ಪ್ರಮುಕ್ ಖಬ್ರೊ

'ಆಧುನಿಕ್ ವಯ್ಜಕೀಯ್ ಶೆತಾಂತ್ ಬರಿ ಭಲಾಯ್ಕಿ, ನವ್ಯಾ ಸಾಧನಾಂಚೊ ಆನಿ ತಂತ್ರ್‌ಗಿನ್ಯಾನಾಚೊ ವಾಪಾರ್’ ವಿಷಯಾಚೆರ್ ರಾಷ್ಟ್ರ್ ಮಟ್ಟಾಚೆಂ ವಿಚಾರ್ ಸಂಕಿರಣ್

AICTE–VAANI:  ಭಾರತ್ ಹೊ ಬಹುಭಾಷಿ ದೇಶ್ ಆಸೊನ್, ಭಾರತಾಂತ್ಲ್ಯಾ ಹರ್-ಎಕೆ ಭಾಶೆಕ್ ಆಪ್ಲೆಂಚ್ ಮ್ಹಳ್ಳೆಂ ಸಾಂಸ್ಕೃತಿಕ್ ಆನಿ ಶೈಕ್ಷಣಿಕ್ ಮಹತ್ವ್ ಆಸಾ. ವಿದ್ಯಾರ್ಥಿಂನಿ ಆಪ್ಲ್ಯಾ ಮಾಯ್ ಭಾಶೆಂತ್‌ಚ್ ಶಿಕ್ಲ್ಯಾರ್ ಗಿನ್ಯಾನ್ ಖೊಲಾಯೆನ್ ಸಮ್ಜೊಂಕ್ ಸಲೀಸ್ ಮ್ಹಳ್ಳ್ಯಾ ಇರಾದ್ಯಾನ್ ಭಾರತೀಯ್ ಭಾಶಾಂನಿ ತಾಂತ್ರಿಕ್ ಆನಿ ವೃತ್ತಿಪರ್ ಶಿಕ್ಪಾಕ್ ಉತ್ತೇಜನ್ ದಿಂವ್ಚೆ ಉದೆಶಿಂ ತಶೆಂಚ್  ಥಳಾವ್ಯಾ ಆನಿ ಪ್ರಾದೇಶಿಕ್ ಭಾಸಾಂಕ್ ಪಾಟಿಂಬೊ ದಿಂವ್ಚ್ಯಾ ಇರಾದ್ಯಾನ್ ಭಾರತ್ ಸರ್ಕಾರಾನ್ AICTE–VAANI (Vibrant Advocacy for Advancement and Nurturing of Indian Languages) ಯೆವ್ಜಣ್ ತಯಾರ್ ಕೆಲಿ. AICTE–VAANI  ವರ್ವಿಂ ಕನ್ನಡ, ಕೊಂಕ್ಣಿ, ತಮಿಳ್, ತೆಲುಗು ತಸಲ್ಯಾ ಮ್ಹಾಲ್ಘಡ್ಯಾ ಭಾಶಾಂನಿ ತಾಂತ್ರೀಕ್ ವಿಷಯಾಂಚೆರ್ ಪಾಠ್ಯ್ ಪುಸ್ತಕಾಂ ಆನಿ ಸಂಶೊಧ್ ಲೇಖನಾಂ ತಯಾರ್ ಕರ‍್ಚಿಂ ಯೆವ್ಜಣಾಂಯ್ ಚಾಲು ಆಸಾತ್. ಹಾಕಾ ಲಾಗೊನ್ ವಿದ್ಯಾರ್ಥಿಂಚೊ ಆತ್ಮ್ ವಿಶ್ವಾಸ್ ವಾಡ್ತಲೊ ಮಾತ್ರ್ ನ್ಹಯ್ ತಾಂಕಾಂ ಪ್ರಾದೇಶಿಕ್ ಭಾಸಾಂನಿ ಸೊಧ್ ವಾವ್ರ್ ಕರ‍್ಚ್ಯಾಕಿಯ್ ಪ್ರೊತ್ಸಾಹ್ ಮೆಳ್ಟಲೆಂ. ಹೆ ಯೆವ್ಜಣೆಂತ್ಲ್ಯಾನ್ ಹಳ್ಳೆಂತ್ಲ್ಯಾ ಆನಿ ಗ್ರಾಮೀಣ್ ವಾಠಾರಾಂತ್ಲ್ಯಾ ವಿದ್ಯಾರ್ಥಿಂಕ್ ಸಮಾನ್ ಶಿಕ್ಪಾಚೊ ಆವ್ಕಾಸ್ ಲಾಬ್ತಲೊ. ದುಸ್ರ್ಯಾನ್ ಥಳೀಯ್ ಭಾಸಾಂಚ್ಯಾ ಪ್ರಚಾರಾ ಸಂಗಿಂ ಭಾರತೀಯ್ ಸಾಂಸ್ಕೃತಿಕ್ ಮೌಲ್ಯಾಂ ಸಂಗಿಂ ಗಿನ್ಯಾನ್ ವಾಡಂವ್ಚೊ ಏಕ್ ಸುಯೋಗಿಯ್ ವಿದ್ಯಾರ್ಥಿಂಕ್ ಫಾವೊ ಜಾತಲೊ. ಹಾಕಾ ಲಾಗೊನ್ AICTE–VAANI ಭಾರತೀಯ್ ಭಾಸಾಂಚಿ ರಾಕಣ್, ವಾಡಾವಳ್ ಆನಿ ಹಳ್ಳೆಂತ್ಲ್ಯಾ ವಿದ್ಯಾರ್ಥಿಂಚ್ಯಾ ಸಮಗ್ರ್ ಪ್ರಗತೆಕ್ ಕಾಡ್‌ಲ್ಲೆಂ ಭೋವ್ ಮಹತ್ವಾಚೆಂ ಮೇಟ್ ಜಾವ್ನಾಸಾ. 

ಸಾಂ ಲುವಿಸ್ ಪರಿಗಣಿತ್ ವಿಶ್ವ್‌ವಿದ್ಯಾಲಯ್: ಮಂಗ್ಳುರ್‌ಗಾರಾಂಚ್ಯಾ ವಿನವ್ಣ್ಯಾ ಪರ್ಮಾಣೆಂ 1981ವ್ಯಾ ವರ್ಸಾ ಮಂಗ್ಳುರಾಂತ್ ಸ್ಥಾಪಿಲ್ಲೊ ಸಾಂ ಲುವಿಸ್ ಶಿಕ್ಪಾ ಸಂಸ್ಥೊ ಸುರ್ವೆರ್ಥಾವ್ನ್‌ಚ್ ಕೊಂಕಣಿ ಭಾಶೆಕ್ ಪ್ರೋತ್ಸಾಹ್ ದೀವ್ನ್‌ಚ್ ಆಯ್ಲ್ಯಾ. ಮಂಗ್ಳೂರಿ ಕೊಂಕಣಿಂತ್ ಪಯ್ಲೊ ಸಬ್ದಾಂಕೋಶ್, ವ್ಯಾಕರಣ್ ಪುಸ್ತಕಾ ಸಂಗಿಂ ಕೊಂಕಣಿಂತ್ ಡಿಪ್ಲೊಮಾ ತಶೆಂಚ್ ಉಂಚ್ಲ್ಯಾ ಶಿಕ್ಪಾಂತ್ ಕೊಂಕಣಿ ಭಾಸ್ ಏಕ್ ಐಚ್ಛಿಕ್ ವಿಷಯ್ ಜಾವ್ನ್ ಸುರ್ವಾತುನ್ ವಿದ್ಯಾರ್ಥಿಂ ಥಂಯ್ ಮಾಂಯ್ ಭಾಶೆಚೊ ಗೌರವ್ ಚಡಾಶೆಂ ಕೆಲ್ಲಿ ಕೀರ್ತಿಯ್ ಹ್ಯಾಚ್ ಸಂಸ್ಥ್ಯಾಕ್ ಫಾವೊ ಜಾತಾ. ಹರ್ ವರ್ಸಾ ಹ್ಯಾ ವಿಶ್ವ್‌ವಿದ್ಯಾಲಯಾಂತ್ ದೊನ್ಶ್ಯಾಂ ವಯ್ರ್ ವಿದ್ಯಾರ್ಥಿ ಆಪ್ಲ್ಯಾ ಪದ್ವೆ ಶಿಕ್ಪಾಂತ್ ಕೊಂಕಣಿ ಶಿಕ್ತಾತ್. ಲಗ್ಬಗ್ 43 ವರ್ಸಾಂಥಾವ್ನ್ ಹ್ಯಾಚ್ ಶಿಕ್ಪಾ ಸಂಸ್ಥ್ಯಾಚ್ಯಾ ಅದೀನ್ ಆಸ್ಚೊ ’ಕೊಂಕಣಿ ಸಂಸ್ಥೊ’ ಸಂಸೊಧ್ ಲೇಖನಾಂ ಖಾತಿರ್‌ಚ್ ಮ್ಹಣ್ ಅಮಾನತ್ ಆಸ್ಚೆಂ ’ಅಮರ್ ಕೊಂಕಣಿ’ ಮ್ಹಳ್ಳೆಂ ಕಾನಡಿ ಆನಿ ನಾಗರಿ ಲಿಪಿಂತ್ ಫಾಯ್ಸ್ ಜಾಂವ್ಚೆಂ ಕೊಂಕ್ಣೆಂತ್ಲೆಂ ಏಕ್ ಮಾತ್ರ್ ಶಣ್ಮಾಸಿಕ್ ಫಾಯ್ಸ್ ಕರ್ನ್ ಆಸಾ.

ವಿಚಾರ್ ಸಂಕಿರಣ್: ಮಂಗ್ಳುರ್ ಸಾಂ ಲುವಿಸ್ ಪರಿಗಣಿತ್ ವಿಶ್ವ್‌ವಿದ್ಯಾಲಯ್ ಆನಿ ಅಖಿಲ್ ಭಾರತ್ ತಾಂತ್ರಿಕ್ ಶಿಕ್ಪಾ ಮಂಡಳಿ (AICTE  ಹಾಂಚ್ಯಾ ಜೋಡ್ ಆಸ್ರ್ಯಾಖಾಲ್ ಭಾರತೀಯ್ ಭಾಶೆಂಚ್ಯೆ ಪ್ರಗತಿ ಆನಿ ಅಭಿವೃದ್ಧೆಕ್ ಸ್ಪಂದನ್ ಕರ‍್ಚೊ ಸಂಸ್ಥೊ (AICTE)  ಹ್ಯಾಚ್ ಸಪ್ತೆಂಬರ್ 11 ಆನಿ 12 ತಾರಿಕೆರ್ ಸಾಂ ಲುವಿಸ್ ಪರಿಗಣಿತ್ ವಿಶ್ವ್‌ವಿದ್ಯಾಲಯ್ ಹಾಂಗಾಸರ್ ಮಾಂಡುನ್ ಹಾಡ್ತ್ತಾ ದೋನ್ ದಿಸಾಂಚೆಂ ರಾಷ್ಟ್ರ್ ಮಟ್ಟಾಚೆಂ ವಿಚಾರ್ ಸಂಕಿರಣ್. ’ಆಧುನಿಕ್ ವಯ್ಜಕೀಯ್ ಶೆತಾಂತ್ ಬರಿ ಭಲಾಯ್ಕಿ, ನವ್ಯಾ ಸಾಧನಾಂಚೊ ಆನಿ ತಂತ್ರ್‌ಗಿನ್ಯಾನಾಚೊ ವಾಪಾರ್’ ಮ್ಹಳ್ಳ್ಯಾ ವಿಷಯಾಚೆರ್ ಚಲ್ಚೆಂ ಹೆಂ ವಿಚಾರ್ ಸಂಕಿರಣ್ ಕೊಂಕ್ಣೆಂತ್ಲೊ ನಾಂವಾಡ್ದೀಕ್ ಬರಯ್ಣಾರ್ ಡೊ| ಎಡ್ವರ್ಡ್ ಎಲ್. ನಜ್ರೆತ್ ಉಗ್ತಾಯ್ತಲೆ. ಹ್ಯಾ ಸಂಕಿರಣಾಂತ್ ಭಲಾಯ್ಕೆ ಶೆತಾಂತ್ ಜಾಲ್ಲಿ ವಯ್ಜಕೀಯ್ ಹಾತೆರಾಂಚಿ ಅಭಿವೃದ್ಧಿ, ವಯ್ಜುಕೀಯ್ ವಿಭಾಗಾಂತ್ ವಾಪಾರ‍್ಚ್ಯಾ ಆಧುನಿಕ್ ಚಿಕಿತ್ಸಾ ಆನಿ ಮೇಲ್ವಿಚಾರಣಾಂಚ್ಯಾ ಸಾಧನಾಂಚಿ ಮಾಹೆತ್, ಇಂಜಿನಿಯರಿಂಗ್ ಆನಿ ವಯ್ಜಕೀಯ್ ಶೆತಾಂ ಮಧೆಂ ಆಸ್ಚ್ಯಾ ಲಾಗ್ಶಿಲ್ಯಾ ಸಂಬಂಧಾವಿಶಿಂ ಮಾಹೆತ್, ಲೊಕಾಥಂಯ್ ವಯ್ಜಕೀಯ್ ಶೆತಾ ಥಂಯ್ ನೈತಿಕತಾ ಮಾಂಡುನ್ ಹಾಡುಂಕ್ ಪ್ರೇರಣ್, ತಶೆಂಚ್ ಕೊಂಕ್ಣೆಂತ್ ಚಡಿತ್ ಸಂಸೊಧ್ ಪ್ರಬಂಧ್ ಮಂಡನ್ ಆನಿ ಪ್ರಗಟ್ ಕರುಂಕ್ ಉತ್ತೇಜನ್ ಲಾಬ್ತಲೆಂ. ಭಾಗ್ ಘೆತೆಲ್ಯಾಂನಿ ಕಡ್ಡಾಯೆನ್ ದೋನೀ ದಿಸಾಂನಿ ವಿಚಾರ್ ಸಂಕಿರಣಾಂತ್ ಹಾಜರ್ ಆಸಾಜೆ. ಹ್ಯಾ ವಿಚಾರ್ ಸಂಕಿರಣಾಂತ್ ಭಾಗ್ ಘೆವ್ನ್ ಹಾಚೊ ಬರೊ ಉಪಯೋಗ್ ಕರಿಜೆ ಮ್ಹಣ್ ವಿಚಾರ್ ಸಂಕಿರಣಾಚಿ ಸಂಯೋಜಕಿ ದೊ| ರೀಟಾ ಕ್ರಾಸ್ತಾ ಹಿಣೆ ವಿನತಿ ಕೆಲ್ಯಾ. ವಿಚಾರ್ ಸಂಕಿರಣಾಂತ್ ಭಾಗ್ ಘೆತೆಲ್ಯಾಂನಿ ಹೆಂ ಗೂಗಲ್ ಫೊರ್ಮ್ ಭರ್ತಿ ಕರ‍್ಚೆಂ ಕಡ್ಡಾಯೆಚೆಂ. https://forms.gle/zTVwrJtMfBrKo39C9

ವಿವಿಧ್ ಮುಳಾಂಚೆ ತಜ್ಞ್ ಉಲವ್ಪಿ: