Embedded Files
ಘರ್ ಬಾಂದುನ್ ಪಳೆ, ಕಾಜಾರ್ ಕರ‍್ನ್ (ಜಾವ್ನ್) ಪಳೆ ಮ್ಹಣ್ಚೊ ಕಾಳ್ ಆಸ್‌ಲ್ಲೊ. ಪುಣ್ ಪ್ರಸ್ತುತ್ ಆರ‍್ತಿಕತೆಚ್ಯಾ ಕಾಳಾರ್ ದುಡ್ವಾಚೆಂ ಕಾರ‍್ಬಾರ್ ಚಲ್ತಾನಾ ಬೊಂಗ್ಲೊ ಬಾಂದ್ಯೆತ್ ಆನಿ ರಾಯಾಳ್ ಕಾಜಾರ್ ಜಾವ್ಯೆತ್. ರೀಣ್ ಕಾಡ್ನ್ ಘರ್ ಬಾಂದ್ಲೆಂ, ನಾ ತರ್ ವಿಕುನ್ ಸೊಡ್ಲೆಂ. ಪುಣ್ ಆಡಂಬರಾಚೆಂ ಕಾಜಾರ್ ವರ‍್ಸಾನ್ ಡೈವೋರ‍್ಸ್ ಜಾಲ್ಯಾರ್ ನಿಮಾಣೆ ಕೊಣಾಕ್ ಕೊಣ್ ನಾ!
ವಿಪರ‍್ಯಾಸ್ ಪಳೆಯಾ... ಲಗ್ನಾ ಜಿವಿತಾಚೊ ಅನ್ಬೊಗ್ ನಾತ್‌ಲ್ಲ್ಯಾಂನಿ, ರೆಸ್ಪೆರ್ ಜಾಯ್ನಾತ್ಲ್ಯಾಂನಿ (ಯಾಜಕಾಂನಿ) ಭಲಾಯ್ಕಿ ಮಾಗ್ಚಿ, ಕಿತ್ಯಾಕ್‌ಗೀ ಹಾಸ್ಯಾಸ್ಪದ್ ಆನಿ ನಕ್ಲಾಂ ಕರ‍್ಚೆಬರಿ ಆಯ್ಕೊಂಕ್ ಮೆಳ್ತಾ. ಜಿಣಿಯೆಂತ್ ಎಕ್‌ಚ್ ಪಾವ್ಟಿಂ, ಪಯ್ಲೆ ಪಾವ್ಟಿಂ ಮ್ಹಣ್ ಆಡಂಬರಾನ್ ಕಾಜಾರ್ ಜಾಂವ್ಚೆಂ ತೆಂ ದಿಕಾವಟ್, ನಾಟಕ್ ಜಾತಾ. ಆಸ್‌ಲ್ಲ್ಯಾಂನಿ ದುಡು ಪಿಟೊ ಕೆಲ್ಯಾರ್ ಪರ‍್ವಾನಾ, ತ್ಯಾ ನಿಬಾನ್ ತರ್‌ಯೀ ಕಾಜಾರಾ ಸಂಭ್ರಮಾಂತ್ ಇವೆಂಟ್ ಮ್ಯಾನೆಜ್‌ಮೆಂಟಾಕ್ ಆನಿ ಕಾಜಾರಾಕ್ ಸರ‍್ಬಾರಾಯ್ ಕರ‍್ತೆಲ್ಯಾಂಕ್ ಬಿಜ್ನೆಸ್ ಜಾಯ್ತ್. ಪುಣ್ ಮಧ್ಯಮ್ ವರ‍್ಗಾಚ್ಯಾಂನಿ ರೀಣ್ ಕಾಡ್ನ್ ಕಾಜಾರ್ ಕೆಲೆಂ ತರ್ ಕಿತೆಂ ಜಾಯ್ತ್? ಬಿಲ್ಲಾಂ ಫಾರಿಕ್ ಕರ‍್ಚೆ ಆದಿಂ ಡೈವೋರ‍್ಸ್ ಜಾಯ್ತ್ ತರ್ ಕೋಣ್ ಜವಾಬ್ದಾರ್. ಹಸ್ತಿನ್ ಲದ್ದಿ ಘಾಲ್ಲಿ ಪಳೆವ್ನ್ ಸೊಂಸೊ ಬಿಕ್ಕೊನ್ ಮೆಲೊ ಅಶಿ ಗತ್ ಜಾಯ್ತ್.
ಪಯ್ಶಿಲೆಂ ಚೆಡುಂ ಹಾಡಿಜೆ, ಲಾಗ್ಶಿಲಿ ಗಾಯ್ ಹಾಡಿಜೆ...
ಬೆಂದುರ‍್ಚ್ಯಾಕ್ ಬೈಂದೂರ‍್ಚೆಂ, ಆತ್ತೂರ‍್ಚ್ಯಾಕ್ ಪುತ್ತುರ‍್ಚೊ ಅಶೆಂ ಸಯ್ರಿಕ್ ಘಡ್ತಾ. ಕಾಜಾರಿ ಭಾಂದಾಂತ್ ಏಕ್ ಮನ್ ಆನಿ ಏಕ್ ಕೂಡ್ ಜಾವ್ನ್ ಲಗ್ನಾಂತ್ ಎಕ್ವಟ್ಚೆಂ ಆನಿ ಭುರ‍್ಗ್ಯಾ ಬಾಳಾಂಕ್ ಜಲ್ಮ್ ದೀವ್ನ್ ಕುಟಮ್ ಬಾಂದ್ಚಿ ಜವಾಬ್ದಾರಿ ಆಸ್ತಾ. ಸುರ‍್ವೆರ್ ಕಿರಾಸಾಳೆರಿಚಿ ಜೊಡಿ, ಮ್ಹೊಂವ್ ಆನಿ ಮೂಸ್, ಚಂದ್ರ್ ಆನಿ ನಕ್ತಿರ್ ಉತ್ರಾಂನಿ ಸಜಯ್ಲ್ಯಾರೀ ವರ‍್ಸಾಂ ಗೆಲ್ಲೆಂಚ್ ಪರ‍್ನೆಂ ಜಾತಾ ಕಶೆಂ?
ಸಯ್ರಿಕೊ ಘಡ್ತಾತ್ ಸರ‍್ಗಾರ್ ಖಂಯ್, ಪುಣ್ ಡೈವೋರ‍್ಸ್ ಜಾಂವ್ಚೆ ಮಾರ‍್ಗಾರ್. ಕ್ಷುಲ್ಲಕ್ ಕಾರಣಾಕ್ ವಿಚ್ಛೇದನ್ ಜಾಂವ್ಚೆಂ ಆನಿ ಕಾನೂನಾತ್ಮಕ್ ಥರಾನ್ ದಾದ್ಲ್ಯಾನ್ ಬಾಯ್ಲೆಕ್ ಅರ‍್ದೊ ವಾಂಟೊ ದಿಂವ್ಚ್ಯಾಂತ್ ಅರ‍್ತ್ ನಾ.
ಚೆಡ್ವಾಚ್ಯಾ ಬಾಪಾಯ್ನ್ ಆಪ್ಲೆ ಧುವೆಚ್ಯಾ ಸಯ್ರಿಕೆಕ್ ಲಾಗೊನ್ ಮಯ್ಲಾಂ ಮಯ್ಲಾಂ ಚಲೊನ್ ಆಪ್ಲಿ ಏಕ್ ಜೋಡ್ ವ್ಹಾಣ್ ಜರಯ್ಲಿ ನಾ! ಆವಯ್ನ್ ಪರ‍್ಗಾಂವಾಂತ್ ಹಾಂಡಿಯೊ ಘಾಸುನ್ ಚಲ್ಯಾಂಕ್ ಫುಡಾರ್ ದಿಲ್ಲೊ ನಾ! ಆದಿಂ ಸಯ್ರಿಕೆಚೊ ಮ್ಹಾಲಿ ನಾಸ್ತಾನಾ ಗಳ್ ಮೆಳಾನಾತ್‌ಲ್ಲಿ. ಐಟಿ ಯುಗ್ ಸುರ‍್ವಾತ್ ಜಾವ್ನ್ ಸಾಮಾಜಿಕ್ ಜಾಳಿಜಾಗ್ಯಾಂನಿ ಮ್ಯಾಟ್ರಿಮೊನಿಯಲ್ ಆಪ್ ಮುಕಾಂತ್ರ್, ನಾ ತರ್ ಮೊಗಾರ್ ಪಡೊನ್ ತರ್‌ಯೀ ಕಾಜಾರ್ ಜಾತಾಲಿಂ. ಪ್ರಸ್ತುತ್ ಪರಿಗತ್ ಸಗ್ಳಿ ಉಲ್ಟಿ ರಾವ್ಲ್ಯಾ. ಸಯ್ರಿಕ್ ಕರ‍್ತೆಲ್ಯಾಂಕ್ ಪಂಚ್ವೀಸ್ ಹಜಾರ್ ಯೆಟಿಜೆ. ಥೊಡಿಂ ಧಾ ಹಜಾರ್ ಎಡ್ವಾನ್ಸ್ ವಿಚಾರ‍್ನ್ ಉಪ್ರಾಂತ್ ಗೊಂಯ್ಟಾಂ ದಾಕಯ್ತಾತ್.
ಸಯ್ರಿಕ್ ಕಶಿ ಜಾಂವ್ಚಿ? ಮುಂಡಾಸ್‌ಗಾರ್ ಯೇನಾ, ಕಂಡ್ಡೆಗಾರಾಂಕ್ ದೀನಾ ಮ್ಹಳ್ಳೆಬರಿ.
ಹ್ಯಾ ಎಕಾ ಸೈರಿಕೆಚ್ಯಾ ಆಪೊವ್ಣ್ಯಾಕ್ ಜಾಯ್ತ್ಯೊ ಗಜಾಲಿ ಉಗ್ತಾಡಾಕ್ ಆಯ್ಲೊ. ಜಾಯ್ತ್ಯೊ ಮಜೆದಾರ್ ಗಜಾಲಿ ಆಯ್ಕೊಂಕ್ ಮೆಳ್ಳ್ಯೊ ತ್ಯೊ ಖಾಸ್ಕಿ ಗಜಾಲ್ಯೊ ಹಾಂಗಾಸರ್ ಬರಂವ್ಕ್ ನಾಕಾ ಮ್ಹಣ್ ಭೊಗ್ತಾ. ಆರ‍್ವಾಸ್ ೮೦ವ್ಯಾ ದಶಕಾಂತ್ ಜಲ್ಮಲ್ಲ್ಯಾ ೪೦-೫೦ ಪ್ರಾಯೆಚ್ಯಾ ದಾದ್ಲ್ಯಾಂಚಿ ವಿನೊವ್ಣಿ ಚಡ್ ಆಸ್‌ಲ್ಲಿ. ಪಾಂಚ್ವಿ, ಆಟ್ವಿ ಧಾವಿ ಆನಿ ಪಿಯುಸಿ ಜಾವ್ನ್ ಡಿಪ್ಲೊಮಾ ಕರ‍್ನ್ ವಾವ್ರ್ ಕರ‍್ಚೆ, ಜೆ ಸಾದೆಂ ಕಾಮ್ ಕರ‍್ಚೆ ಕೃಶಿಕ್. ಜಿಯೊಂವ್ಚ್ಯಾಕ್ ಕಸಲಿ ವ್ಯಾಪ್ತ್ ಕರ‍್ಚಿ, ಘರ್‌ದಾರ್ ಆಸೊನ್ ಮಹಿನ್ಯಾಕ್ ೫೦-೬೦ ಹಜಾರ್ ಜೊಡ್ಚೆ ಅಶೆಂ ಕಾಜಾರಾಚ್ಯಾ ಸಾಕ್ರಾಮೆಂತ್ ಜೊಡುಂಕ್ ರಾಕೊನ್ ರಾವ್‌ಲ್ಲೆ. ಅಸಲ್ಯಾ ಚಲ್ಯಾಂಕ್ ತಾಂಚ್ಯಾ ಶಿಕ್ಪಾಕ್ ಹೊಂದ್ವೊಂಚಿ ಚೆಡ್ವಾಂ ಕಿತ್ಯಾಕ್ ಮೆಳಾನಾಂತ್? ಆಮ್ಚಿಂ ಚೆಡ್ವಾಂ ಖಂಯ್ ಗೆಲ್ಯಾಂತ್? ಅಸಲ್ಯಾ ಚಲ್ಯಾಂಕ್ ಚೆಡ್ವಾಂ ಕಿತ್ಯಾಕ್ ಖಾಯ್ಸ್ ಕರಿನಾಂತ್. ಎಕೆಚ್ ಜಾಪಿನ್ ನೊ/ನಾಕಾ ಮ್ಹಣ್ತಾತ್ ಕಿತ್ಯಾಕ್?
ಕಾರಾಣಾಂ ಜಾಯ್ತಿಂ ಆಸಾತ್. ಹಾಂತುಂ ಪ್ರಮುಕ್ ಕಾರಣ್ ಶಿಕಪ್. ಬಸೊಂಕ್ ಮಣಯ್ ನಾತ್‌ಲ್ಲ್ಯಾ ಕುಟ್ಮಾಂಚ್ಯೊ ಚಲಿಯೊ ಪರ‍್ಯಾಂತ್ ಡಿಗ್ರಿ ವಾ ಡಬ್ಬಲ್ ಗ್ರ್ಯಾಜುವೇಟ್ ಶಿಕಪ್ ಜೊಡ್ತಾತ್. ಎಮ್.ಬಿ.ಎ, ಐಟಿ ಮಟ್ಟಾಚೆಂ ಶಿಕಪ್ ಜೊಡುನ್ ಪರ‍್ಗಾಂವಾಂತ್ ವಾವ್ರ್ ಕರ‍್ತೆಲ್ಯಾ ಚಲಿಯಾಂನಿ ಡಿಪ್ಲೊಮಾ ಜಾಲ್ಲ್ಯಾ ಚಲ್ಯಾಕಡೆಂ ಕಾಜಾರ್ ಜಾಂವ್ಚೆಂ ತರ್‌ಯೀ ಕಶೆಂ? ಅಸಲೆ ಪರಿಗತೆಂತ್ ಚಲಿಯಾಂಚಿ, ಫುಡಾರಾಚಿಂ ಸಪ್ಣಾಂ ಆನಿ ಡಿಮಾಂಡ್ ಮಾಸ್ಳೆಚ್ಯಾ ಪಾವ್ಲಾಂಬರಿ ಕೊಣಾಯ್ಕಿ ಪಾರ‍್ಕುಂಕ್ ಜಾಯ್ನಾ. ‘ಆಮ್ಚೊ ಚಲೊ ಕಸಲಿಯೀ ವಾಯ್ಟ್ ಸವಯ್ ನಾತ್‌ಲ್ಲೊ ಬರೊ ಭುರ‍್ಗೊ, ಕಶೆಂಯ್ ತರೀ ಕರ‍್ನ್ ಏಕ್ ಚೆಡುಂ ತಲಾಸ್ ಕರ‍್ನ್ ದಿಯಾ’ ಮ್ಹಣ್ ಆಡ್ದೊಸ್ ಮಾಗ್ಚ್ಯಾ ಕುಟ್ಮಾಚ್ಯಾಂಕ್ ಕಿತೆಂ ಜಾಪ್ ದಿಂವ್ಚಿ?
ಮಾಜ್ರಾಕ್ ಗಾಂಟ್ ಬಾಂದ್ಚಿ ಕೊಣೆ?
ಪ್ರಾಯ್ ರಾವಾನಾ, ಎಕ್ಸುರ‍್ಯಾ ಜಿಣಿಯೆಕ್ ಜಿಣಿಯೆ ಸಾಂಗಾತಿಣೆಚಿ ಗರ‍್ಜ್ ಕಿತ್ಲಿ ತೆಂ ಚಲ್ಯಾಕ್ ಪಳೆತಾನಾ ಕಳ್ತಾ. ಆಮ್ಚ್ಯಾ ಸಮುದಾಯಾಚೊ ಹೊ ಏಕ್ ಗಂಭೀರ್ ಸಮಸ್ಸೊ. ವಾರಾಡ್ಯಾ ಹಂತಾರ್, ಕಥೊಲಿಕ್ ಸಭೆಚೆ ಸಾವ್ಳೆಂತ್ ಫಿರ‍್ಗಜೆಂನಿ ಅಸಲ್ಯಾ ಚಲ್ಯಾ-ಚಲ್ಯಾಂಕ್ ವಿಂಚುನ್ ಕಾಡುನ್ ಸಯ್ರಿಕೆಚೊ ಪ್ರಸ್ತಾಪ್ ಕಾಡ್ಲ್ಯಾರ್ ಕಾಂಯ್ ತರೀ ಬರೆಂಪಣ್ ಜಾಯ್ತ್. ದಿಯೆಸೆಜಿ ಹಂತಾರ್ ‘ಮೀಟ್ ಆನಿ ಗ್ರೀಟ್’ ಕಾರ‍್ಯೆಂ ಆಸಾ ಕೆಲ್ಲೆಂ, ತಾಂತುಂ ಉಣ್ಯಾರ್ ಪಾಂಚ್ ಸಯ್ರಿಕೊ ಘಡ್ಲ್ಯಾತ್ ತರ್ ಖುಶೆಚಿ ಗಜಾಲ್. ಹರ‍್ಯೆಕ್ ಫಿರ‍್ಗಜ್ ವಿಗಾರಾಕ್ ಜವಾಬ್ದಾರಿ ದಿಂವ್ಚ್ಯಾಕ್‌ಯೀ ಲಾಯಿಕ್ ಮುಕೆಲ್ಯಾಂನಿ ಹ್ಯೆ ವಿಶಿಂ ಚಿಂತಪ್ ಆಟಯ್ಲ್ಯಾರ್ ಬರೆಂ.
150 ಚಲ್ಯಾಂಕ್ 10 ಚಲಿಯೊ!
ಸಯ್ರಿಕ್ ಸಂಗಮ್ ರದ್ದ್ ಜಾಲೆಂ.
ಆದ್ಲ್ಯಾ ಮಹಿನ್ಯಾಂತ್ ಕಥೊಲಿಕ್ ಸಭಾ, ಬಜ್ಜೊಡಿ ಘಟಕಾನ್ ಏಕ್ ವೆಗ್ಳೆಂಚ್ ಚಿಂತಪ್ ಜಾವ್ನ್ ‘ಸಯ್ರಿಕ್ ಸಂಗಮ್’ ಕಾರ‍್ಯೆಂ ಆಸಾ ಕರ‍್ತಾಂವ್ ಮ್ಹಣ್ ಜಾಹಿರ್ ಕೆಲೆಂ. ಹಾಚೊ ಮುಕೆಲ್ ಉದ್ದೇಶ್ ಆಮ್ಚ್ಯಾ ಕ್ರಿಸ್ತಾಂವ್ ಸಮುದಾಯಾಂತ್ ಜಾಯ್ತ್ಯಾ ಯುವಜಣಾಂಕ್ ವಿವಿಧ್ ಕಾರಾಣಾಂಕ್ ಲಾಗೊನ್ ಸಯ್ರಿಕ್ ಮೆಳನಾಸ್ತಾಂ, ತಾಂಚ್ಯಾ ಪುಡಾರಾಚಿ ದಿಶಾನಾಸ್ತಾಂ ಎಕಾ ಥರಾಚ್ಯಾ ಖಂತಿನ್ ಆನಿ ಬೆಜಾರಾಯೆನ್ ತಿಂ ಜಿಯೆತಾತ್ ದೆಕುನ್, ಅಸಲೆಂ ಕಾರ‍್ಯೆಂ ಆಸಾ ಕರ‍್ಚೆಂ ಗರ‍್ಜೆಚೆಂ ಜಾವ್ನಾಸ್ಲೆಂ. ವಿಧುರ್/ವಿಧವ್ ಆನಿ ಡೈವೋರ‍್ಸ್ ಜಾಲ್ಲ್ಯಾ ಎಕೊಡ್ಯಾಂಕ್‌ಯೀ ಆವ್ಕಾಸ್ ಆಸ್‌ಲ್ಲೊ.
ವಾಟ್ಸಪ್ ಖಬ್ರೆಕ್ ಬರೆಂ ಸ್ಪಂದನ್ ಮೆಳ್ಳೆಂ. ಮಂಗ್ಳುರ್, ಉಡ್ಪಿ ದಿಯೆಸೆಜ್ ನ್ಹಯ್ ಆಸ್ತಾಂ ಉತ್ತರ್ ಕನ್ನಡ, ಮುಂಬಯ್, ಬೆಂಗ್ಳುರ್, ಘಾಟ್ ಆನಿ ಕೇರಳ ಥಾವ್ನ್ ತಸ್ವಿರೆಸಂಗಿಂ ನಾಂವ್, ಗಾಂವ್, ಶಿಕಪ್ ವೃತ್ತೆಚೊ ವಿವರ್ ಪಾವ್ಲೊ. ಫೊನಾಂ ಕರ‍್ನ್ ವಿಚಾರ್ ಕೆಲ್ಲಿಂ ಜಾಯ್ತಿಂ.
ಹ್ಯಾ ಸಯ್ರಿಕ್ ಸಂಗಮಾಂತ್ ಖಾಸ್ಕೆನ್ ಹಾಜರ್ ಜಾಂವ್ಕ್ ಉಲೊ ದಿಲ್ಲ್ಯಾನ್, ಯೇಂವ್ಕ್ ಜಾಯ್ನಾತ್‌ಲ್ಲ್ಯಾ ಗಲ್ಫಾಚ್ಯಾ, ಇಸ್ರಾಯೆಲ್ ಆನಿ ಬೆಂಗ್ಳುರ‍್ಚ್ಯಾಂನಿ ಆನ್‌ಲೈನ್ ಸಂಗಮ್ ಆಸಾ ಕರ‍್ತಾತ್‌ಗೀ ಮ್ಹಳ್ಳಿ ಆಶಾ ದಾಕಯ್ಲಿ. ಕಿತೆಂಯೀ ಜಾಂವ್ ಸುಮಾರ್ ೧೫೦ ಯುವಜಣಾಂಚೆಂ ಪ್ರೊಫಾಯ್ಲ್ ಆಯಿಲ್ಲಿ ತಿ ಖುಶೆಚಿ ಗಜಾಲ್. ಪೂಣ್... ಹ್ಯಾ 150 ಜಣಾಂತ್ ಚೆಡ್ವಾಂನಿ ಧಾಡ್‌ಲ್ಲಿ ಪ್ರೊಫಾಯ್ಲ್ ಕಿತ್ಲಿಂ ಆಸ್ತಿತ್? ಮೆಜೂನ್ 10 ಚಲಿಯಾಂಚಿಂ! ತಾಂತುಂ ದೊಗಾಂ ಡೈವರ‍್ಸ್, ಉರ್‌ಲ್ಲ್ಯೊ ಆಂಕ್ವಾರ್ ಚಲಿಯೊ ಪದ್ವಿ ಜಾಲ್ಲ್ಯೊ ಆಸೊನ್ ಧಾವಿ ಆನಿ ಪಿಯುಸಿಚಿಂ ಕೊಣ್‌ಯೀ ನಾತ್‌ಲ್ಲಿಂ. ಎಕೆ ಕುಶಿನ್ ಮಾಲ್ವಾಲ್ಲೊ ಜಮೊ ಆಸ್‌ಲ್ಲ್ಯಾನ್ ಆಮಿ ಆಸಾ ಕರ‍್ಚೆಂ ಕಾರ‍್ಯೆಂ ನಿಮಾಣೆಂ ರದ್ದ್ ಕೆಲೆಂ.
Google Sites
Report abuse