’ ಮ್ಹಣ್ತಾ ದೊ| ವಿದ್ಯಾ.
ಜಿಣ್ಯೆಂತ್ ಕಿತೆಂಯ್ ತರೀ ಕರ‍್ನ್ ದಾಕಯ್ಜೆ. ತಶೆಂ ಕಿತೆಂಯ್ ಕರ‍್ಚೆಂ ತರ್ ಅಸಾಧ್ಯ್ ಆಸ್ಚೆಂಚ್ ಕರ‍್ನ್ ದಾಕಯ್ಜೆ ಮ್ಹಳ್ಳ್ಯಾ ಹಟಾಕ್ ಲಾಗ್‌ಲ್ಲೆಂ ರೆಮೊನಾ ಲ್ಹಾನ್ ಪ್ರಾಯೆ ಥಾವ್ನ್ಂಚ್ ದಾಖ್ಲೆ ರಚುನ್ ಆಯ್ಲಾಂ. ಹಾಕಾ ಲಾಗೊನ್ ಇಕ್ರಾ ವರ‍್ಸಾಂಚೆ ಪ್ರಾಯೆರ್‌ಚ್ ತಾಕಾ ಭರತನಾಟ್ಯಮಾಂತ್ ೧೦೫ ಪ್ರಾಸ್ ಚಡಿತ್ ಪುರಸ್ಕಾರ್ ಲಾಭ್‌ಲ್ಲೆ ಖಾತಿರ್ ತಿಚೆಂ ನಾಂವ್ ಇಂಡಿಯಾ ಬುಕ್ ಆಫ್ ರೆಕೊರ್ಡ್ಸಾಂತ್ ದಾಖಲ್ ಜಾಲ್ಲೆಂ. ೨೦೨೨ವ್ಯಾ ವರ‍್ಸಾ ತಾಚೆ ೧೬ ವರ‍್ಸಾಂಚ್ಯೆ ಪ್ರಾಯೆರ್ ತಾಕಾ ಪ್ರಧಾನ್ ಮಂತ್ರಿಚೊ ‘ಬಾಲ್ ಪುರಸ್ಕಾರ್’ ಲಾಬ್‌ಲ್ಲೊ. ಭರತನಾಟ್ಯಮ್ ಸೀನಿಯರ್ ಪರೀಕ್ಷೆಂತ್ ಡಿಸ್ಟಿಂಕ್ಷನ್ ಅಂಕಾಂಸವೆಂ ಉತ್ತೀರ‍್ಣ್ ಜಾವ್ನ್ ‘ವಿದ್ವತ್’ ಹಂತಾಚೆಂ ಶಿಕಪ್ ಜೋಡ್ನ್ ಆಸ್ಚ್ಯಾ ರೆಮೊನಾಚೆಂ, ೨೦೧೯ ಇಸ್ವೆಂತ್ ಚಲ್‌ಲ್ಲೆಂ ರಂಗಪ್ರವೇಶ್ ಕಾರ‍್ಯೆಂ ಭೋವ್‌ಚ್ ಫಾಮಾದ್ ಜಾಲ್ಲೆಂ.
ಕ್ಲಾಸಿಕಲ್ (ಭರತನಾಟ್ಯಮ್), ಸೆಮಿಕ್ಲಾಸಿಕಲ್, ಸಮಕಾಳಿಕ್, ಹಿಪ್‌ಹೊಪ್ ನಾಟ್ಯ್ ಶಿಕೊನ್ ಆಸ್ಚೆಂ ರೆಮೊನಾ ಗ್ಲಾಸಾಚ್ಯಾ ಖೊಂಚಿ ವಯ್ರ್, ತಾಂಬ್ಯಾಚೆ ಬೊಶಿಯೆಚೆರ್, ಮಾತ್ಯೆಚ್ಯಾ ಮೊಡ್ಕೆಚೆರ್, ರುಕಾಚ್ಯಾ ರೊಲಾಚೆರ್, ಹುಲಾಹೂಪ್ ವಾಪರ‍್ನ್ ನಾಚ್ತಾ. ಹಾತಾಂತ್ ದಿವೊ ಘೆವ್ನ್, ಉಜ್ಯಾಚ್ಯೊ ದೊಂದಿ ಘೆವ್ನ್, ತಕ್ಲೆರ್ ಉಜ್ಯಾಚೊ ಬುಡ್ಕುಲೊ ದವರ‍್ನ್, ಖಿಳ್ಯಾಂಚೆರ್, ಸ್ಕೇಟಿಂಗ್ ಶೂ ಘಾಲ್ನ್, ಪಾಯಾಂಕ್ ಬಡ್ಗೊ ಬಾಂದುನ್ -ಅಶೆಂ ವೆವೆಗ್ಳ್ಯಾ ಪ್ರಕಾರಾಂಚೊ ನಾಚ್ ವೆವೆಗ್ಳ್ಯಾ ರಿತಿಂನಿ ಪ್ರದರ್ಶನ್ ಕರ‍್ಚೆಸವೆಂ ನಾಚ್ ನಾಚ್ತಾನಾ ತಕ್ಲೆರ್ ಬುಡ್ಕುಲೊ ದವರ‍್ನ್ ಚ್ಹಾ ಕರ‍್ತಾ!
ಆಪ್ಲ್ಯಾ ೧೭೦ ವೊರಾಂಚ್ಯಾ ನಾಚ್ ಪ್ರದರ‍್ಶನಾಂತ್ ಕು| ರೆಮೊನಾನ್ ಭರತನಾಟ್ಯಮಾಚೆ ವಿವಿಧ್ ಪ್ರಕಾರ್ ಜಾವ್ನಾಸ್ಚೆ ಅಲೆರಿಪ್ಪು, ಜತಿಸ್ವರಮ್, ಶಬ್ದಮ್, ವರ್ಣಮ್, ಪದಮ್, ತಿಲ್ಲಾಣ, ಸೆಮಿಕ್ಲಾಸಿಕ್ ಆನಿ ಭಕ್ತಿಕ್ ಶಾಸ್ತ್ರೀಯ್ ಸಂಗೀತಾಕ್ ಸರ್ ಜಾವ್ನ್ ನಾಚ್ ನಾಚ್‌ಲ್ಲೊ. ಪಾಟ್ಲ್ಯಾ ಜಾಯ್ತ್ಯಾ ತೆಂಪಾಥಾವ್ನ್ ದಿಸಾಕ್ ಪಾಂಚ್‌ಥಾವ್ನ್ ಸ ವೊರಾಂಚೊ ಕಟೀಣ್ ಅಭ್ಯಾಸ್, ಖಣಾ-ಜೆವ್ಣಾಂತ್ ಬದ್ಲಾವಣ್ ಕರ‍್ನ್ ಫಕತ್ ಕೆಳಿಂ, ಧಂಯ್, ಬೊಂಡ್ಯಾ ಉದಕ್, ಉಕಡ್ನ್ ಮೊಡ್ಡಿ ಜಾಲ್ಲೆಂ ಸುರಯ್ ತಾಂದ್ಳಾಚೆಂ ಶಿತ್ ಜೇವ್ನ್ ತಯಾರಿ ಕೆಲ್ಲಿ.
ರೆಮೊನಾಚೊ ಹೊ ಜಾಗತಿಕ್ ದಾಕ್ಲೊ ಮಂಗ್ಳುರಾಕ್ ನಾಂವ್ ಹಾಡುಂಕ್ ಸಕ್ಲಾ. ಋಣಾತ್ಮಕ್ ಕಾರಣಾಂಕ್ ಲಾಗೊನ್ ಮಂಗ್ಳುರ‍್ಚೆಂ ನಾಂವ್ ವಿದ್ರೂಪ್ ಜಾಲ್ಲ್ಯಾ ಹ್ಯಾ ಕಾಳಾರ್ ರೆಮೊನಾಚ್ಯಾ ಹ್ಯಾ ದಾಖ್ಲ್ಯಾನ್ ಹಾಂಗಾಚ್ಯಾ ಲೊಕಾ ಮಧೆಂ ಧನಾತ್ಮಕ್ ಸಂಚಲನ್ ಆಸಾ ಕೆಲಾಂ.
ಫುಡ್ಲೆಂ ಮಿಸಾಂವ್
ರೆಮೊನಾ ಯೆದೊಳ್‌ಚ್ ವಿಕಲಚೇತನ (ಅಪಾಂಗ್) ಭುರ‍್ಗ್ಯಾಂಕ್, ಅವ್ಕಾಸ್ ವಂಚಿತ್ ಭುರ‍್ಗ್ಯಾಂಕ್, ತಿಸ್ರ್ಯಾ ಲಿಂಗಾಚ್ಯಾಂಕ್ ನಾಚ್ ತರ‍್ಬೆತಿ ದಿತಾ. ಫುಡಾರಾಂತ್ ಭರತನಾಟ್ಯಮಾಂತ್ ಪಿಹೆಚ್‌ಡಿ ಕರ‍್ನ್ ಹೆಂಚ್ ಮಿಸಾಂವ್ ಮುಕಾರುನ್ ವ್ಹರ‍್ಚಿ ಆಶಾ ತಿಚಿ.
ನಾಚ್ಪಾಂತ್ ರೆಮೊನಾ ಪುರ‍್ವಿಲೆ ದಾಖ್ಲೆ
ರೆಮೊನಾಚ್ಯಾಕೀ ಆದಿಂ ಭೋವ್ ಲಾಂಬ್ ಆವ್ದೆಕ್ ನಾಚ್ ನಾಚ್‌ಲ್ಲೊ ದಾಖ್ಲೊ ಕು| ಶುತಿ ಸುಧೀರ್ ಜಾಗ್‌ತಾಪ್ ಹಿಚ್ಯಾ ನಾಂವಾರ್ ಆಸಾ. ೧೬ ವರ‍್ಸಾಂಚಿ ಹಿ ಚಲಿ ಮಹರಾಷ್ಟ್ರಾ, ಲಾತೂರ‍್ಚ್ಯಾ ದಯಾನಂದ ಕೊಲೆಜಿಚಿ ವಿದ್ಯಾರ‍್ತಿಣ್ ಜಾವ್ನಾಸ್‌ಲ್ಲಿ. ತಿಣೆ ೨೦೨೩, ಮೇ ೨೯ ಥಾವ್ನ್ ಜೂನ್ ೩ ಪರ್ಯಾಂತ್ ನಿರಂತರ್ ೧೨೭ ವೊರಾಂ ಕಥಕ್ ನಾಚ್ ನಾಚೊನ್ ಹೊ ದಾಖ್ಲೊ ರಚ್‌ಲ್ಲೊ. ತಿಚ್ಯಾಕೀ ಆದಿಂ ೨೦೧೮ ಇಸ್ವೆಚ್ಯಾ ನವೆಂಬರ್ ೨೩ ಥಾವ್ನ್ ನವೆಂಬರ್ ೨೮ ಪರ್ಯಾಂತ್ ನೇಪಾಳ್ಚ್ಯಾ ಬಂದನಾ ನೇಪಾಳ್ ಹಿಣೆ ನಿರಂತರಿ ೧೨೬ ವೊರಾಂ ನಾಚೊನ್ ದಾಖ್ಲೊ ರಚ್‌ಲ್ಲೊ ತರ್ ತಿಚ್ಯಾಕೀ ಆದಿಂ ಭೋವ್ ಚಡ್ ವೇಳ್ ನಾಚ್ ನಾಚ್‌ಲ್ಲೊ ದಾಖ್ಲೊ ೩೭ ವರ‍್ಸಾಂ ಪ್ರಾಯೆಚ್ಯಾ ಕಲಾಮಂಡಲಮ್ ಹೇಮಲತಾ ಹಿಚ್ಯಾ ನಾಂವಾರ್ ಆಸ್‌ಲ್ಲೊ. ತಿ ನಿರಂತರ್ ೧೨೩ ಗಂಟೆ ೧೫ ಮಿನುಟಾಂ ಮೊಹಿನಿಯಾಟ್ಟಮ್ ಮ್ಹಳ್ಳೊ ಶಾಸ್ತ್ರೀಯ್ ನಾಚ್ ನಾಚ್‌ಲ್ಲಿ.
_____________________________________________
ರೆಮೊನಾಚ್ಯಾ ಸಾಧನಾಂಚಿ ಪಟ್ಟಿ
ನಾಚಾಖಾತಿರ್ ಶೆಂಬರಾಂ ವಯ್ರ್ ಪುರಸ್ಕಾರ್ ಜೊಡ್‌ಲ್ಲ್ಯಾ ತಿಚೆಂ ನಾಂವ್ ಇಂಡಿಯಾ ಬುಕ್ ಆಫ್ ರೆಕೊರ್ಡ್ಸ್, ಗೊಲ್ಡನ್ ಬುಕ್ ಆಫ್ ರೆಕೊರ್ಡ್ಸ್ (ಲಂಡನ್), ಮ್ಯಾಜಿಕ್ ಬುಕ್ ಆಫ್ ರೆಕೊರ್ಡ್ಸ್ ಆನಿ ಭಾರತ್ ಬುಕ್ ಆಫ್ ವರ್ಲ್ಡ್ ರೆಕೊರ್ಡ್ಸ್ -ಹಾಂತುಂ ದಾಖಲ್ ಜಾಲಾಂ.
ದೇಶಾಚ್ಯಾ ೧೮ ರಾಜ್ಯಾಂನಿ ಭೋವ್ ಶ್ರೇಶ್ಟ್ ವೆದಿಂನಿ ತಿಣೆ ನಾಚ್ ಪ್ರದರ್ಶನಾಂ ದಿಲ್ಯಾಂತ್.
೨೦೧೭ವ್ಯಾ ವರ‍್ಸಾ ತಿಕಾ ರಾಜ್ಯೋತ್ಸವ ಪುರಸ್ಕಾರ್, ೨೦೨೧ವ್ಯಾ ವರ‍್ಸಾ ಬಾಲಗೌರವ್ ಪುರಸ್ಕಾರ್ ಲಾಬ್ಲ್ಯಾತ್.
೨೦೨೨ವ್ಯಾ ವರ‍್ಸಾ ಪ್ರಧಾನ್‌ಮಂತ್ರಿ ರಾಶ್ಟ್ರೀಯ್ ಪುರಸ್ಕಾರ್ ಮೆಳ್ಳೊ ಮಾತ್ರ್ ನ್ಹಯ್ ಪ್ರಧಾನಿಸಂಗಿಂ ಆನ್‌ಲೈನ್ ಸಂವಾದ್ ಕರ‍್ಚೊ ಅವ್ಕಾಸ್‌ಯಿ ಲಾಬ್‌ಲ್ಲೊ.
ಭರತನಾಟ್ಯಮಾಂತ್ ರಾಜ್ಯ್ ಮಟ್ಟಾರ್ ಭಾಂಗ್ರಾ ಪದಕ್, ಕಲಾ ಸಂಸ್ಕೃತಿ ಸನ್ಮಾನ್, ಭರತ ನಾಟ್ಯಾ ಕಲಾಶ್ರೀ ರತ್ನ ಪುರಸ್ಕಾರ್, ಕೊರ್ನಾಕ್ ನೃತ್ಯ್ ಕಲಾ ಪುರಸ್ಕಾರ್, ರಾಶ್ಟ್ರೀಯ್ ಗೌರವ್ ಪುರಸ್ಕಾರ್, ಪ್ರೈಡ್ ಆಫ್ ಇಂಡಿಯಾ ಪುರಸ್ಕಾರ್, ನೃತ್ಯಶ್ರೀ, ನೃಪತುಂಗಾ ಪುರಸ್ಕಾರ್, ನೃತ್ಯ ಮಯೂರಿ ಪುರಸ್ಕಾರ್, ನೃತ್ಯ ಕಲಾ ಸನ್ಮಾನ್, ಬೆಸ್ಟ್ ಚೈಲ್ಡ್ ಆರ್ಟಿಸ್ಟ್ ಆವಾರ್ಡ್, ನೃತ್ಯ ಗುಣಶ್ರೀ -ಅಶೆಂ ತಿಚ್ಯಾ ಪುರಸ್ಕಾರಾಂಚಿ ಪಟ್ಟಿ ವಾಡೊನ್ಂಚ್ ವೆತಾ.
Google Sites
Report abuse