Cover story

ಜಾತಿ ವೆವಸ್ತಾ, ಶೋಶಣಾಕ್ ಒಳಗ್ ಜಾಲ್ಲೆ ದಲಿತ್ ಧರುನ್ ದುಬ್ಳ್ಯಾ ಜಾತಿಂಚೆ ಲಾಕೊಂ ಲೋಕ್ ಕ್ರಿಸ್ತಾಂವ್ ತಶೆಂಚ್ ಮುಸ್ಲಿಂ ಧರ‍್ಮಾಕ್ ಮತಾಂತರ್ ಜಾಲ್ಯಾತ್. ಅಸಲೆ ದಲಿತ್ ಮತಾಂತರ್ ಜಾಲ್ಯಾ ಉಪ್ರಾಂತ್‌ಯಿ ಸಮಾಜಿಕ್-ಆರ‍್ತಿಕ್ ಅಸಮಾನತಾ ಫುಡ್ ಕರ‍್ನ್ ಆಸಾತ್. ತಶೆಂ ಜಾಲ್ಲ್ಯಾನ್ ತಾಂಕಾಂ ಪರಿಶಿಶ್ಟ್ ಜಾತ್ (ಎಸ್ಸಿ) ಮ್ಹಣ್‌ಚ್ ಲೆಕುನ್, ಸವ್ಲತಾಯ್ ದೀಜೆ ಮ್ಹಣ್ ಜಾಯ್ತ್ಯಾ ಧಾಕ್ಡ್ಯಾಂಥಾವ್ನ್ ದಲಿತ್ ಕ್ರಿಸ್ತಾಂವ್ ಆನಿ ದಲಿತ್ ಮುಸ್ಲಿಂ ವಿಚಾರ‍್ನ್ ಆಸಾತ್.

ಸಂವಿಧಾನಾಚೆ ೩೪೧ವೆ ಅಡ್ತಿಗೆ ಪಂದಾ ಎಸ್ಸಿ ಸಮುದಾಯ್, 342ವೆ ಅಡ್ತಿಗೆ ಪಂದಾ ಪರಿಶಿಶ್ಟ್ ಪಂಗಡ್ ಆನಿ 340ವೆ ಅಡ್ತಿಗೆ ಪಂದಾ ಹೆರ್ ಪಾಟಿಂ ಉರ್‌ಲ್ಲೆ ವರ‍್ಗ್ (ಒಬಿಸಿ) ಗುರ‍್ತ್ ಕೆಲ್ಯಾತ್. ಎಸ್ಸಿ ಪಟ್ಟೆಕ್ ನವ್ಯೊ ಜಾತಿ ಭರ‍್ತಿ ಕರ‍್ಚೆಂ ಯಾ ಕಾಡ್ಚೊ ಅಧಿಕಾರ್ ಸಂಸತ್ತಾಕ್ ಮಾತ್ರ್ ಆಸಾ. ಸಂಸದಾಚ್ಯಾ ನಿರ‍್ದಾರಾ ಉಪ್ರಾಂತ್ ರಾಶ್ಟ್ರ್‌ಪತಿ ತಾಕಾ ದಸ್ಕತ್ ಘಾಲ್ನ್ ಅಧಿಕೃತ್ ಕರ‍್ತಾ.

ಎಕ್ಲೊ ಎಸ್ಸಿ ವೆಕ್ತಿ ಹಿಂದೂ ಧರ‍್ಮಾಥಾವ್ನ್ ಹೆರ್ ಧರ‍್ಮಾಕ್ ಮತಾಂತರ್ ಜಾಲ್ಯಾರ್, ತಾಕಾ ಎಸ್ಸಿ ಮ್ಹಣ್ ಪರಿಗಣನ್ ಕರುಂಕ್ ಜಾಯ್ನಾ ಮ್ಹಣ್ 341ವಿ ಅಡ್ತಿಗ್ ಸಾಂಗ್ತಾ. 1950 ಇಸ್ವೆಂತ್, ಹಿಂದೂ ಮಾತ್ರ್ ಎಸ್ಸಿ ಮ್ಹಣ್ ಸಂವಿಧಾನಿಕ್ ಆದೇಶಾ ಮುಕಾಂತ್ರ್ ಪರಿಗಣನ್ ಕೆಲ್ಲೆಂ. ಉಪ್ರಾಂತ್ 1956 ಇಸ್ವೆಂತ್ ತಿದ್ವಣೆ ಮುಕಾಂತ್ರ್ ದಲಿತ್ ಸಿಖ್ಖ್, 1990 ಇಸ್ವೆಂತ್ ತಿದ್ವಣೆಮುಕಾಂತ್ರ್ ದಲಿತ್ ಬೌದ್ಧ್ ಎಸ್ಸಿ ಮ್ಹಣ್ ಪರಿಗಣನ್ ಕರ‍್ಯೆತ್ ಅಶೆಂ ಬದ್ಲಿಲೆಂ. ಪುಣ್ ಮುಸ್ಲಿಂ ಆನಿ ಕ್ರಿಸ್ತಾಂವ್ ಧರ‍್ಮಾಕ್ ಮತಾಂತರ್ ಜಾಲ್ಲ್ಯಾ ದಲಿತಾಂಕ್ ಎಸ್ಸಿ ಮ್ಹಣ್ ಪರಿಗಣನ್ ಕರ‍್ಚೆವಿಶಿಂ ಕಸಲಿಚ್ ತಿದ್ವಣ್ ಜಾಂವ್ಕ್ ನಾ.

ಒಬಿಸಿ ಮೀಸಲಾತ್: 

ಕ್ರಿಸ್ತಾಂವ್ ಆನಿ ಮುಸ್ಲಿಂ ಧರ‍್ಮಾಕ್ ಮತಾಂತರ್ ಜಾಲ್ಲ್ಯಾ ಎಸ್ಸಿ ಲೊಕಾಕ್ ಥೊಡ್ಯಾ ರಾಜ್ಯಾಂನಿ ಒಬಿಸಿ ಪಟ್ಟೆಂತ್ ಮೆಳಯ್ಲಾಂ. ಪುಣ್ ರಾಜ್ಯ್ ಸರ‍್ಕಾರಾಂನಿ ಆಶೆಲ್ಯಾರ್ ದಲಿತ್ ಕ್ರಿಸ್ತಾಂವ್ ಆನಿ ದಲಿತ್ ಮುಸ್ಲಿಮಾಂಕ್ ಪಾಟಿಂ ಉರ‍್ಲಲ್ಯಾ ಜಾತಿಂಚೆ ಪಟ್ಟೆಂತ್ ಘೆವ್ಯೆತ್. ಪುಣ್ ಹ್ಯಾ ದೊನ್‌ಯಿ ಧರ‍್ಮಾಂಕ್ ಮತಾಂತರ್ ಜಾಲ್ಲ್ಯಾ ದಲಿತಾಂಕ್ ಎಸ್ಸಿ ಮ್ಹಣ್ ಪರಿಗಣನ್ ಕರ‍್ಯೆತ್‌ಗೀ ಮ್ಹಳ್ಳೊ ವಿಚಾರ್ ಪ್ರಸ್ತುತ್ ಸುಪ್ರೀಂ ಕೊಡ್ತಿಂತ್ ಆಸಾ.

ಧರ‍್ಮಾಚ್ಯಾ ಆಧಾರಾರ್ ಎಸ್ಸಿಂಕ್ ಗುರ‍್ತ್ ಕರ‍್ಚೊ ೧೯೫೦ವ್ಯಾ ವರ‍್ಸಾಚೊ ಸಂವಿಧಾನಿಕ್ ಆದೇಶ್‌ಚ್ ಸಂವಿಧಾನಾಚ್ಯಾ ಆಶಯಾಂಕ್ ವಿರೋಧ್ ಆಸಾ ಮ್ಹಳ್ಳೊ ದಲಿತ್ ಕ್ರಿಸ್ತಾಂವ್ ಸಂಘಟನಾಂಚೊ ಆರೋಪ್. ೧೫(೧) ವಿಧಿಕ್ (ಧರ‍್ಮಾಚ್ಯಾ ನಾಂವಾರ್ ಬೇಧ್-ಭಾವ್ ನಜೊ) ಹ್ಯಾ ಆದೇಶಾಕ್ ವಿರೋದ್ ಆಸಾ ಮ್ಹಳ್ಳೊ ತಾಂಚೊ ವಾದ್. ತಶೆಂ ಜಾಲ್ಲ್ಯಾನ್ ದಲಿತ್ ಮತಾಂತರ್ ಜಾಲ್ಯಾರೀ ತಾಂಕಾಂ ಎಸ್ಸಿ ಮ್ಹಣ್‌ಚ್ ಲೆಕಿಜೆ ಮ್ಹಳ್ಳೊ ತಾಂಚೊ ವಾದ್. ಧರ‍್ಮಾಚ್ಯಾ ಆಧಾರಾರ್ ಮೀಸಲಾತ್ ದೀಂವ್ಕ್ ನಜೊ ಮ್ಹಣ್ ಸಂವಿಧಾನ್ ಸಾಂಗ್ತಾ. ಮೀಸಲಾತ್ ನಿರಾಕರಣ್ ಕರುಂಕ್‌ಯಿ ಧರ‍್ಮ್ ಆಧಾರ್ ಜಾಂವ್ಕ್ ನಜೊ ಮ್ಹಣ್ ತೆ ಮ್ಹಣ್ತಾತ್.

೧೯೮೩ವ್ಯಾ ಸೂಸೈ ಆನಿ ಕೇಂದ್ರ್ ಸರ‍್ಕಾರಾಮಧ್ಲ್ಯಾ ಪ್ರಕರಣಾಂತ್ 1950ವ್ಯಾ ಸಂವಿಧಾನಿಕ್ ಆದೇಶ್ ಸುಪ್ರೀಂ ಕೊಡ್ತಿಂತ್ ಸವಾಲ್ ಕೆಲೆಂ. ಮತಾಂತರಾ ಉಪ್ರಾಂತ್‌ಯಿ ಜಾತ್ ಮುಂದರುನ್ ವೆತಾ ಮ್ಹಳ್ಳೆಂ ಹ್ಯಾ ಪ್ರಕರಣಾಚ್ಯಾ ತೀರ‍್ಪಾಂತ್ ಕೊಡ್ತಿನ್ ಒಪುನ್ ಘೆತ್ಲೆಂ. ಪುಣ್, ಮತಾಂತರ್ ಜಾಲ್ಲೆ ದಲಿತ್, ಹಿಂದೂ ದಲಿತಾಂತಿತ್ಲೆಚ್ ಸಮಾಜಿಕ್ ಆರ‍್ತಿಕ್ ರಿತಿನ್ ಪಾಟಿಂ ಉರ‍್ಲ್ಯಾತ್ ಮ್ಹಳ್ಳ್ಯಾಕ್ ಜೊಕ್ತೊ ಆಧಾರ್ ನಾ ಮ್ಹಳೆಂ. ಮತಾಂತರ್ ಜಾಲ್ಲ್ಯಾಂಚ್ಯಾ ಶೋಶಣಾಚೆಂ ಸುರುಪ್ ಕಸಲೆಂ ಮ್ಹಳ್ಳೆವಿಶಿಂ ಸಮಾಜಿಕ್-ಆರ‍್ತಿಕ್ ಅಂಕೆಸಂಕೆ ದೀಶೆಂ ಸುಪ್ರೀಂ ಕೊಡ್ತಿನ್ ತಾಕಿದ್ ದಿಲಿ.

ತಾಚೆಉಪ್ರಾಂತ್ ಹ್ಯಾ ವಿಚಾರಾಚೆರ್ ಜಾಯ್ತಿಂ ಕಾನೂನ್ ಝುಜಾಂ, ಶಾಸಕಾಂಗಾಚಿಂ ಪ್ರೇತನಾಂ ಚಲ್ಲ್ಯಾಂತ್. ಪುಣ್ ಎದೊಳ್ ಪರ‍್ಯಾಂತ್ ಕಾಂಯ್ ಫಳ್ ಮೆಳೊಂಕ್ ನಾ. ಸಮಾನತಾ, ಘನತಾ ಸೊಧುನ್ ಮತಾಂತರ್ ಜಾಲ್ಲೊ ದಲಿತ್ ಆನಿ ಹೆರ್ ದುಬ್ಳ್ಯಾ ಜಾತಿಚೊ ಲೋಕ್, ತ್ಯಾ ಕಾರಣಾಖಾತಿರ್ ಮೀಸಲಾತ್ ಧರುನ್ ಜಾಯ್ತ್ಯಾ ಸವ್ಲತಾಯೆಂಥಾವ್ನ್ ವಂಚಿತ್ ಜಾತೇ ಆಸಾತ್. ಹಿ ಏಕ್ ಮನ್ಶಾಳ್ ಗಜಾಲ್ ಮ್ಹಣ್ ಸಮ್ಜೊನ್, ಸಮಸ್ಯಾಕ್ ಪರಿಹಾರ್ ದೀಜೆ ಮ್ಹಳ್ಳೊ ಒತ್ತಾಯ್ ಆಸಾ.

ಮತಾಂತರ್ ಜಾಲ್ಲ್ಯಾ ದಲಿತಾಂಚ್ಯಾ ಝುಜಾಕ್ ಧಾಕ್ಡ್ಯಾಂಚೊ ಇತಿಹಾಸ್

ಕ್ರಿಸ್ತಾಂವ್ ಆನಿ ಇಸ್ಲಾಂ ಧರ‍್ಮಾಂಕ್ ಮತಾಂತರ್ ಜಾಲ್ಲ್ಯಾ ದಲಿತಾಂಕ್ ಪರಿಶಿಶ್ಟ್ ಜಾತ್ ಮ್ಹಣ್ ಪರಿಗಣನ್ ಕರಿಜೆ ಮ್ಹಳ್ಳ್ಯಾ ಮಾಗ್ಣ್ಯಾಕ್ ಧಾಕ್ಡ್ಯಾಂಚೊ ಇತಿಹಾಸ್ ಆಸಾ. ಆಜೂನ್ ಹೆಂ ಪ್ರಕರಣ್ ಸುಪ್ರೀಂ ಕೊಡ್ತಿಂತ್ ಆಸಾ. ಮತಾಂತರ್ ಜಾಲ್ಲ್ಯಾಂಕ್‌ಯಿ ಎಸ್ಸಿ ಸ್ಥಾನ್‌ಮಾನ್ ದಿಂವ್ಚೊ ಪ್ರಸ್ತಾವ್ ಕೇಂದ್ರ್ ಸರ‍್ಕಾರ್ ವಿರೋಧ್ ಕರ‍್ನ್‌ಚ್ ಆಯ್ಲಾ. ದಲಿತ್ ಕ್ರಿಸ್ತಾಂವ್, ದಲಿತ್ ಮುಸ್ಲಿಮಾಂಕ್ ಪರಿಶಿಶ್ಟ್ ಜಾತ್ ಮ್ಹಣ್ ಪರಿಗಣನ್ ಕರುಂಕ್ ಸಾಧ್ಯ್ ನಾ ಮ್ಹಣ್ ಸುಪ್ರೀಂ ಕೊಡ್ತಿನ್ ಆನಿ ಹೈಕೊಡ್ತಿನ್ ಅಭಿಪ್ರಾಯ್ ದಿಲ್ಲಿಂ ಉದಾಹರಣಾಂಯಿ ಆಸಾತ್.

ಭಾರತೀಯ್ ರಿಜಿಸ್ಟ್ರಾರ್ ಜನರಲ್ (ಆರ್ಜಿಐ) ದಫ್ತರ್ ಸುರ‍್ವೆಥಾವ್ನ್‌ಯಿ ಹಿಂದೂ ಆನಿ ಸಿಖ್ ಧರ‍್ಮಾಂಕ್ ಸೊಡ್ನ್ ಹೆರಾಂಕ್ ಎಸ್ಸಿ ವ್ಯಾಪ್ತಿಕ್ ಹಾಡ್ಚ್ಯಾಕ್ ಆಕ್ಶೇಪ್ ಉಚಾರ‍್ತೇ ಆಯ್ಲಾ. ಅಸ್ಪೃಶ್ಯತಾ ಆಚರಣಾವರ‍್ವಿಂ ಸಮಾಜಿಕ್ ಜಾವ್ನ್ ಥರ್-ಭೇದ್ ಅನ್ಬೊಗ್ ಕರ‍್ಚ್ಯಾ ಸಮುದಾಯಾಂಕ್ ಮಾತ್ರ್ ಪರಿಶಿಶ್ಟ್ ಜಾತ್ ಸ್ಥಾನ್‌ಮಾನ್ ದೀಜೆ ಮ್ಹಣ್ ತ್ಯಾ ಸಂಸ್ತ್ಯಾನ್ 1978ವ್ಯಾ ವರ‍್ಸಾ ಅಭಿಪ್ರಾಯ್ ದಿಲ್ಲಿ.

2001ವ್ಯಾ ವರ‍್ಸಾ ಹೊ ವಿಚಾರ್ ಪರತ್ ಪ್ರಸ್ತಾಪ್ ಜಾತಾನಾಂಯಿ ಆರ್ಜಿಐನ್ ಆಪ್ಲಿ ಆದ್ಲಿ ಅಭಿಪ್ರಾಯ್‌ಚ್ ಉಚಾರ‍್ಲಿ. ಇಸ್ಲಾಂ ಆನಿ ಕ್ರಿಸ್ತಾಂವ್ ಧರ‍್ಮಾಂಕ್ ಮತಾಂತರ್ ಜಾಲ್ಲೆ ದಲಿತ್ ಭಿನ್ನ್ ಜಾತಿ ಪಂಗ್ಡಾಕ್ ಸೆರ‍್ವಾಲ್ಲೆ. ಹ್ಯಾ ಕಾರಣಾನ್ ಎಕಾ ಜನಾಂಗೀಯ್ ಪಂಗ್ಡಾಕ್ ಸೆರ‍್ವಲ್ಲೆ ಮ್ಹಣ್ ವರ‍್ಗೀಕರಣ್ ಕರುಂಕ್ ಸಾಧ್ಯ್ ನಾ ಮ್ಹಣ್ ತಾಣೆ ಪ್ರತಿಪಾದನ್ ಕೆಲ್ಲೆಂ.

ಅಸ್ಪೃಶ್ಯತಾ ಆಚರಣ್ ಹಿಂದೂ ಧರ‍್ಮ್ ಆನಿ ತಾಚ್ಯಾ ಫಾಂಟ್ಯಾಂನಿ ಮಾತ್ರ್ ಆಸಾ. ಕ್ರಿಸ್ತಾಂವ್ ಆನಿ ಇಸ್ಲಾಂ ಧರ‍್ಮಾಂನಿ ತಸಲೆಂ ಆಚರಣ್ ನಾ ಜಾಲ್ಲ್ಯಾನ್, ಪರಿಶಿಶ್ಟ್ ಜಾತಿಚ್ಯಾಂನಿ ಹ್ಯಾ ಧರ‍್ಮಾಂಕ್ ಮತಾಂತರ್ ಜಾತಾನಾ ತಾಂಚಿ ಎಸ್ಸಿ ಮಾನ್ಯತಾ ಚಲ್ತಾ ಮ್ಹಳ್ಳೊ ಆನ್‌ಏಕ್ ವಾದ್. ಸುಪ್ರೀಂ ಕೊಡ್ತಿಂತ್ ಕೇಂದ್ರ್ ಸರ‍್ಕಾರಾನ್‌ಯಿ ಹೊಚ್ ವಾದ್ ಮಾಂಡ್ಲಾ. ದಲಿತ್ ಕ್ರಿಸ್ತಾಂವ್ ಎಸ್ಸಿಕ್ ಸೆರ‍್ವಾಲ್ಲೆ ಮ್ಹಣ್ ಪರಿಗಣನ್ ಕರ‍್ಚೊ ಪ್ರಸ್ತಾಪ್ 2019ವ್ಯಾ ವರ‍್ಸಾ ತಿರಸ್ಕಾರ್ ಕೆಲ್ಲ್ಯಾ ಕೇಂದ್ರ್ ಸರ‍್ಕಾರಾನ್ ತಾಂಕಾಂ ಎಸ್ಸಿ ವರ‍್ಗಾಥಾವ್ನ್ ಭಾಯ್ರ್ ದವರುಂಕ್ 1936ವ್ಯಾ ಬ್ರಿಟಿಶ್ ಆಡಳ್ತ್ಯಾ ಆದೇಶ್ ಉಲ್ಲೇಕ್ ಕೆಲ್ಲೊ. ಬ್ರಿಟಿಶ್ ಸರ‍್ಕಾರಾನ್ ಜಾತಿಂಚಿ ಪಟ್ಟಿ ಕರ‍್ತಾನಾ ಶೋಶಿತ್ ವರ‍್ಗ್ ಮ್ಹಳ್ಳೆಂ ವರ‍್ಗೀಕರಣ್ ಕೆಲ್ಲೆಂ. ಪುಣ್ ಹ್ಯಾ ವರ‍್ಗಾಂತ್ಲ್ಯಾ ಜಾತಿಂಥಾವ್ನ್ ಭಾರತೀಯ್ ಕ್ರಿಸ್ತಾಂವಾಂಕ್ ಭಾಯ್ರ್ ದವರ್‌ಲ್ಲೆಂ.

ದಲಿತ್ ಕ್ರಿಸ್ತಾಂವ್ ಆನಿ ದಲಿತ್ ಮುಸ್ಲಿಮಾಂಕ್ ಎಸ್ಸಿ ಮಾನ್ಯತಾಯ್ ದೀಜೆ ಮ್ಹಣ್ ಸುಪ್ರೀಂ ಕೊಡ್ತಿಂತ್ ವಾದ್ ಕರ‍್ತಲೆ, 2007ವ್ಯಾ ಯುಪಿಎ ಸರ‍್ಕಾರಾನ್ ರಚನ್ ಕೆಲ್ಲ್ಯಾ ರಂಗನಾಥ್ ಮಿಶ್ರಾ ಮುಕೆಲ್ಪಣಾಚ್ಯಾ ಸಮಿತಿನ್ ಕೆಲ್ಲೆ ಶಿಫಾರಸ್ ಉಲ್ಲೇಕ್ ಕರ‍್ತಾತ್. ಲೊಕಾನ್ ಸ್ವಯಂಪ್ರೇರಿತ್ ಜಾವ್ನ್ ಮತಾಂತರ್ ಜಾಲ್ಲೆಂ ತಾಣಿಂ ಜೊಡ್‌ಲ್ಲ್ಯಾ ಎಸ್ಸಿ ಮಾನ್ಯತಾಯೆವಯ್ರ್ ಪರಿಣಾಮ್ ಘಾಲುಂಕ್ ನಜೊ ಮ್ಹಣ್ ಸಮಿತಿನ್ ಸಾಂಗ್‌ಲ್ಲೆಂ. ಪುಣ್ ಹಿ ವರ‍್ದಿ ಸರ‍್ಕಾರಾನ್ ಒಪುನ್ ಘೆಂವ್ಕ್ ನಾ ಮ್ಹಣ್ ಎನ್‌ಡಿಎ ಸರ‍್ಕಾರಾನ್ ಸುಪ್ರೀಂ ಕೊಡ್ತಿಕ್ ಕಳಯಿಲ್ಲೆಂ.

ಆದ್ಲ್ಯಾ ವರ‍್ಸಾ ಎಕಾ ಪ್ರಕರಣಾಂತ್ ತಮಿಳ್‌ನಾಡಾಂತ್ಲ್ಯಾ ಎಕ್ಯೆ ಸ್ತ್ರೀಯೆಕ್ ಪರಿಶಿಶ್ಟ್ ಜಾತ್ ಮಾನ್ಯತಾ ದೀಂವ್ಕ್ ಸುಪ್ರೀಂ ಕೊಡ್ತಿನ್ ನಿರಾಕರ‍್ಣಿ ಕೆಲಿ. ತ್ಯೆ ಸ್ತ್ರೀಯೆಚೆಂ ಕುಟಮ್ ಕ್ರಿಸ್ತಾಂವ್ ಧರ‍್ಮಾಕ್ ಮತಾಂತರ್ ಜಾಲ್ಲೆಂ ವಿಚಾರಣಾವೆಳಿಂ ದೃಢ್ ಜಾಲ್ಲೆಂ.

ಕ್ರಿಸ್ತಾಂವ್ ಧರ‍್ಮಾಕ್ ಮತಾಂತರ್ ಜಾಲ್ಲ್ಯಾ ತಕ್ಷಣ್ ಏಕ್ ವೆಕ್ತಿ ಪರಿಶಿಶ್ಟ್ ಜಾತಿಚಿ ಮಾನ್ಯತಾ ಹೊಗ್ಡಾಯ್ತಾ. ತ್ಯಾ ಉಪ್ರಾಂತ್ ತಾಂಕಾಂ ಎಸ್ಸಿ/ಎಸ್ಟಿ ದೌರ್ಜನ್ಯ ತಡೆ ಕಾಯ್ದ್ಯಾಖಾಲ್ ರಕ್ಶಣ್ ಮೆಳನಾ ಮ್ಹಣ್ ಆಂಧ್ರಪ್ರದೇಶ್ ಹೈಕೊಡ್ತಿನ್ ಹ್ಯಾ ವರ‍್ಸಾಚ್ಯಾ ಎಪ್ರಿಲಾಂತ್ ಎಕಾ ಪ್ರಕರಣಾಂತ್ ತೀರ‍್ಪ್ ದಿಲಾಂ. 

(ಆಧಾರ್: ಪಿಟಿಐ, ಮಾಧ್ಯಮ್ ವರ‍್ದ್ಯೊ)