Cover story

ಸಂಗೀತಾಚೆಂ ತಾಲೆಂತ್ ಜಲ್ಮಾಥಾವ್ನ್ ಆಯಿಲ್ಲೆಂ ಮ್ಹಣ್ಚ್ಯಾಂತ್ ದುಬಾವ್ ನಾ ತರೀ ತರ‍್ನೆಪ್ರಾಯೆಚ್ಯಾ ಸಹಜ್ ಹಠಾಕ್ ಆನಿ ಜಿದ್ದಿ ಸಂಯ್ಭಾಕ್ ಲಾಗುನ್ ತಾಣೆ ಸಭಾರ್ ಆವ್ಕಾಸ್ ಹೊಗ್ಡಾವ್ನ್ ಘೆತ್ಲೆ ಆಸ್ಯೆತಾ. ‘ಭೊವ್‌ಶಾ ‘ಚಾಫ್ರಾ’ ತಸಲೊ ಗುರು ತಾಕಾ ಮೆಳುನ್ ಜಿವಿತಾಕ್ ಸ್ಪಶ್ಟ್ ದಿಶ್ಟಾವೊ ಆನಿ ಶೆವಟ್ ದಾಕಯಿಲ್ಲ್ಯಾನ್ ಎರಿಕಾಚಿ ತಾಂಕ್ ಸಾರ‍್ಕೆ ವಾಟೆನ್ ಮುಕಾರ್ ವಚುನ್ ಕೊಂಕ್ಣಿ ಮಾಯೆಚಿ ಗ್ರೇಸ್ತ್‌ಕಾಯ್ ಚಡಿತ್ ವಾಡ್ಲಿ.

ಸಭಾರ್ ಪ್ರತಿರೋಧಾಮಧೆಂ ಕೊಂಕ್ಣಿ ಸಂಗೀತಾಕ್ ನವೆಂ ರೂಪ್ ದಿಂವ್ಚ್ಯಾಕ್ ಮ್ಹಣ್ ಸುರ‍್ವಾತ್ಲಲಿಂ ಎರಿಕಾಚಿಂ ವಿಭಿನ್ನ್ ಆನಿ ಶಿಂಪ್ಡಿಂ ಪ್ರೇತನಾಂ ತಾಚ್ಯಾ ಖಳ್ಮಿತ್‌ನಾತ್‌ಲ್ಲ್ಯಾ ವಾವ್ರಾನಿಮ್ತಿಂ ಆನಿ ಸಾಂಗೊಡ್ಯಾಂಚ್ಯಾ ಸಹಕಾರಾನ್ ಕ್ರಮೇಣ್ ವೆವಸ್ತಿತ್ ರೂಪ್ ಘೆವ್ನ್ ಏಕ್ ಬಲಿಶ್ಟ್ ಸಂಘಟನ್ ಆನಿ ಸಂಸ್ಥೊ ಜಾವ್ನ್ ವಾಡುಂಕ್ ಸಕ್ಲಿಂ. ರಂಗ್‌ತರಂಗ್, ಮಾಂಡ್‌ಸೊಭಾಣ್ ಖಂಯ್‌ಗೀ ಯೇವ್ನ್ ಠಿಕ್ಲಿಂ. ಕೋಣ್ ಕಿತೆಂ ಮ್ಹಣುಂ ಎರಿಕಾಚೆಂ ಹಠ್ ಆಸ್‌ಲ್ಲ್ಯಾನ್ ಆಜ್ ಮಾಂಡ್‌ಸೊಭಾಣ್ ಆಸಾ ಆನಿ ಮಾಂಡ್‌ಸೊಭಾಣಾಚೆಂ ಕೇಂದ್ರ್ ಜಾವ್ನ್ ಕಲಾಂಗಣ್ ಆಸಾ.

ಎರಿಕಾಚಿ ಚಿಂತ್ಪಾ ಸಕತ್ ಆನಿ ನಿರೀಕ್ಷೆಚಿ ತಾಂಕ್ ತಶೆಂಚ್ ದಿಶ್ಟಾವೊ ಭೋವ್ ವ್ಹಡ್, ತಾಣೆ ರುಪಿತ್ ಕರ‍್ಚಿಂ ಖಂಚಿಂಯ್ ಕಾಮಾಂ ಲ್ಹಾನ್ ಮಟ್ಟಾರ್ ಆಸುಂಕ್ ಸಾಧ್ಯ್‌ಚ್ ನಾಂತ್, ಕಾಂಯ್ ಯೆದೆಶೆಂ ಕಾರ‍್ಯೆಂ ತರೀ ತೆಂ ತಾಕಾ ಮಜ್ಭೂತ್ ಆನಿ ವಿಸ್ತಾರ್ ವ್ಯಾಪ್ತೆಚೆಂ ಜಾಯ್ಜೆ. ತಾಣೆ ಸುರ‍್ವಾತ್ಲಲಿಂ ಸಂಘಟನಾಂ ಜಾಗತಿಕ್ ವ್ಯಾಪ್ತೆಚಿಂ. ತೊ ಕೆದಿಂಚ್ ಅಲ್ಪತೃಪ್ತ್ ನ್ಹಂಯ್ ಬಗಾರ್ ಮೊಳಬ್‌ಚ್ ತಾಕಾ ಮೀತ್. ಸಾಂತ್, ಭೊಂವ್ಡಿ, ಪುನೊವ್, ಬೈಲಾ ಲಿಯಾಯ್ಲೊ, ವಿಶ್ವ ಕೊಂಕ್ಣಿ ಸಮ್ಮೇಳನ್, ಕೊಂಕ್ಣಿ ನಿರಂತರಿ, ಜಾಗತಿಕ್ ಕಥೊಲಿಕ್ ಸಮ್ಮೇಳನ್, ಮಾಂಡೊ ಫೆಸ್ತ್ ಅಸಲಿಂ ವ್ಹಡ್ ಕಾರ‍್ಯಿಂ ಆಮ್ಚೆ ಮಧೆಂ ಜಾವ್ನ್ ಗೆಲಿಂ ತರ್ ತಾಚೆ ಪಾಟ್ಲ್ಯಾನ್ ಎರಿಕಾಚೊ ದಿಶ್ಟಾವೊ ಆನಿ ವಾವ್ರಾಶಯ್ಲಿ ವ್ಹಡ್ ಪಾತ್ರ್ ಖೆಳ್ಳಾ. 

ಎರಿಕಾಚ್ಯಾ ದಿಶ್ಟಾವ್ಯಾಖಾಲ್ ತಾಚ್ಯಾ ಸಾಂಗಾತ್ಯಾಂನಿ ಮಾಂಡುನ್ ಹಾಡ್‌ಲ್ಲಿಂ ಸದಾಂಚಿಂ ಕಾರ‍್ಯಿಂ ಕಿತ್ಲ್ಯಾ ನಮುನ್ಯಾಚಿಂ! ಮಾಂಡ್‌ಸೊಭಾಣ್, ಆಂಗಣ್ ಸೊಭಾಣ್, ಗುಮಟ್ ಸೊಭಾಣ್, ಭಕ್ತಿ ಸೊಭಾಣ್, ಭುರ‍್ಗ್ಯಾಂಲೆಂ ಸೊಭಾಣ್, ಜೆವಣ್ ಸೊಭಾಣ್, ಮಾಟೊವ್ ಸೊಭಾಣ್, ಬಾಯ್ಲಾ ಶೋ, ನಾಚ್ ಸೊಭಾಣ್, ಸಂಗೀತ್ ಸೊಭಾಣ್/ ದಬ್ದಬೊ, ದಬಾಜೊ, ಮೊಗಾ ಸೊಭಾಣ್, ಕೊಂಕಣಿ ದರ‍್ಶನ್, ಕವಿತಾ ಸೊಭಾಣ್, ಯುವ ಮಹೋತ್ಸವ್, ಬಸ್ಣಿ, ಕೊಂಕಣಿ ನಿಯಾಳ್, ಸೊಭಾಣಾಂ ಸಾಂಜ್, ಚಲಿಯಾಂಲೆಂ ಸೊಭಾಣ್, ಫೊಕಾಣ್ ಸೊಭಾಣ್,  ಕಲಾಕುಲ್ ನಾಟಕ್, ಕೊಂಕಣಿ ಫಿಲ್ಮೋತ್ಸವ್, ಭುರ‍್ಗ್ಯಾಂಲೊ ನಾಟಕೋತ್ಸವ್, ಸುಮೇಳ್, ಹರ‍್ಯೆಕಾ ವರ‍್ಸಾಚೆಂ ಕೊಂಕ್ಣಿ ರಜೆ ಶಿಬಿರ್, 

ಹಾ! ಕಿತ್ಲಿಂ ಕಾರ‍್ಯಕ್ರಮಾಂ! ಕೋಣ್ ಮ್ಹಣಾ, ಎರಿಕಾಚ್ಯಾ ಹಾತಾಂತ್ ಧಮ್ಡಿ ನಾತ್‌ಲ್ಲಿ ಮ್ಹಣುನ್, ಧಮ್ಡಿ ನಾತ್‌ಲ್ಲೊ ಹೆಂ ಇತ್ಲೆಂ ಸಕ್ಕಡ್ ಕರ‍್ಚ್ಯಾಕ್ ಕಸೊ ಸಕ್ಲೊ? ಕೊಣೆಂ ದಾನ್ ದಿಲೆಂ, ಕೊಣೆಂ ಪಾಟಿಂಬೊ ದಿಲೊ ಮ್ಹಣ್ ಸಾಂಗ್ಯೆತಾ. ಪೂಣ್ ತಾಕಾ ಪಾಟಿಂಬೊ ದಿತಲ್ಯಾಂಕ್ ತಾಚೆಥಂಯ್ ಕಿತೆಂ ವಿಶಿಶ್ಟ್ ದಿಸ್‌ಲ್ಲೆಂ? ತಾಚ್ಯಾ ದೊಳ್ಯಾಂತ್ಲೊ ಪ್ರಕಾಸ್?, ತಾಚ್ಯಾ ಉತ್ರಾಂಚೆಂ ದೃಢ್‌ಪಣ್, ತಾಚೆಥಂಯ್ ಭರುನ್ ಆಸ್‌ಲ್ಲೊ ಥಿರ್ ಭರ‍್ವಸೊ?

ಎರಿಕಾಕ್ ಸರ‍್ಕಾರಾನ್ ವ್ಹರ‍್ತೊ ಆವ್ಕಾಸ್ ಆಸಾ ಕರ‍್ನ್ ದಿಲೊ. ಕರ್ನಾಟಕ ಕೊಂಕಣಿ ಸಾಹಿತ್ಯ್ ಅಕಾಡೆಮಿಚೊ ಅಧ್ಯಕ್ಷ್ ತೊ ಜಾಲೊ ಆನಿ ಅಶೆಂ ಆಸ್ತಾನಾ ಮಹತ್ವಾಚೆ ಪುಸ್ತಕ್ ತಾಚೆ ಕಾಳಾರ್ ಪರ‍್ಗಟ್ಲೆ (ಅರ‍್ಥ್‌ಕೋಶ್, ಸಬ್ಧ್‌ಕೋಶ್, ಕಾವ್ಯಾಂಸಂಗ್ರಹ್, ಕಾಣಿಯಾಂ ಸಂಗ್ರಹ್, ಕೊಂಕ್ಣಿ ಲೋಕ್ ಸಮುದಾಯಾಚೆಂ ಅಧ್ಯಯನ್, ಕೊಂಕ್ಣಿ ಮಹಾನ್ ಮನ್ಶಾಂಚೊ ಸಂಗ್ರಹ್ ಇತ್ಯಾದಿ) ಹೆ ಸರ‍್ವ್ ಪುಸ್ತಕ್ ಆಜೂನ್ ಅಧ್ಯಯನಾಕ್ ಆಕರ್ ಗ್ರಂಥ್ ಜಾವ್ನ್ ಉರ‍್ಲ್ಯಾತ್. ಅಕಾಡೆಮಿಚೊ ಅಧ್ಯಕ್ಷ್ ಜಾವ್ನ್ ಎರಿಕಾಚೆಂ ನಾಂವ್ ಖಂಡಿತ್ ಶಾಶ್ವಿತ್ ಉರ‍್ತಲೆಂ ಮ್ಹಣ್ಚ್ಯಾಕ್ ತಾಣೆ ಶಾಳಾಂನಿ ಕೊಂಕ್ಣಿ ಹಾಡ್ಚ್ಯಾಕ್ ಕೆಲ್ಲಿಂ ತಿಂ ಸಾಧನಾಂಚ್ ಪುರೊ. 

ಸರ‍್ಕಾರಾ ಮುಕಾರ್ ವೆತಾನಾ, ಪಯ್ಲೆಂ ತುಮಿ ತುಮ್ಚೆಸ್ತಕಿಂ ಪ್ರಾಯೋಗಿಕ್ ರಿತಿನ್ ಕೊಂಕ್ಣಿ ಶಿಕಂವ್ಕ್ ವಾವುರಾ ಆನಿ ತುಮ್ಚ್ಯಾ ಖರ‍್ಚಾರ್ ಶಾಳೆಚ್ಯಾ ವೆವಸ್ತ್ಯಾ ಭಾಯ್ರ್ ಕೊಂಕ್ಣಿ ಶಿಕಯಾ ಮ್ಹಣ್ತಾನಾ, ಎರಿಕಾನ್ ತ್ಯಾಚ್ ಖಿಣಾ ತ್ಯೆ ದಿಶೆನ್ ಮೆಟಾಂ ಕಾಡ್ಲಿಂ. ಪಾಠ್‌ಪುಸ್ತಕ್ ತಯಾರ್ ಕೆಲೆ, ಶಿಕ್ಷಕಾಂಚ್ಯೊ ಜಮಾತ್ಯೊ ಆಪಯ್ಲ್ಯೊ, ಶಿಕ್ಷಕಾಂಕ್ ತಯಾರ್ ಕೆಲೆಂ, ಶಾಳಾಂಚ್ಯಾ ವ್ಹಡಿಲಾಂಕ್ ಭೆಟುನ್ ತಾಂಚಿಂ ಮನಾಂ ವ್ಹಯ್ ಕೆಲಿಂ, ಕಿತ್ಲೆಂ ಕಾಮ್ ತ್ಯಾ ದಿಸಾಂನಿ ಚಲ್ತಾಲೆಂಗೀ ಮ್ಹಳ್ಯಾರ್ ಎರಿಕಾ ತಸಲೊ ಮುಕೆಲಿ ನಾತ್‌ಲ್ಲೊ ತರ್ ಖಂಡಿತ್ ಹಿ ಗಜಾಲ್ ಪೊಂತಾಕ್ ಪಾವ್ತಿನಾ. ಹ್ಯಾ ಮಧೆಂ ಶಾಳೆಂತ್ ಕೊಂಕ್ಣಿ ಶಿಕಯ್ತಾನಾ ಖಂಚಿ ಲಿಪಿಗೀ ಮ್ಹಣ್ ವಾದ್ ಸುರ‍್ವಾತುನ್ ತೊ ವಿವಾದ್ ಜಾವ್ನ್ ಘುಸ್ಪಾಗೊಂದೊಳ್ ಜಾಲೊ. ತೊ ಗೊಂದೊಳ್ ಎರಿಕಾನ್ ಸುಕ್ಶಿಮಾಯೆನ್ ಸೊಡಂವ್ಕ್ ಪ್ರೇತನಾಂ ಕೆಲಿಂ ತರೀ ಘುಸ್ಪಡ್ ಉರ‍್ಲಿಚ್. 

ತಾಚ್ಯಾ ನಿರಂತರ್ ಪ್ರೇತನಾನಿಮ್ತಿಂ ೨೦೦೭ಚ್ಯಾ ಮಾರ‍್ಚ್ ೧೩ ವೆರ್ ಸರ‍್ಕಾರಾನ್ ಶಾಳೆಂನಿ ಕೊಂಕ್ಣಿ ಶಿಕಂವ್ಕ್ ಪರ‍್ವಣ್ಗಿ ದಿಲಿ. ವ್ಹಡ್ ಸಂಭ್ರಮ್ ತವಳ್ ಚಲಯಿಲ್ಲೊ, ಕಾಂಯ್ ದೋನ್ ತೀನ್ ವರ‍್ಸಾಂ ಶಾಳಾಂನಿ ಕೊಂಕ್ಣಿ ಶಿಕಪ್ ವ್ಹಡ್ ದಾಮ್‌ಧುಮೆನ್ ಚಲ್ಲೆಂ. ಪೂಣ್ ಮಾಗಿರ್ ಸದಾಂಚೆಂ ಜಾಲೆಂ. 

ಎರಿಕಾಕ್ ಆನಿ ತಾಚ್ಯಾ ಸಭಾರ್ ಸಾಂಗಾತ್ಯಾಂಕ್, ಸಂಗಿಂ ವಾವ್ರ್ ಕರ‍್ತಾನಾ ಸಹಜ್ ಭಿನ್ನ್ ಅಭಿಪ್ರಾಯೊ ಯೆತಾಲ್ಯೊ. ಎರಿಕ್ ಬಳಾನ್ ಆನಿ ವ್ಹಡ್ ಆವಾಜಾನ್ ಪ್ರತಿವಾದ್ ಮಾಂಡ್ತಾಲೊ ತರೀ ಉಲೊವ್ಪಾ ಉಪ್ರಾಂತ್ ಖಂಚ್ಯಾಯ್ ಉತ್ರಾಕ್ ಧರ‍್ನ್ ದುಸ್ಮಾನ್ಕಾಯ್ ಕರ‍್ಚ್ಚಿ ಸವಯ್ ತಾಕಾ ನಾತ್‌ಲ್ಲಿ. ಪೂಣ್ ತಾಚ್ಯಾ ಉತ್ರಾಂಚೊ ಮಾರ್ ಖೆಲ್ಲೆ ಖಂಯ್‌ಗೀ ಕುಸ್ಕಾಲ್ಲ್ಯಾ ಮನಾಂತ್ ಮುಂದರ್‌ಲ್ಲೆ ಸಭಾರ್ ಸಂದರ‍್ಭ್ ಆಮ್ಕಾಂ ಪಳೆಂವ್ಕ್ ಮೆಳ್ತಾತ್. ಆಪ್ಲೆಂ ಚಿಂತಪ್  ಮಾಂದಿನಾಂತ್ ತಾಂಕಾಂ ಸಯ್ತ್ ವಾಡಾವಳಿಚೆ ಸಭಾರ್ ಆವ್ಕಾಸ್ ತಾಣೆ ಕರ‍್ನ್ ದಿಲ್ಲೆ. ಆಜ್, ‘ಎರಿಕಾನ್ ಮ್ಹಾಕಾ ಫುಡಾರಾಚಿ ವಾಟ್ ದಾಕಯಿ’ ಮ್ಹಣ್ ಪ್ರಾಮಾಣಿಕ್‌ಪಣಿ ಮಾನ್ಚೆ ಆನಿ ಖರ‍್ಯಾನ್ ತಾಚೆಥಾವ್ನ್ ಮಾರ‍್ಗದರ‍್ಶಿತ್ ಜಾಲ್ಲೆ ಸಭಾರ್ ಕಲಾಕಾರ್ ಆನಿ ಹೆರ್ ಆಮ್ಚೆ ಮಧೆಂ ಆಸಾತ್ ತೆಂ ಖಂಡಿತ್.

ಎರಿಕ್ ಆಮ್ಚೆ ಮುಕಾರ್ ಗೆಲಾ. ಆಪ್ಲ್ಯೆ ಶಾಥಿಯೆಪರ‍್ಮಾಣೆಂ ತಾಣೆಂ ಬರೆಂ ಮ್ಹಣ್ ಚಿಂತ್‌ಲ್ಲೆಂ ತೆಂ ಸಕ್ಕಡ್ ಕರ‍್ನ್ ಗೆಲಾ. ತಾಚೆಥಾವ್ನ್ ಕಿತೆಂ ಬರೆಂ ಜಾಲಾಂ, ತೆ ವಿಶಿಂ ಇತಿಹಾಸ್ ಉಲೊಂವ್ಚೆಪ್ರಾಸ್ ಫುಡಾರ್‌ಚ್ ಉಲಯ್ತಲೊ. ಕಿತ್ಯಾಕ್ ಎರಿಕ್ ಫುಡಾರಾಚೆಂ ಚಿಂತುನ್ ಮುಕಾರ್ ಮೆಟಾಂ ಕಾಡ್ಚ್ಯಾ ಸಂಯ್ಭಾಚೊ.

ಅಬ್ಬಾ, ತಿಂ ಮೆಟಾಂಗೀ ಬಾಕ್ಕಾರಾಂ!