ಪ್ರಮುಕ್ ಖಬ್ರೊ

ಆಮ್ಚಿ ಕೊಂಕ್ಣಿ ಅಮಿಂ ಉಲಯ್ನಾಂವ್ ತರ್ ಆನಿ ಕೋಣ್ ಉಲಯ್ತೆಲೆ? ಆಮಿಂ ಉರಯ್ನಾಂವ್ ತರ್ ಹೆರ್ ಕೋಣ್ ಉರಯ್ತೆಲೆ? ಕೊಂಕ್ಣಿ ಫಕತ್ ಉಲವ್ಪಾಚಿ ಭಾಸ್ ಕರ್ನ್ ಘೆತ್ಲ್ಯಾರ್ ಪಾವಾನಾ, ತಿ ಆಮ್ಚ್ಯಾ ವಾಚ್ಪಾಚಿ ಭಾಸ್ ಜಾಂವ್, ಬರ್ಪಾಚಿ ಭಾಸ್ ಜಾಂವ್. ಕೊಂಕ್ಣಿ ಆಮ್ಚ್ಯಾ ಹಾತಿಂ ದಿಲ್ಲಿ ಮುಕ್ಲ್ಯಾ ಪಿಳ್ಗೆಕ್ ಹತಾಂತರ್ ಕರ್ಚಿ ವರ್ತಿ ಜವಾಬ್ದಾರಿ ಆಮಿಂ ಪಾಳ್ಯಾಂ”.  ಹ್ಯಾ ಉತ್ರಾಂ ದ್ವಾರಿಂ ಕೊಂಕ್ಣೆಚೊ ಮಾನ್ ಆನಿ ಕೊಂಕ್ಣಿ ಬಾಸ್ ಉರಂವ್ಕ್ ಕಾರ್ಯಾಚೆಂ ಮುಖೆಲ್ಪಣ್ ಘೆತ್ಲಲ್ಯಾ ಫೆರಾರ್ ಫಿರ್ಗಜಿಚೊ ವಿಗಾರ್ ಮಾ|ಬಾ| ಜೇಮ್ಸ್ ಮೆಂಡೋನ್ಸ ಹಾಣಿಂ ಬಳಾಧಿಕ್ ಉಲೊ ದಿಲೊ. ಕೊಂಕ್ಣಿ ಸಾಹಿತಿಕ್ ಸುಮೇಳ್ ಹಾಚೆಂ ಅಧ್ಯಕ್ಷ್‌ಪಣ್ ಘೆವ್ನ್ ತೆ ಉಲಯ್ಲೆ.

ಕೊಂಕ್ಣಿ ಸಾಹಿತಿಕ್ ಸುಮೇಳ್, ಉಲವ್ಪ್ ಆನಿ ಕವಿಗೋಷ್ಟಿ ಫೆರಾರ್ ಫಿರ್ಗಜಿಚ್ಯಾ ಸಭಾಸಲಾಂತ್ 17 ಅಗೋಸ್ತ್ 2025 ವೆರ್ ಆಯ್ತಾರಾ ಸಕಾಳಿಂ 10.30 ವರಾರ್  ಫೆರಾರ್ಚೆಂ ಪ್ರೇರಣ್ ಫಿರ್ಗಜ್ ಪತ್ರಾಚ್ಯಾ ಸುಂಕಾಣಾಖಾಲ್ ಮಾಂಡುನ್ ಹಾಡ್‌ಲ್ಲೆಂ.

ಬಾಳ್ ಆಂಜೆಲಾ ಅಲ್ಬುಕರ್ಕಾನ್ ಪವಿತ್ರ್ ಪುಸ್ತಕಾಂತ್ಲೆಂ ಕೀರ್ತನ್ 121 ವಾಚನ್ ಕರ್ನ್ ಕವಿಗೋಷ್ಟಿ ಸುರ್ವಾತ್ಲಿ. ಕೊಂಕ್ಣಿ ಭಾಷೆಚೊ ಪೋಸ್ ಕರ್ತೆಲ್ಯಾಂವ್ ಮ್ಹಣ್ ಸಾಂಕೇತಿಕ್ ಥರಾನ್ ಉಜಾರ್ ಕರ್ಚ್ಯಾಕ್ ಫೆರಾರ್ಚೆಂ ಪ್ರೇರಣ್ ರುಪ್ಯೋತ್ಸವ್ ಆಚರಣಾಚ್ಯಾಉಗ್ಡಾಸಾಕ್ ಲಾಂವ್ಕ್ ಆಸ್ಚ್ಯಾ ಮಾಡಾ ಕಾವಾತ್ಯಾಕ್ ಉದಕ್ ವೊತುನ್ ಕಾರ್ಯಾಚೆಂ ಉಗ್ತಾವಣ್ ಕೆಲೆಂ. ಸಂಪಾದಕೀಯ್ ಮಂಡಳಿಚೊ ಸಾಂದೊ ಶ್ರೀ ಮೆಲ್ವಿನ್ ಅಲ್ಬುಕರ್ಕಾನ್ ಕೊಂಕ್ಣಿ ಮಾನ್ಯತಾ ದಿಸಾವಿಶಿಂ ಪ್ರಾಸ್ತಾವಿಕ್ ಉಲವ್ಪ್ ದಿಲೆಂ. ತ್ಯಾ ನಂತರ್ ಕೊಂಕ್ಣಿ ಲೇಖಕ್ ಸಂಘ್ ಕರ್ನಾಟಕ ಹಾಚೊ ಸಂಚಾಲಕ್ ಶ್ರೀ ರಿಚರ್ಡ್ ಮೋರಸ್ ಹಾಣಿಂ ಕೊಂಕ್ಣಿ ಬಾವ್ಟೊ ಉಭಯ್ಲೊ. ವೆದಿರ್ ಆಸ್ಲಲ್ಯಾ ಮಾನಾಚ್ಯಾ ಸಯ್ರ್ಯಾಂನಿ ಸಾಂಗಾತ್ ದಿಲೊ. ಹ್ಯಾ ವೆಳಿಂ ಕೊಂಕ್ಣಿ ಮಾನೆಸ್ತ್ ಅಬ್ದುರ್ ರಹೀಮ್ ಇರ್ಶಾದ್ ಹಾಣಿಂ ಬರಯ್ಲೆಲೆಂ “ಕೊಂಕಣಿ ಆಮ್ಚಿ ಭರಮ್ಚಿ ಭಾಸ್, ಕೊಂಕಣಿ ಸರ್ವ್ ಧರಮ್‌ಚಿ ಭಾಸ್” ಹೆಂ ಗಾಯಾನ್ ಆವಾಜ್ಲೆಂ. ಮಾಂಡ್ ಸೊಭಾಣ್ ಸಂಸ್ಥ್ಯಾಚ್ಯಾ ಪ್ರೋತ್ಸಾಹಾನ್ ಹೆಂ ವಿಶೇಷ್ ಕಾರ್ಯೆಂ ಚಲವ್ನ್ ವ್ಹೆಲೆಂ.. 

 ಕೊಂಕಣಿ ಸಾಹಿತಿ ಶ್ರೀ ಡೊಲ್ಫಿ ಕಾಸ್ಸಿಯಾ ಹಾಣಿಂ ಉಲವ್ಪ್ ಚಲವ್ನ್ ಕೊಂಕ್ಣೆಂತ್ ಸಾಹಿತ್ಯ್ ರಚನ್, ಆನಿ ಹೆರ್ ಸಾಹಿತಿಕ್ ಸೂತ್ರಾಂ ವಿವರಣಾತ್ಮಕ್ ಜಾವ್ನ್ ಪ್ರಸ್ತುತ್ ಕೆಲಿಂ. ತ್ಯಾ ನಂತರ್ ಭಾಸಾಭಾಸ್ ಚಲ್ಲಿ. ಫಿರ್ಗಜ್ ಗೊವ್ಳಿಕ್ ಪರಿಷದ್ ಕಾರ್ಯದರ್ಶಿ ಶ್ರೀ ಹೆನ್ರಿ ಮಸ್ಕರೇನ್ಹಸ್, ಪೊಯೆಟಿಕ ಗುರ್ಕಾರ್ ಶ್ರೀ ನವೀನ್ ಪಿರೇರ, ಫೆರಾರ್ಚೆಂ ಪ್ರೇರಣ್ ಸಂಪಾದಕಿ ಲವಿ ಗಂಜಿಮಠ ವೆದಿರ್ ಹಾಜರ್ ಆಸ್‌ಲ್ಲಿಂ. ಲವಿ ಗಂಜಿಮಠನ್ ಸ್ವಾಗತ್ ಕರ್ನ್, ಸಂಪಾದಕೀಯ್ ಮಂಡಳಿ ಸಾಂದೊ ಶ್ರೀಮತಿ ಶಾಲೆಟ್ ಸಲ್ಡಾನ್ಹಾನ್ ಧನ್ಯವಾದ್ ಪಾಠಯ್ಲೆ. ಶ್ರೀ ಮೆಲ್ವಿನ್ ಅಲ್ಬುಕರ್ಕಾನ್ ನಿರೂಪಣ್ ಕೆಲೆಂ.

ಕಾರ್ಯಾಚೊ ವಾಂಟೊ ಜಾವ್ನ್ ಪೊಯೆಟಿಕಾಚ್ಯಾ ಸಂಗಾತ್ಪಣಾಂತ್ ಫೆರಾರ್ಚ್ಯಾ ಕವಿಂನಿ ಕವಿಗೋಷ್ಟಿ ಚಲಯ್ಲಿ. ಶ್ರೀ ಹೆನ್ರಿ ಮಸ್ಕರೇನ್ಹಸ್ ಗಂಜಿಮಠ ತಶೆಂಚ್ ಡಾ. ಫ್ಲಾವಿಯ ಕ್ಯಾಸ್ತೆಲಿನೊ ಮಣಿಪಾಲ್ ಹಾಣಿಂ ಸುಂಕಾಣ್ ಸಾಂಭಾಳ್ಳೆಂ. ವಿಗಾರ್ ಮಾ|ಬಾ| ಜೇಮ್ಸ್ ಡಿಸೋಜ ಸವೆಂ ಫೆರಾರ್ಚ್ಯಾ 10 ಕವಿಂನಿಂ ಪೊಯೆಟಿಕಾಚ್ಯಾ 10 ಕವಿಂಸಾಂಗಾತಾ ಕವಿತಾ ಪ್ರಸ್ತುತ್ ಕೆಲ್ಯೊ. ಲವಿ ಗಂಜಿಮಠ ಹಿಚಿ “ಆಮ್ಚೊ ದೇವ್ ಖಂಯ್ ಆಸಾ” ಕವಿತಾ ಆಯ್ಕೊಂವ್ಪ್ಯಾಂಚ್ಯಾ ಮೆಚ್ವಣೆಕ್ ಪಾತ್ರ್ ಜಾವ್ನ್ ಬಹುಮಾನ್ ಜೊಡುಂಕ್ ಪಾವ್ಲಿ.

ಕವಿಗೋಷ್ಟಿ ಉಪ್ರಾಂತ್ ಫಿರ್ಗಜೆಂತ್ಲ್ಯಾ ಸರ್ವ್ ಕವಿಂಕ್, ಬರವ್ಪ್ಯಾಂಕ್, ಪೊಯೆಟಿಕ ಕವಿಂಕ್, ಸರ್ವ್ ವಾಡ್ಯಾಂಚ್ಯಾ ಗುರ್ಕಾರಾಂಕ್, ಪರ್ಗಾವಾಂನಿ ಆಸ್ಚ್ಯಾ ತಶೆಂಚ್ ಫೆರಾರಾ ಭಾಯ್ರ್ ವಸ್ತಿ ಕರ್ಚ್ಯಾ ಕಾರ್ಯಾಕ್ ಹಾಜರ್ ಜಾಲ್ಲ್ಯಾ ಫೆರಾರ್‌ಗಾರ್ ಬರವ್ಪ್ಯಾಂಕ್ ರುಪ್ಯೋತ್ಸವ್ ಯಾದಿಸ್ತಿಕಾ ದೀವ್ನ್ ಮಾನ್ ಕೆಲೊ. ಪೊಯೆಟಿಕ ಗುರ್ಕಾರ್ ಶ್ರೀ ನವೀನ್ ಪಿರೇರಾನ್ ಕಾರ್ಯಾಚ್ಯಾ ಯಶಸ್ವೆಕ್ ಸಂಘಟಕಾಂಚೊ ತಶೆಂಚ್ ಸರ್ವಾಂಚೊ ಉಪ್ಕಾರ್ ಬಾವುಡ್ಲೊ. ಜೆವ್ಣಾ ಸವೆಂ ಕಾರ್ಯಕ್ರಮ್ ಸಂಪ್ಲೆಂ.