Embedded Files
ಕರ್ನಾಟಕಾಚ್ಯಾ ಮೈಸೂರಾಂತ್ ಆಸ್ಚ್ಯಾ ಎಕ್ಯೆ ಗಲ್ಲೆಂತ್ ಪಂದ್ರಾ ವರ್ಸಾಂಚೊ ಭುರ್ಗೊ ರಮೇಶ್ ಆಪ್ಲ್ಯಾ ಆವಯ್-ಬಾಪಯ್ ಸಂಗಿಂ ದೋನ್ ಕುಡಾಂ ಆಸ್ಚ್ಯಾ ಘರಾಂತ್ ವಸ್ತಿ ಕರ್ತಾ. ಸುಮಾರ್ ಪಾಂಚ್ ವರ್ಸಾಂ ಪಯ್ಲೆಂ ರಮೇಶ್ ಮಸ್ತ್ ಕಾರ್ಯಾಳ್ ಆಸ್ಲೊ. ಇಸ್ಕೊಲಾಥಾವ್ನ್ ಆಯ್ಲ್ಯಾ ಉಪ್ರಾಂತ್ ಗಲ್ಲೆಂತ್ ವಚುನ್ ಸೆಜಾರಿ ಭುರ್ಗ್ಯಾಂ ಸಾಂಗಾತಾ ಕ್ರಿಕೆಟ್ ಖೆಳ್ತಾಲೊ. ಪದಾಂ ಸಾಂಗೊನ್, ಗಾಂವ್ಚ್ಯಾ ದಿವ್ಳಾ ಮುಕಾರ್ ಗಣೇಶ್ ಫೆಸ್ತ್ ಯೆತಾನಾ ಡ್ಯಾನ್ಸ್ ಕರ್ನ್ ಗಮ್ಮತ್ ಕರ್ತಾಲೊ. ಪುಣ್ ಆತಾಂ ರಮೇಶ್ ಪುರ್ತೊ ಬದಲ್ಲಾ. ಕಿತೆಂ ಘಡ್ಲೆಂ ತಾಚ್ಯಾ ಜಿವಿತಾಂತ್? ತೊ ಆತಾಂ ಮಂದ್ ಜಾವ್ನ್, ಇಸ್ಕೊಲಾ ಉಪ್ರಾಂತ್ ಘರಾ ಭಿತರ್ ಗೆಲ್ಲೊ ಭಾಯ್ರ್ ಯೆನಾ. ಸುಟಿ ಯಾ ಫೆಸ್ತ್ ಪರ್ಬೆವೆಳಿಂ ಗಮ್ಮತ್ ಕರಿನಾ. ಫಕತ್ ಘರಾ ಭಿತರ್ ಬಸೊನ್ ಆಸ್ತಾ. ಹೆಂ ಕಶೆಂ ಜಾಲೆಂ?
ಹೆಂ ಘಡ್ಲೆಂ 2020 ಇಸ್ವೆಂತ್ ಕೊವಿಡ್ ಲೊಕ್ಡೌನ್ ಉಪ್ರಾಂತ್. ರಮೇಶ್ ಏಕ್ ವರ್ಸ್ ಆಪ್ಲ್ಯಾ ವ್ಹಡಿಲಾಂ ಸಾಂಗಾತಾ ಆಪ್ಲ್ಯಾ ಧಾಕ್ಟುಲ್ಯಾ ಘರಾಂತ್ ಬಂಧಿ ಜಾಲೊ. ಇಸ್ಕೊಲಾಂ ಬಂಧ್ ಜಾವ್ನ್ ಆನ್ಲೈನ್ ಕ್ಲಾಸ್ ಮ್ಹಳ್ಳೆಂ ಕಲ್ಪನ್ ಆಯ್ಲೆಂ. ತಶೆಂ Zoom ಕ್ಲಾಸ್ ಮ್ಹಣ್ ರಮೇಶಾಚ್ಯಾ ಹಾತಾಂತ್ ವ್ಹಡಿಲಾಂನಿ ಏಕ್ ಅಂಡ್ರೊಯಿಡ್ ಫೊನ್ ದಿಲೆಂ. ಸುರ್ವೆಚ್ಯಾ ದಿಸಾಂನಿ ರಮೇಶ್ ಫೊನಾಂತ್ ಫಕತ್ ಆಪ್ಲೆಂ ಶಿಕಪ್ ಶಿಕೊನ್ ಆಸ್ಲೊ. ಕ್ರಮೇಣ್ ತಾಕಾ ಫೊನಾಥಾವ್ನ್ ಸಾಮಾಜಿಕ್ ಮಾಧ್ಯಮಾಂ ವಾಪರ್ಯೆತ್ ಮ್ಹಣ್ ಆಪ್ಲ್ಯಾ ಇಶ್ಟಾಂಥಾವ್ನ್ ಕಳಿತ್ ಜಾಲೆಂ. ಇನ್ಸ್ಟಾಗ್ರಾಂ, ಫೇಸ್ಬುಕ್, ಟಿಕ್ ಟಾಕ್ ಆಶೆಂ ಮ್ಹಣ್ ತೊ ತಾಂತುಂಚ್ ಲೊಳೊನ್ ಗೆಲೊ.
ಮಾಗಿರ್ PUBG, Among Us, Garena Free Fire , Call of Duty ಅಸಲ್ಯಾ ಖೆಳಾಂತ್ ಸಂಪೂರ್ಣ್ ಗುಮಾನ್ ದೀವ್ನ್ ತಾಚೊ ವ್ಯಸನಿ ಜಾಲೊ. ಸಾಂಗಾತಾ ತಾಂತುಂ in-app purchases ಮ್ಹಣ್ ವ್ಹಡಿಲಾಂಕ್ ಕಳಿತ್ ನಾಸ್ತಾನಾ ಪಯ್ಶೆ ಘಾಲ್ತಾಲೊ. ಅಶೆಂ ಆನ್ಲೈನಿರ್ ತಾಕಾ ನವೆ ಈಶ್ಟ್ ಮೆಳ್ಳೆ. ಥೊಡ್ಯಾಂನಿ ತಾಕಾ ಡ್ರಗ್ಸ್ ಘೆಂವ್ಕ್ ಶಿಕಯ್ಲೆಂ. ಇತ್ಲೆಂ ಪುರಾ ಜಾಲ್ಯಾ ಉಪ್ರಾಂತ್ ತೊ ಆತಾಂ ಸಂಪೂರ್ಣ್ ಸ್ಮಾರ್ಟ್ಫೊನ್ ವ್ಯಸನಿ ಜಾಲಾ. ತಾಕಾ ಭಾಯ್ರ್ ವಚುನ್ ಖೆಳೊಂಕ್ ಮನ್ ನಾ. ಫಕತ್ ಭಿತರ್ಲ್ಯಾ ಕುಡಾಂತ್ ಬಸೊನ್ ಮೊಬಾಯ್ಲ್ಪಳೆವ್ನ್ ಆಸ್ತಾ. ಮೊಧ್ಯಾನೆ ರಾತಿಂ ಉಪ್ರಾಂತ್ಯೀ ತೊ ಮೊಬಾಯ್ಲಾರ್ ಆಸ್ತಾ. ತಾಕಾ ನೀದ್ ಸಾರ್ಕಿ ಪಡನಾ. ದೊಳ್ಯಾಂಚಿ ದೀಶ್ಟ್ಯೀ ಸಾರ್ಕಿ ನಾ. ತಿತ್ಲೆಂಚ್ ನ್ಹಯ್ ಆಪ್ಲೆಂ ಶಿಕಪ್ ಕೇಂದ್ರೀಕೃತ್ ಕರುಂಕ್ ತಾಕಾ ಜಾಯ್ನಾ. ಫಕತ್ ಎಕ್ ರಮೇಶಾಚಿ ಕಾಣಿ ನ್ಹಯ್ ಹಿ. ಕೊವಿಡ್ ವೆಳಾರ್ ಸುಮಾರ್ ೨೫ ಕೊರೊಡ್ ಭಾರತೀಯ್ ಭುರ್ಗ್ಯಾಂಚ್ಯಾ ಹಾತಾಂತ್ ಸ್ಮಾರ್ಟ್ ಫೋನ್ ಮೆಳ್ಳಲೆಂ. ಆತಾಂ ಚಡಾವತ್ ತ್ಯಾ ಭುರ್ಗ್ಯಾಂಚಿ ಸ್ಥಿತಿ ರಮೇಶಾಬರಿ ಜಾಲ್ಯಾ. ಕಸ್ಲೆಂ ದುರಂತ್ ಹೆಂ!
ಕೊವಿಡ್ ಉಪ್ರಾಂತ್ಲಿ ಪಿಡಾ ಹಿ...!
ಕೊವಿಡ್ ವೆಳಾರ್ ಲೊಕಾಕ್ ಎಕಾಮೆಕಾ ಸಂವಹನ್ ಕರುಂಕ್ ನಾ ಮ್ಹಳ್ಳ್ಯಾ ವೆಳಾರ್ ಹಾಂವ್ ಆಸಾ ನೇ ಮ್ಹಣ್ ಡಿಜಿಟಲ್ ಸಂಸಾರ್ ಆಮ್ಕಾಂ ದಿಸ್ಲೊ. ಅಶೆಂ ಆನ್ಲೈನ್ ಸಂವಹನ್ ಆಮ್ಚ್ಯಾ ಜಿವಿತಾಂತ್ ಪ್ರವೇಶ್ ಜಾಲೊ. ತೆನ್ನಾಂಚ್ ಚಿಣ್ಕಾರಾಂಚಿ ಸ್ಮಾರ್ಟ್ಫೊನಾಂ ಆನಿ ಅಂಬಾನಿಚೊ ಅಂತರ್ಜಾಳ್ ಡಾಟಾ ಧಾರಾಳ್ ಮಾಪಾನ್ ಆಮ್ಕಾಂ ಮೆಳೊನ್ ಆಸ್ಲೊ. ಭುರ್ಗ್ಯಾಂಚೆ ಹಾತಿಂ ಮೊಬಾಯ್ಲ್ ಭಿಲ್ಕುಲ್ ದಿನಾಂವ್, ಮೊಬಾಯ್ಲಾದ್ವಾರಿಂ ಶಿಕಪ್ ಪಾಡ್ ಜಾತಾ ಮ್ಹಣ್ ವ್ಹಡ್ ವ್ಹಡ್ ಭಾಶಣ್ ದಿಂವ್ಚ್ಯಾ ಆವಯ್-ಬಾಪಾಯ್ನ್ಯಿ ತ್ಯಾ ವೆಳಾರ್ ಭುರ್ಗ್ಯಾಂಚ್ಯೆ ಹಾತಿಂ ಮೊಬಾಯ್ಲ್ ದೀಜೆ ಪಡ್ಲೆಂ. ಅಶೆಂ ತಾಂಕಾಂ ಮೊಬಾಯ್ಲ್ ದಿತಾನಾ ತಾಂತುಂ ಕಿತೆಂ ಬರೆಂ ಯಾ ವಾಯ್ಟ್ ಆಸಾ ಮ್ಹಣ್ ಚಿಂತುಂಕ್ಯೀ ಅವ್ಕಾಸ್ ನಾತ್ಲಲೊ. ಅಶೆಂ ಭುರ್ಗ್ಯಾಂಕ್ ತೆನ್ನಾ ಮೆಳ್ಳೆಂ ಮೊಬಾಯ್ಲ್ ಆತಾಂ ತಾಂಕಾಂ ತೆಂ ಸೊಡುಂಕ್ ಜಾಯ್ನಾ. ಸ್ಮಾರ್ಟ್ಫೋನ್ ತಾಂಚ್ಯಾ ಜಿವಿತಾಚೊ ಅವಿಭಾಜ್ಯ್ ಅಂಗ್ ಜಾವ್ನ್ ಗೆಲಾಂ! ದುರಂತ್ ಮ್ಹಳ್ಯಾರ್ ಹೆಂ ಟ್ರೆಂಡ್ ಫಕತ್ ಕೊವಿಡ್ ಕಾಳಾಚ್ಯಾ ಭುರ್ಗ್ಯಾಂಕ್ ಮಾತ್ರ್ ನ್ಹಯ್, ಕೊವಿಡ್ ಉಪ್ರಾಂತ್ ಜಲ್ಮಾಲ್ಲ್ಯಾ ಭುರ್ಗ್ಯಾಂಕ್ಯೀ ವಿಸ್ತಾರುನ್ ಆಸಾ. ಹ್ಯೆ ಪಿಡೆಕ್ ಸ್ಕ್ರೀನ್ ಎಪಿಡೆಮಿಕ್ ಮ್ಹಣ್ ಆಪಯ್ತಾತ್.
ಫಕತ್ ಭುರ್ಗ್ಯಾಂಕ್ ಮಾತ್ರ್ಗೀ? ಆತಾಂ ಪ್ರಾಯ್ವಂತಾಂಕ್ಯೀ ಮೊಬಾಯ್ಲ್ ಜರೂರ್ ಜಾಯ್ ಪಡ್ಲಾಂ. ಸ್ಮಾರ್ಟ್ಫೊನಾಕ್ ವ್ಹಡಿಲಾಂಚ್ ವ್ಯಸನ್ ಜಾವ್ನ್ ಆಸ್ತಾನಾ, ಭುರ್ಗ್ಯಾಂಕ್ ತುಮಿ ಮೊಬಾಯ್ಲ್ ವಾಪರಿನಾಕತ್ ಮ್ಹಣ್ ಬೂದ್ಬಾಳ್ ಸಾಂಗೊಂಕ್ ಜಾತಾಗೀ? ಭಿಲ್ಕುಲ್ ಜಾಯ್ನಾ. ಆಶೆಂ ಪಯ್ಲೆಂ ಹ್ಯಾ ವ್ಯಸನಾಕ್ ವ್ಹಡಿಲಾಂಚ್ ಕಾರಣ್ ಜಾವ್ನ್ ಆಸಾತ್.
ತುಮಿ ಪಳೆಂವ್ಕ್ ಪುರೊ ಆಜ್ಕಾಲ್ ಭುರ್ಗ್ಯಾಂಕ್ ಲಾಯ್ಜೆ ಜಾಲ್ಯಾರ್, ಆವಯ್ ಆಪ್ಲ್ಯಾ ಮೊಬಾಯ್ಲಾರ್ ಯೂಟ್ಯುಬ್ ವಿಡಿಯೊ ಘಾಲ್ಯಾರ್ ಮಾತ್ರ್ ಭುರ್ಗೆಂ ಜೆಂವ್ಚಿ ಸ್ಥಿತಿ ಆಯ್ಲ್ಯಾ. ಮೊಬಾಯ್ಲ್ ವ್ಯಸನಾವರ್ವಿಂ ಭುರ್ಗ್ಯಾಂವಯ್ರ್ ದೀಗ್ಕಾಳ್ ಪರಿಣಾಮ್ ಪಡ್ತಾ ಮ್ಹಣ್ ಜಾಣಾ ಆಸೊನ್ಯೀ ಭುರ್ಗ್ಯಾಂಕ್ ಮೊಬಾಯ್ಲ್ ದಿಂವ್ಚಿಂ ವ್ಹಡಿಲಾಂ ಕಾಂಯ್ ಉಣೆಂ ನಾಂತ್. ಹೆ ಮಿಲೆನಿಯಲ್ ತಶೆಂ Gen Z ಯೆಂವ್ಚ್ಯಾ ಪಯ್ಲೆಂಚಿ ಪಿಳ್ಗಿ ಆಪ್ಲೆಂ ಬಾಳ್ಪಣ್ ಸುರಕ್ಷಿತ್ ಜಾವ್ನ್ ಉತ್ರೊನ್ ಗೆಲ್ಯಾ ಉಪ್ರಾಂತ್ ಡಿಜಿಟಲ್ ವ್ಯಾಧಿಕ್ ಬಲಿ ಜಾಲಿಂ. ಪುಣ್ ಅತಾಂಚಿಂ ಭುರ್ಗಿಂ ಎಲ್ಕೆಜಿ ಯೆತಾನಾಂಚ್ ಹ್ಯಾ ವ್ಯಾದೆಕ್ ಬಲಿ ಜಾಲ್ಯಾಂತ್. ಹ್ಯಾ ಸಂಸಾರಾಕ್ ತೆನ್ನಾ ಮಾತ್ರ್ ಜಲ್ಮೊನ್ ಆಯಿಲ್ಲ್ಯಾ ಭುರ್ಗ್ಯಾಂಕ್ ಭೊಂವ್ತೊಣಿಚ್ಯಾ ಪರಿಸರಾವಿಶಿಂ ದಾಕವ್ನ್ ಹೆಂ ಕಿತೆಂ? ತೆಂ ಕಿತೆಂ? ಮ್ಹಣ್ ದಾಕವ್ನ್ ದೀವ್ನ್ ತಾಂಕಾಂ ವಿಜ್ಮಿತ್ ಕರ್ಚೆಂ ಸೊಡ್ನ್ ವ್ಹಡಿಲಾಂ ಭುರ್ಗ್ಯಾಂಕ್ ಮೊಬಾಯ್ಲ್ ದೀವ್ನ್ ತಾಂಕಾಂ ತಾಚೆ ವ್ಯಸನಿ ಕರ್ತಾತ್ ಮ್ಹಳ್ಳೆಂಚ್ ಏಕ್ ವಿಪರ್ಯಾಸ್!
ಸ್ಕ್ರೀನ್ ಎಪಿಡೆಮಿಕಾಚೆ ಪರಿಣಾಮ್ ಆನಿ ಪರಿಹಾರ್..!
ಆಜ್ ಭಾರತಾಂತ್ ೯೦% ಶಹರಾಂತ್ಲೊ ಆನಿ ೭೫% ಲೋಕ್ ಹಳ್ಳೆಂತ್ಲೊ ಸ್ಮಾರ್ಟ್ಫೊನಾಂ ವಾಪರ್ತಾ. ಅಂದಾಜ್ ೨೫ ಕೊರೊಡ್ ಆಟ್ರಾ ವರ್ಸಾಂ ಭಿತರ್ಲಿಂ ಭುರ್ಗಿಂ ಭಾರತಾಂತ್ ಸರಾಸರ್ 4 ಗಂಟೆ ತಿತ್ಲೆಂ ಮೊಬಾಯ್ಲ್ ವಾಪರ್ತಾತ್. IAP (Indian Academy of Pediatrics) ಪ್ರಕಾರ್ ಹಿ ಏಕ್ ಖಂತಿಚಿ ಗಜಾಲ್. ಕಿತ್ಯಾಕ್ ಮ್ಹಳ್ಯಾರ್ ಹೆಂ ಸ್ಕ್ರೀನ್ ಎಪಿಡೆಮಿಕ್ ಭುರ್ಗ್ಯಾಂಚ್ಯಾ ಭೌತಿಕ್ ಭಲಾಯ್ಕಿ, ಮಾನಸಿಕ್ ಭಲಾಯ್ಕಿ, ಶಿಕಪ್ ಆನಿ ಸಮಾಜಿಕ್ ವಿಕಾಸಾವಯ್ರ್ ಪರಿಣಾಮ್ ಹಾಡ್ತಾ. ವಿಶ್ವ್ ಆರೋಗ್ಯ್ ಸಂಸ್ಥ್ಯಾಪ್ರಕಾರ್ ದೋನ್ ಥಾವ್ನ್ ಪಾಂಚ್ ವರ್ಸಾಂಚ್ಯಾ ಭುರ್ಗ್ಯಾಂನಿ ಎಕಾ ವೊರಾಪ್ರಾಸ್ ಚಡ್ ಮೊಬೈಲ್ ಪಳಂವ್ಕ್ ನಜೊ ಆನಿ ವ್ಹಡ್ ಭುರ್ಗ್ಯಾಂನಿ ೨ ವೊರಾಂಪ್ರಾಸ್ ಚಡ್ ಮೊಬಾಯ್ಲ್ ಪಳೆಂವ್ಕ್ ನಜೊ. ಪುಣ್ ಭಾರತಾಂತ್ ದೋನ್ ಥಾವ್ನ್ ಪಾಂಚ್ ವರ್ಸಾಂ ಪ್ರಾಯೆಚ್ಯಾ ಭುರ್ಗ್ಯಾಂಚೊ ಸ್ಕ್ರೀನ್ ಟೈಮ್ ಸರಾಸರ್ 2.2 ವೊರಾಂ. ಮ್ಹಳ್ಯಾರ್ ವಿಶ್ವ್ ಆರೋಗ್ಯ್ ಸಂಸ್ಥ್ಯಾನ್ ದಿಲ್ಲ್ಯಾ ಮಿತಿಪ್ರಾಸ್ ದೋನ್ ವಾಂಟೆ ಚಡ್. ಪಾಂಚ್ ವರ್ಸಾಂಪ್ರಾಸ್ ವ್ಹಡ್ ಭುರ್ಗ್ಯಾಂನಿ ಭಾರತಾಂತ್ ಮೊಬಾಯ್ಲ್ ಪಳೆಂವ್ಚೊ ವೇಳ್ ಸರಾಸರ್ ೪ ವೊರಾಂಪ್ರಾಸ್ ಚಡ್. ಹೆಂಯೀ WHOಚ್ಯಾ ಮಿತಿಚ್ಯಾ ದೋನ್ ವಾಂಟೆ ಚಡಿತ್ ಆಸಾ! ಹ್ಯಾ ವರ್ಸಾಚಾ IJIP (The International Journal of Indian Psychology) ಪತ್ರಾಚ್ಯಾ ಸಮೀಕ್ಶೆ ಪ್ರಕಾರ್ 37.9% ಭುರ್ಗಿಂ ಸ್ಮಾರ್ಟ್ಫೋನ್ ವಾಪರ್ಲ್ಲೆವರ್ವಿಂ ಉದ್ವೇಗ್ ಜಾತಾತ್. 33.3% ಭುರ್ಗಿಂ ಖಿನ್ನತಾಕ್ ಚಲ್ತಾತ್. ಹಾಂತ್ಲ್ಯಾ 20 ಥಾವ್ನ್ 30% ಭುರ್ಗ್ಯಾಂಕ್ ಜಿವ್ಘಾತ್ ಕರ್ಚಿಂ ಭೊಗ್ಣಾಂ ಯೆತಾತ್.
ಪರಿಹಾರ್ ಕಿತೆಂ ಮ್ಹಳ್ಯಾರ್ ವ್ಹಡಿಲಾಂನಿ ಭುರ್ಗ್ಯಾಂಚೊ ಮೊಬಾಯ್ಲ್ ಸ್ಕ್ರೀನ್ಟೈಮ್ ನಿಯಂತ್ರಿತ್ ಕರಿಜೆ. 2 ವರ್ಸಾಂ ಭಿತರ್ಲ್ಯಾ ಭುರ್ಗ್ಯಾಂಕ್ ಮೊಬಾಯ್ಲ್ ಬಿಲ್ಕುಲ್ ದೀಂವ್ಕ್ ನಜೊ. 2 ಥಾವ್ನ್ 5 ವರ್ಸಾಂಚ್ಯಾ ಭುರ್ಗ್ಯಾಂಕ್ ಎಕಾ ಘಂಟ್ಯಾಪ್ರಾಸ್ ಚಡಿತ್ ಮೊಬಾಯ್ಲ್ ಪಳೆಂವ್ಕ್ ಸೊಡುಂಕ್ ನಜೊ. ವ್ಹಡಿಲಾಂನಿ ಭುರ್ಗ್ಯಾಂಸಂಗಿಂ ಬಸೊನ್ ಶಿಕ್ಪಾಕ್ ಲಗ್ತಿ ವಿಶಯ್ ಮಾತ್ರ್ ಪಳಯ್ಜೆ. ನಿದ್ಚ್ಯಾ ಎಕಾ ಘಂಟ್ಯಾ ಪಯ್ಲೆಂ ಮೊಬಾಯ್ಲ್ ಬಂಧ್ ಕರಿಜೆ. ಪಾಂಚ್ಥಾವ್ನ್ 12 ವರ್ಸಾಂಚ್ಯಾ ಭುರ್ಗ್ಯಾಂಕ್ 2 ಘಂಟ್ಯಾಂಪ್ರಾಸ್ ಚಡಿತ್ ಮೊಬಾಯ್ಲ್ ಪಳೆಂವ್ಕ್ ಆವ್ಕಾಸ್ ದೀಂವ್ಕ್ ನಜೊ. ತೆರಾ ವರ್ಸಾಂವಯ್ಲ್ಯಾ ಭುರ್ಗ್ಯಾಂಕ್ 3 ಘಂಟ್ಯಾಪ್ರಾಸ್ ಚಡಿತ್ ಮೊಬಾಯ್ಲ್ ಪಳೆಂವ್ಕ್ ಸೊಡುಂಕ್ ನಜೊ. ಭಾರತಾಂತ್ 66% ವ್ಹಡಿಲಾಂ ಹೆಂ ನಿಯಂತ್ರಣ್ ಕರಿನಾಂತ್. ಹೆಂ ನಿಯಂತ್ರಣ್ ಕರುಂಕ್ ತುಮ್ಚ್ಯಾ ಅಂಡ್ರೊಯಿಡಾಂತ್ Google family link ಆನಿ ಎಪ್ಪಲ್ ಫೊನಾಂತ್ Apple screeen time ಮ್ಹಳ್ಳಿಂ ಎಪ್ಲಿಕೇಶನ್ ಆಸಾತ್. ಮಂಗ್ಳುರ್ ದಿಯೆಸೆಜಿಚ್ಯಾ ಸಮಾಜಿಕ್ ಸಂವಹನ್ ಆಯೋಗಾಚ್ಯಾ ಜಾಳಿಜಾಗ್ಯಾರ್ https://www.scayogmangalore.in ಹ್ಯೆವಿಶಿಂ ತರ್ಬೆತ್ ದಿಂವ್ಚೆ ಸಬಾರ್ ವಿಡಿಯೊ ಆಸಾತ್. ತಿತ್ಲೆಂಚ್ ನ್ಹಯ್, ಸಮಾಜಿಕ್ ಸಂಹವನ್ ಆಯೋಗಾಥಾವ್ನ್ ತವಳ್ ತವಳ್ ವಾರಾಡ್ಯಾ ತಶೆಂ ಫಿರ್ಗಜೆ ಮಟ್ಟಾರ್ ಹ್ಯೆವಿಶಿಂ ತರ್ಬೆತಿ ಕಾರ್ಯಾಂಚಿ ಮಾಂಡಾವಳ್ ಆಸ್ತಾ.
ಭುರ್ಗ್ಯಾಂಕ್ ಬೂಕ್ ವಾಚುಂಕ್ ಪ್ರೇರಣ್ ದಿವ್ಯಾಂ
ಭುರ್ಗ್ಯಾಂನಿ ಮೊಬಾಯ್ಲ್ ವ್ಯಸನಿ ಜಾಯ್ನಾತ್ಲೆಬರಿ ಕರುಂಕ್ ಆಸ್ಚೊ ಆನ್ಯೆಕ್ ಉಪಾಯ್ ಮ್ಹಳ್ಯಾರ್ ತಾಂಕಾಂ ಬೂಕ್ ವಾಚುಂಕ್ ಪ್ರೇರಣ್ ದೀವ್ನ್ ವಾಚ್ಪಾಚೆ ವ್ಯಸನಿ ಕರ್ಚೊ. ಹೆಂ ಕರಿಜೆ ಜಾಲ್ಯಾರ್ ಪಯ್ಲೆಂ ವ್ಹಡಿಲಾಂನಿ ಮೊಬಾಯ್ಲ್ ಬಂಧ್ ಕರ್ನ್ ಬೂಕ್ ವಾಚಿಜೆ. ನೆಣ್ತೆ ಪ್ರಾಯೆರ್ ತುಮಿ ಭುರ್ಗ್ಯಾಂಕ್ ಬೂಕ್ ವಾಚುಂಕ್ ಪ್ರೇರಣ್ ದಿಲ್ಯಾರ್, ತೊ ಏಕ್ ಹವ್ಯಾಸ್ ಜಾವ್ನ್ ಬದ್ಲತಾ. ಖಂಚ್ಯಾಯಿ ಭಾಶೆಚೆ ಜಾಲ್ಯಾರೀ ವ್ಹಡ್ನಾ, ಸುರ್ವೆಚ್ಯಾ ಹಂತಾರ್ ಭುರ್ಗ್ಯಾಂಕ್ ಸಲಿಸಾಯೆನ್ ವಾಚುಂಕ್ ಜಾಂವ್ಚೆ ಬೂಕ್ ದಿಯಾ.
ಬೂಕ್ ಜಾಣ್ವಾಯೆಚೆಂ ಸಂಕೇತ್. ಬೂಕ್ ವಾಚ್ಲ್ಯಾರ್ ತುಮ್ಚೊ ಮೆಂದು ಕಾರ್ಯಾಳ್ ಜಾತಾ. ಬೂಕ್ ತುಮ್ಕಾಂ ರಚನಾತ್ಮಕ್ ಚಿಂತಪ್ ದಿತಾ. ಬೂಕ್ ವಾಚ್ಲ್ಯಾರ್ ಮತಿಚೊ ದಬಾವ್ ಉಣೊ ಜಾತಾ ಆನಿ ಮನಾಕ್ ಶಾಂತಿ ಲಾಬ್ತಾ. ತಿತ್ಲೆಂಚ್ ನ್ಹಯ್ ತುಮ್ಚಿ ಭಾಶೆ ಗಿನ್ಯಾನ್ ಸುಧ್ರಾತಾ ಆನಿ ಸಬ್ದಾವಳ್ ತಶೆಂ ವ್ಯಾಕರಣಾವಿಶಿಂ ತುಮ್ಚಿ ಜಾಣ್ವಾಯ್ ಚಡ್ತಾ. ತಿತ್ಲೆಂಚ್ ನ್ಹಯ್ ತುಮ್ಚಿ ಏಕಾಗ್ರತಾ ತಶೆಂ ಉಡಾಸಾಚಿ ಸಕತ್ ವಾಡ್ತಾ.
ಆಜ್ಕಾಲ್ ಡಿಜಿಟಲ್ ರುಪಾರ್ ಬೂಕ್ ಯೆತಾತ್. ತಶೆಂ ಮ್ಹಣ್ ಟ್ಯಾಬ್ ಯಾ ಮೊಬಾಯ್ಲ್ ವಾಪರ್ನ್ ಬೂಕ್ ವಾಚುಂಕ್ ತುಮ್ಚ್ಯಾ ಭುರ್ಗ್ಯಾಂಕ್ ಸೊಡಿನಾಕಾತ್. ತುಮ್ಚ್ಯಾ ಕಂಪ್ಯೂಟರ್, ಟ್ಯಾಬ್ ಯಾ ಸ್ಮಾರ್ಟ್ಫೊನಾಂತ್ LCD, OLED, AMOLED ತಸಲಿ ತಾಂತ್ರಿಕತಾ ಆಸ್ತಾ. ಹಿ ತಾಂತ್ರಿಕತಾ ಕಶಿ ಕಾಮ್ ಕರ್ತಾ ಮ್ಹಳ್ಯಾರ್ ತ್ಯಾ ಪಡ್ದ್ಯಾಂತ್ ಲಾಕಾನ್ ಲಾಕ್ ಧಾಕ್ಟುಲೆ ಬಲ್ಬ್ ಪಾಟ್ಲ್ಯಾನ್ ಪೆಟೊನ್ ತುಮ್ಚ್ಯಾ ದೊಳ್ಯಾಂಕ್ ಅಕ್ಷರ್, ತಸ್ವೀರ್ ಯಾ ವಿಡಿಯೊ ದಾಕಯ್ತಾತ್. ತಿತ್ಲೆ ಲಾಕ್ ದಾಕ್ಟುಲೆ ಬಲ್ಬ್ ಉಜ್ವಾಡ್ ಉತ್ಪನ್ನ್ ಕರ್ನ್ ತುಮ್ಚ್ಯಾ ದೊಳ್ಯಾಂಕ್ HD, ULTRA HD(UHD), 4K ತಸ್ಲಿ ಟೆಕ್ನೊಲೊಜಿ ಮ್ಹಣ್ ತುಮ್ಚ್ಯಾ ದೊಳ್ಯಾಂವಯ್ರ್ ಒತ್ತಡ್ ಘಾಲ್ತಾತ್! ತಶೆಂ ಜಾಲ್ಲ್ಯಾನ್ ದೊಳ್ಯಾಂಚಿ ದಿಶ್ಟ್ ವೆಗಿಂಚ್ ಪಾಡ್ ಜಾತಾ.
ಡಿಜಿಟಲ್ ಬೂಕ್ ವಾಚುಂಕ್ ಮ್ಹಣ್ E-Ink ಟೆಕ್ನೊಲೊಜಿ ಆಸ್ಚಿಂ ಟ್ಯಾಬಾಂ ಮೆಳ್ತಾತ್. ಈ-ಇಂಕ್ ಟೆಕ್ನೊಲೊಜಿ ಮ್ಹಳ್ಯಾರ್ ಸ್ಕ್ರೀನಾಪಾಟ್ಲ್ಯಾನ್ ಉಜ್ವಾಡ್ ಜಳಂವ್ಚೆ ಬಲ್ಬ್ ಆಸನಾಂತ್. ವಯ್ರ್ ಥಾವ್ನ್ ಪಡ್ಲ್ಲೊ ಉಜ್ವಾಡ್ ವಾಪರ್ನ್ ತುಮ್ಕಾಂ ಹಿ ಡಿಸ್ಪ್ಲೆ ಟೆಕ್ನೊಲೊಜಿ ಮೆಳ್ತಾ. ತಶೆಂ ಜಾಲ್ಲ್ಯಾನ್ ತುಮ್ಚ್ಯಾ ದೊಳ್ಯಾಂಕ್ ಕಸ್ಲೆಯೀ ತ್ರಾಸ್ ಜಾಯ್ನಾಂತ್. ಹ್ಯಾ ಯಂತ್ರಾಂತ್ ತುಮ್ಕಾಂ ಬರಂವ್ಕ್ ಮ್ಹಣ್ ಡಿಜಿಟಲ್ ಪೆನ್ನ್ಯೀ ಮೆಳ್ತಾ. ತುಮ್ಚ್ಯಾ ಭುರ್ಗ್ಯಾಂಕ್ ತುಮಿ ದೀಜೆ ಜಾಲ್ಲೆಂ ಯಂತ್ರ್ ಹೆಂ. ಆಜ್ ಜಾಳಿರ್ ಲಾಕಾಂನಿ ಡಿಜಿಟಲ್ ಬೂಕ್ ಫುಂಕ್ಯಾಕ್ ಮೆಳ್ತಾತ್. ಹೆ ತುಮಿ ತುಮ್ಚ್ಯಾ ಭುರ್ಗ್ಯಾಂಕ್ E-Ink ಟೆಕ್ನೊಲೊಜಿ ಆಸ್ಚ್ಯಾ ಟ್ಯಾಬಾದ್ವಾರಿಂ ವಾಚುಂಕ್ ಪ್ರೇರಣ್ ದಿವ್ಯೆತ್. ಫಾಮಾದ್ E-Ink ಯಂತ್ರಾಂ ಮ್ಹಳ್ಯಾರ್ ಅಮೆಜಾನ್ ಕಿಂಡಲ್, Onyk Boox, Kobo, reMarkable... ಅಶಿಂ ಸಬಾರ್ ಆಸಾತ್. ಹ್ಯಾ ಯಂತ್ರಾಂತ್ ಚಡಾವತ್ ವಾಚುಂಕ್ ಆನಿ ಬರಂವ್ಕ್ ಸೊಡ್ಲ್ಯಾರ್ ಮಾಗಿರ್ ಕಾಂಯ್ ಕರುಂಕ್ ಜಾಯ್ನಾ. ತುಮ್ಚ್ಯಾ ಭುರ್ಗ್ಯಾಂಕ್ ದೀಜೆ ಜಾಲ್ಲೆಂ ಇನಾಮ್ ಹೆಂ...!
Google Sites
Report abuse